Osho Philosophy: సమాజం కోసం బతకాలా? మన కోసం మనం బతకాలా? ఓషో చెప్పిన తత్వం ఇదే

Osho Philosophy: మనిషి పుట్టినప్పటి నుంచి చనిపోయే వరకు ఏదో ఒక సమూహంలో భాగంగా జీవిస్తూనే ఉంటాడు. చిన్నప్పుడు కుటుంబం చెప్పినట్లు నడుచుకుంటాడు. పెరిగిన తర్వాత సమాజం నిర్ణయించిన పద్ధతులను అనుసరిస్తాడు. చదువు, ఉద్యోగం, పెళ్లి, కుటుంబ బాధ్యతలు.. ఇలా ప్రతి విషయంలోనూ ఇతరులు ఏమనుకుంటారోనని ఆలోచిస్తుంటాడు. చివరకు తనకు ఏం కావాలో కూడా మర్చిపోయి, ఇతరుల అంచనాలకు అనుగుణంగా జీవితాన్ని నడిపిస్తాడు. అయితే మనిషి నిజంగా స్వేచ్ఛగా జీవిస్తున్నాడా? లేక సమాజం ఏర్పాటు చేసిన కనిపించని గోడల మధ్య బతుకుతున్నాడా? ఈ ప్రశ్నకు ప్రముఖ ఆధ్యాత్మిక తత్వవేత్త ఓషో చెప్పిన సమాధానం ఆలోచింపజేస్తుంది.

సమాజం ఎప్పుడూ స్వేచ్ఛను ఇవ్వలేదా?

ఓషో అభిప్రాయం ప్రకారం తిరుగుబాటుదారుడు అంటే కేవలం సమాజాన్ని ఎదిరించేవాడు కాదు. సమాజం తనపై విధించే నియమాలు, ఆలోచనా విధానాలు, నమ్మకాలతో తన జీవితాన్ని పరిమితం చేసుకోని వ్యక్తి. ప్రతి సమాజం మనిషి జీవనానికి కొన్ని హద్దులు నిర్ణయిస్తుందని ఆయన చెబుతారు. ఒక వ్యవస్థలోని ఆంక్షలు నచ్చకపోతే మరో వ్యవస్థను ఎంచుకోవచ్చు. కానీ వ్యవస్థ మారినంత మాత్రాన మనిషికి సంపూర్ణ స్వేచ్ఛ లభించదన్నది ఆయన ఆలోచన. ఉదాహరణకు ఒకప్పుడు పెట్టుబడిదారీ విధానం ఉన్న సమాజం తర్వాత సామ్యవాదం వైపు వెళ్లవచ్చు. అక్కడి నుంచి కమ్యూనిజం లేదా మరో రాజకీయ వ్యవస్థ రావచ్చు. పేర్లు, విధానాలు మారినా మనిషి ఆలోచనా బంధాలు అలాగే ఉండిపోవచ్చని ఓషో విశ్లేషిస్తారు.

విప్లవం వచ్చినంత మాత్రాన మార్పు వస్తుందా?

సమాజాన్ని మార్చాలని ఎన్నో ఉద్యమాలు, విప్లవాలు జరిగాయి. పాలకులు మారారు, ప్రభుత్వాలు మారాయి, పాలనా విధానాలు మారాయి. అయినప్పటికీ మనిషి ఆలోచనల్లో పూర్తి మార్పు వచ్చిందా అనేది ఓషో లేవనెత్తిన ప్రశ్న. ఆయన దృష్టిలో సమస్య కేవలం వ్యవస్థలో ఉండదు. మనిషి మనస్తత్వంలో కూడా ఉంటుంది. పాత పద్ధతులను వదిలించుకున్న వ్యక్తి మళ్లీ మరో కొత్త సిద్ధాంతానికి బానిసగా మారితే దానిని నిజమైన స్వేచ్ఛగా పరిగణించలేం. అందుకే బయట ప్రపంచాన్ని మార్చాలని ప్రయత్నించే ముందు మనలోని భయాలు, ఆధారపడే స్వభావం, మూఢ నమ్మకాలను పరిశీలించుకోవాలని ఆయన తత్వం సూచిస్తుంది.

ఒంటరిగా ఉండగలగడమే నిజమైన స్వేచ్ఛ!

ఓషో ఆలోచనల్లో అత్యంత ఆసక్తికరమైన విషయం ఇదే. మనిషి ఒంటరిగా ఉండటానికి భయపడతాడని ఆయన చెబుతారు. అందుకే ఏదో ఒక కుటుంబం, సంఘం, మతం, రాజకీయ పార్టీ లేదా సిద్ధాంతంతో తనను తాను అనుసంధానం చేసుకుంటాడు. అలా చేస్తే తనకు ఒక గుర్తింపు ఉందని, తాను ఒంటరివాడిని కాదనే భరోసా కలుగుతుంది. కానీ నిజమైన స్వేచ్ఛ అంటే ఎవరి మీదా ఆధారపడకుండా తన ఉనికిని తాను అర్థం చేసుకోగలగడం. ఒంటరిగా ఉండటం అంటే అందరినీ వదిలేసి జీవించడం కాదు. ఇతరుల అభిప్రాయాలపై ఆధారపడకుండా తన ఆలోచనలను అర్థం చేసుకోవడం. తన నిర్ణయాలకు తానే బాధ్యత వహించడం.

ఓషో చెప్పిన జీవిత పాఠం ఇదే!

మనిషి జీవితంలో కుటుంబం, సమాజం, సంబంధాలు అవసరమే. అయితే వాటి కోసం తన వ్యక్తిత్వాన్ని పూర్తిగా కోల్పోవాల్సిన అవసరం లేదు. ఇతరులను గౌరవిస్తూనే తన ఆలోచనలకు విలువ ఇవ్వాలి. సమాజంలో జీవిస్తూనే స్వతంత్రంగా ఆలోచించగలగాలి. ఓషో తత్వంలోని అసలు సందేశం కూడా ఇదే. బయట ప్రపంచంలో స్వేచ్ఛ కోసం వెతకడం కంటే ముందుగా మనసులోని భయాలు, బంధనాల నుంచి బయటపడాలి. మనలో ఏర్పడే నిర్మలత్వం, అమాయకత్వం, స్వీయ అవగాహనే నిజమైన ఆధ్యాత్మికతకు పునాది. సమాజంలో భాగంగా జీవించడం తప్పు కాదు.. కానీ మన జీవితానికి సంబంధించిన ప్రతి నిర్ణయాన్ని సమాజమే తీసుకోవాలని అనుకోవడమే అసలైన బంధనం.