కిడ్నీ స్టోన్ అమ్మితే రూ.60 లక్షలు.. విలియం షాట్నర్ వైరల్ స్టోరీ

సాధారణంగా కిడ్నీ స్టోన్ సమస్యతో బాధపడేవారు, అది ఒంటి నుంచి బయటకు రాగానే హమ్మయ్య అనుకుని వదిలేస్తారు. కానీ, ప్రముఖ 'స్టార్ ట్రెక్' (Star Trek) హాలీవుడ్ నటుడు విలియం షాట్నర్ (William Shatner) విషయంలో మాత్రం ఊహించని మలుపు తిరిగింది. సర్జరీ ద్వారా తొలగించిన తన చిన్న నల్లటి కిడ్నీ స్టోన్‌ను ఒక ఆన్‌లైన్ క్యాసినో సంస్థ కొనుగోలు చేయడానికి ముందుకు రాగా, ఆయన దాన్ని వేలం వేసి భారీగా నిధులు సేకరించారు. ఆ డబ్బుతో ఒక పేద కుటుంబానికి సొంతింటి కలను నెరవేర్చి వార్తల్లో నిలిచారు. తాజాగా బ్రెంట్ స్పైనర్, జోనాథన్ ఫ్రేక్స్ నిర్వహించిన టాక్ షో వేదికగా విలియం షాట్నర్ ఈ విచిత్రమైన ఉదంతాన్ని మరోసారి గుర్తుచేసుకున్నారు.

వదులుకోలేని వింతైన ఆఫర్

ఈ విచిత్రమైన ప్రతిపాదనను విలియం షాట్నర్ ముందుకు తీసుకువచ్చింది 'GoldenPalace.com' అనే ఆన్‌లైన్ క్యాసినో సంస్థ. పబ్లిసిటీ స్టంట్స్ కోసం వింత వింత వస్తువులను కొనుగోలు చేయడంలో ఈ సంస్థకు ప్రత్యేక గుర్తింపు ఉంది. క్యాసినో ప్రతినిధులు షాట్నర్‌ను సంప్రదించి, ఆయన కిడ్నీ స్టోన్ తమకు కావాలని కోరడంతో.. ఆయన వెంటనే తన డాక్టర్‌ను సంప్రదించి ఆ రాయి పత్రాల వద్ద భద్రంగా ఉందో లేదో చెక్ చేసుకున్నారు. అదృష్టవశాత్తూ అది లభించడంతో, తనకు నరకం చూపించిన ఆ వైద్యపరమైన సమస్యను ఒక మంచి ఛారిటీకి వాడుకోవాలని ఆయన భావించారు. క్యాసినో సంస్థ మొదట ఈ రాయి కోసం $15,000 డాలర్లు ఆఫర్ చేయగా షాట్నర్ తిరస్కరించారు. ఆ తర్వాత వారు ఆఫర్‌ను $25,000 డాలర్లకు పెంచారు. అయితే ఈ డీల్ వెనుక ఉన్న పబ్లిసిటీ వాల్యూను గుర్తించిన షాట్నర్ ఏకంగా $75,000 డాలర్లు అంటే ప్రస్తుత భారతీయ కరెన్సీలో దాదాపు రూ. 60 లక్షలకు పైగా డిమాండ్ చేయడంతో వారు అంగీకరించారు. ఆ తర్వాత లాస్ ఏంజెల్స్‌లోని జూలియన్స్ ఆక్షన్స్‌ ద్వారా ఈ వేలం పూర్తయింది.

సహ నటుల సాయం , పబ్లిసిటీ స్టంట్

ఈ ఛారిటీ డ్రైవ్‌లో షాట్నర్‌తో పాటు ఆయన నటించిన 'బోస్టన్ లీగల్' (Boston Legal) షో సహ నటులు కూడా భాగమయ్యారు. వారు తమ వంతుగా మరో $20,000 నుంచి $25,000 డాలర్ల వరకు విరాళంగా అందించారు. దీనితో మొత్తంగా దాదాపు $1,00,000 డాలర్ల ఫండ్ రూపుదిద్దుకుంది. క్యాసినో సంస్థలు సాధారణ ప్రకటనలు ఇవ్వడంపై ఉండే ఆంక్షల వల్ల, ఇలాంటి వింతైన రీతిలో ఒక సెలబ్రిటీ కిడ్నీ స్టోన్‌ను కొని ప్రపంచవ్యాప్తంగా మీడియా అటెన్షన్ సంపాదించాయి. ఆ కిడ్నీ స్టోన్‌ను వేర్వేరు ప్రదర్శనల్లో తిప్పాలని ఆ సంస్థ భావించగా, షాట్నర్ కూడా తనపై తాను జోకులు వేసుకుంటూ ఈ విషయాన్ని ఎంతో సరదాగా స్వీకరించారు.

లూసియానా కుటుంబానికి సొంతింటి కల

ఈ వేలం ద్వారా వచ్చిన మొత్తం నిధులను నిరుపేదలకు ఇళ్లు నిర్మించి ఇచ్చే 'హ్యాబిటాట్ ఫర్ హ్యూమానిటీ' (Habitat for Humanity) అనే లాభాపేక్ష లేని సంస్థకు విరాళంగా అందించారు. ఈ డబ్బు సహాయంతో లూసియానా రాష్ట్రంలోని ఐదుగురు సభ్యులు గల ఒక పేద కుటుంబానికి సురక్షితమైన ఇల్లు లభించింది. తనకు ఎంతో వేదనను మిగిల్చిన ఒక చిన్న కిడ్నీ స్టోన్‌ను, తన సహ నటుల మద్దతుతో , వినూత్న ఆలోచనతో ఒక పేద కుటుంబానికి ఆసరాగా మార్చడంపై విలియం షాట్నర్ సంతోషం వ్యక్తం చేశారు. వింతైన పబ్లిసిటీ ఆశయం, నటుడి ధార్మిక ఆలోచన కలగలిసి ఒక కుటుంబాన్ని నిలబెట్టిన కథనంగా ఇది నిలిచిపోయింది.