Crows: మేధాశక్తిలో మనుషుల కంటే కాకులే బెటర్.! ఆసక్తికర విషయాలివిగో..

Crows: మనుషుల కంటే రెట్టింపు వేగంతో కాకులు నిర్ణయాలు తీసుకుంటాయని తాజా అధ్యయనం తేల్చింది. సాధారణ పరిస్థితుల్లో మనుషులు స్పందించే సమయంతో పోలిస్తే, కాకులు సగం సమయంలోనే అత్యంత వేగంగా స్పందించగలవని పరిశోధకులు గుర్తించారు. మెదడు చిన్నగా ఉన్నప్పటికీ, సమాచారాన్ని త్వరగా గ్రహించి క్షణాల్లో నిర్ణయాలు తీసుకునే అద్భుతమైన మేధాశక్తి కాకులకు ఉందని ఈ శాస్త్రీయ అధ్యయనం నిరూపించింది.

జర్మనీలోని యూనివర్సిటీ ఆఫ్ టూబింగెన్ పరిశోధకులు ఫిలిప్ ష్మిడ్‌బౌర్, ఆండ్రియాస్ నీడర్ ఈ అధ్యయనం చేశారు. ఇది 'సైన్స్' జర్నల్‌లో ప్రచురితమైంది. టచ్‌స్క్రీన్‌పై కదులుతున్న చుక్కలు ఎటువైపు వెళ్తున్నాయో గుర్తించేలా రెండు క్యారియన్ కాకులకు శిక్షణ ఇచ్చారు. ఈ కాకులు సగటున కేవలం 235 మిల్లీసెకన్లలో నిర్ణయం తీసుకున్నాయి. చుక్కలు కనిపించిన 70 మిల్లీసెకన్లకే కాకుల మెదడులో నిర్ణయ ప్రక్రియ మొదలైనట్లు కనిపించింది. చుక్కల కదలిక స్పష్టంగా ఉన్నప్పుడు సమాధానాల్లో దాదాపు 100 శాతం కచ్చితత్వం ఉంది.

పక్షుల మేధో సామర్థ్యంపై జరుగుతున్న ఈ తరహా పరిశోధనలు జీవశాస్త్రంలో కొత్త కోణాలను ఆవిష్కరిస్తున్నాయని నిపుణులు వివరిస్తున్నారు. జంతుజాలం ప్రదర్శించే ఈ అసాధారణ ప్రవర్తన మానవ మెదడు పనితీరుతో పోల్చి అధ్యయనం చేయడానికి ఎంతగానో ఉపయోగపడుతుందని శాస్త్రవేత్తలు అభిప్రాయపడుతున్నారు. కాగా, ఈ ఫలితాలు రెండు కాకులపై చేసిన ప్రయోగాల ఆధారంగా వచ్చినవి. అన్ని కాకులు, ఇతర పక్షి జాతులకూ ఇదే సామర్థ్యం ఉందో లేదో తెలుసుకోవడానికి మరింత పరిశోధన అవసరమని పరిశోధకులు చెబుతున్నారు.