Bakrid Special: ఒక్కసారి తింటే మళ్లీ మర్చిపోలేని రాయల్ డెజర్ట్స్.!

Bakrid Special: ముస్లిం సోదరులు అత్యంత భక్తిశ్రద్ధలతో జరుపుకునే పండుగలలో ఈద్-ఉల్-అజ్హా (బక్రీద్) ఒకటి. ఈ పండుగ విందులో ఘుమఘుమలాడే బిర్యానీ, కబాబ్‌ల వంటి మాంసాహార వంటకాలతో పాటు నోరూరుంచే తియ్యటి సాంప్రదాయ స్వీట్లు ప్రత్యేక ఆకర్షణగా నిలుస్తాయి. శతాబ్దాల నాటి మొఘలాయి రుచులు, పాలు, డ్రై ఫ్రూట్స్, కుంకుమపువ్వుల సుగంధాలతో పండుగ టేబుల్‌పై వడ్డించే ఆ 10 అద్భుతమైన స్వీట్ వంటకాల వివరాల గురించి తెలుసుకుందాం..

1. షీర్ ఖుర్మా (Sheer Khurma): ఏ ఈద్ వేడుకలైనా షీర్ ఖుర్మా లేకుంటే అసంపూర్ణమే. సన్నటి సేమ్యా, పాలు, చక్కెర, నెయ్యిలో వేయించిన ఖర్జూరాలు , రకరకాల డ్రై ఫ్రూట్స్ కలిపి తయారుచేసే ఈ క్రీమీ స్వీట్ భారతీయ ముస్లిం ఇళ్లలో అత్యంత ప్రధానమైన వంటకం.

2. షాహీ తుక్డా (Shahi Tukda): మొఘలాయిల కాలం నాటి ఈ రాచరికపు స్వీట్‌ను నెయ్యిలో దోరగా వేయించిన బ్రెడ్ ముక్కలతో తయారుచేస్తారు. ఈ ముక్కలను చక్కెర పాకంలో ముంచి, పైన చిక్కటి రబ్రీ, కుంకుమపువ్వు , నట్స్ వేసి క్రిస్పీగా, క్రీమీగా వడ్డిస్తారు.

3. ఫిర్నీ (Phirni): బాస్మతి బియ్యాన్ని బరకగా నూరి, పాలు, చక్కెరతో నెమ్మదిగా ఉడికించి, యాలకుల పొడి, గులాబీ నీటితో దీనిని సిద్ధం చేస్తారు. చిన్న చిన్న మట్టి పాత్రలలో (కస్సోరా) పోసి, ఫ్రిజ్‌లో చల్లబరిచిన తర్వాత వడ్డించే ఈ రైస్ పుడ్డింగ్ వేసవి పండుగ విందులకు చాలా బాగుంటుంది.

4. కిమామీ సేవాయ్ (Kimami Sewai): ఇది సాధారణ సేమ్యా కంటే చాలా భిన్నంగా , రిచ్‌గా ఉంటుంది. సేమ్యాను ఖోయా (కోవా), డ్రై ఫ్రూట్స్, ఖర్జూరాలు, చక్కెర , నెయ్యితో కలిపి చాలా సేపు చిన్న మంటపై ఉడికిస్తారు. ఇది ముదురు రంగులో, గ్లోసీగా ఉంటూ ఉత్తరప్రదేశ్, హైదరాబాద్‌లలో బాగా ప్రాచుర్యం పొందింది.

5. డబుల్ కా మీఠా (Double Ka Meetha): హైదరాబాద్‌ క్లాసిక్ వంటకమైన ఇది చూడటానికి షాహీ తుక్డా లాగే ఉన్నా, దీని ఆకృతి (Texture) చాలా మెత్తగా ఉంటుంది. నెయ్యిలో వేయించిన బ్రెడ్‌ను పాలు, చక్కెర పాకం, కుంకుమపువ్వు , నట్స్‌తో ఉడికించి వివాహాలు, ఈద్ విందులలో ప్రత్యేకంగా వడ్డిస్తారు.

6. బక్లావా (Baklava): మిడిల్ ఈస్ట్ (అరబ్) దేశాలలో అత్యంత ప్రాచుర్యం పొందిన స్వీట్ ఇది. పలుచటి ఫైలో పేస్ట్రీ పొరల (Layers) మధ్యలో నట్స్, బట్టర్ నింపి బేక్ చేసిన తర్వాత, పైన తియ్యటి షుగర్ సిరప్ లేదా తేనె వేసి క్రిస్పీగా తయారుచేస్తారు.

7. ఖీర్ (Kheer): భారతీయ ఇళ్లలో అత్యంత ప్రజాదరణ పొందిన సాంప్రదాయ స్వీట్ ఖీర్. పాలు, బియ్యం, చక్కెర , యాలకుల పొడితో ప్రాథమికంగా చేసే ఈ వంటకాన్ని.. ఈద్ వంటి ప్రత్యేక సందర్భాలలో కుంకుమపువ్వు, మరిన్ని డ్రై ఫ్రూట్స్‌తో మరింత రిచ్‌గా మారుస్తారు.

8. మాల్పువా (Malpua): మెత్తగా, నోట్లో వేస్తే కరిగిపోయేలా ఉండే ఈ స్వీట్ పాన్‌కేక్‌లను పండుగ రోజుల్లో ఎక్కువగా చేసుకుంటారు. నెయ్యిలో కాల్చిన ఈ మాల్పువాలను చక్కెర పాకంలో ముంచి, పైన చిక్కటి రబ్రీతో కలిపి తింటే ఆ రుచే వేరు.

9. ఫలూదా (Falooda): ఇది సగం డెజర్ట్, సగం డ్రింక్‌లా ఉండి వేసవి కాలంలో వచ్చే పండుగకు అద్భుతమైన రిఫ్రెష్‌మెంట్‌ను ఇస్తుంది. రోజ్ సిరప్, సబ్జా గింజలు, సేమ్యా, పాలు, జెల్లీ , పైన ఐస్‌క్రీమ్ స్కూప్‌ వేసి చల్లచల్లగా దీనిని అందిస్తారు.

10. బాదాం హల్వా (Badam Halwa): పండుగ రోజున రాయల్ ఫ్లేవర్ ఇచ్చే స్వీట్ ఇది. నానబెట్టి రుబ్బిన బాదాం పప్పు, ఎక్కువ మొత్తంలో నెయ్యి, చక్కెర , కుంకుమపువ్వు వేసి దీనిని తయారుచేస్తారు. ఎంతో స్మూత్‌గా ఉండే ఈ హల్వాను పండుగ విందులో వేడివేడిగా వడ్డిస్తారు.