Gajwel: గజ్వేల్–ప్రజ్ఞాపూర్‌లో కోతుల బెడద.. ప్రజలకు కంటిమీద కునుకు కరువు!

Gajwel: సిద్దిపేట జిల్లా గజ్వేల్–ప్రజ్ఞాపూర్ మున్సిపాలిటీ పరిధిలో కోతుల బెడద తీవ్రరూపం దాల్చింది. వీధులు, కాలనీల్లో గుంపులుగా సంచరిస్తూ ప్రజలను భయాందోళనకు గురిచేస్తున్నాయి.

Osman Pathan, GAJEWL
Published on: 19 Nov 2026 1:51 PM IST
Gajwel
X

Gajwel: గజ్వేల్–ప్రజ్ఞాపూర్‌లో కోతుల బెడద.. ప్రజలకు కంటిమీద కునుకు కరువు!

గజ్వేల్: గజ్వేల్–ప్రజ్ఞాపూర్ మున్సిపాలిటీ పరిధిలో కోతుల బెడద రోజురోజుకూ తీవ్రరూపం దాల్చుతోంది. పట్టణంలోని ప్రధాన వీధులతో పాటు వివిధ కాలనీలు, నివాస ప్రాంతాల్లో కోతులు గుంపులుగుంపులుగా సంచరిస్తూ ప్రజలను తీవ్ర ఇబ్బందులకు గురిచేస్తున్నాయి. ఉదయం, సాయంత్రం, రాత్రి అనే తేడా లేకుండా ఇళ్లపైకి, వీధుల్లోకి చొరబడుతూ హడావుడి సృష్టిస్తున్నాయి. కోతుల సంచారం పెరగడంతో పట్టణ ప్రజలు నిత్యం భయాందోళనల మధ్య కాలం వెళ్లదీస్తున్నారు.

ముఖ్యంగా నివాస గృహాలపైకి చేరుతున్న కోతులు ఇంటి ఆవరణల్లోకి చొరబడటమే కాకుండా, ఇళ్లలోని వస్తువులను చిందరవందర చేస్తున్నాయని స్థానికులు వాపోతున్నారు. ఇళ్ల ముందు ఆరబెట్టిన దుస్తులు, ఆహార పదార్థాలు, ఇతర వస్తువులను ఎత్తుకెళ్లడం, ఇంటి పరిసరాల్లో అల్లరి చేస్తూ భయాందోళనలకు గురిచేయడం వంటి ఘటనలతో ప్రజలు విసిగిపోతున్నారు. కొన్ని ప్రాంతాల్లో కోతుల గుంపులు ఒకేచోట చేరి వీధుల్లో స్వేచ్ఛగా సంచరిస్తుండటంతో అటువైపు వెళ్లేందుకు కూడా ప్రజలు జంకుతున్నారు.

రాత్రివేళల్లో కోతుల అరుపులతో నిద్రలేని పరిస్థితి

పగటిపూట ఇళ్లపై, వీధుల్లో హడావుడి సృష్టిస్తున్న కోతులు రాత్రివేళల్లోనూ తమ ఆగడాలను కొనసాగిస్తున్నాయి. గుంపులుగా చేరి పెద్దపెట్టున అరుస్తూ, కేకలు వేస్తూ స్థానికులను నిద్రకు దూరం చేస్తున్నాయి. ముఖ్యంగా చిన్నపిల్లలు, వృద్ధులు రాత్రివేళల్లో కోతుల శబ్దాలతో భయాందోళనలకు గురవుతున్నారు. ఇంటి పైకప్పులపై కోతులు పరుగులు తీయడం, ఒక ఇంటి నుంచి మరో ఇంటిపైకి దూకుతూ హడావుడి చేయడంతో ప్రశాంతంగా జీవించలేని పరిస్థితి నెలకొందని స్థానికులు ఆవేదన వ్యక్తం చేస్తున్నారు.

బయటకు రావాలంటేనే భయం..

కోతుల బెడద కారణంగా పాఠశాలలకు వెళ్లే విద్యార్థులు, చిన్నారులు, మహిళలు, వృద్ధులు తీవ్ర ఇబ్బందులు ఎదుర్కొంటున్నారు. ముఖ్యంగా ఉదయం, సాయంత్రం సమయాల్లో పాఠశాలలకు వెళ్లే పిల్లలు, నిత్యావసరాల కోసం బయటకు వచ్చే మహిళలు కోతుల గుంపులను చూసి భయపడుతున్నారు. ఎప్పుడు ఎక్కడి నుంచి కోతులు వచ్చి దాడి చేస్తాయోనన్న ఆందోళనతో రాకపోకలు సాగించాల్సి వస్తోందని చెబుతున్నారు. ద్విచక్ర వాహనదారులు సైతం రోడ్లపై ఒక్కసారిగా ఎదురయ్యే కోతుల కారణంగా ప్రమాదాల బారిన పడే అవకాశం ఉందని ఆందోళన వ్యక్తం చేస్తున్నారు.

అధికారులు స్పందించాలి.. ప్రమాదాలు జరగకముందే చర్యలు తీసుకోవాలి

పట్టణంలో కోతుల బెడద రోజురోజుకూ పెరుగుతున్నప్పటికీ సంబంధిత అధికారులు శాశ్వత పరిష్కార దిశగా చర్యలు తీసుకోవాలని ప్రజలు కోరుతున్నారు. మున్సిపల్ అధికారులు, అటవీ శాఖ అధికారులు సమన్వయంతో ప్రత్యేక బృందాలను ఏర్పాటు చేసి కోతుల సంచారాన్ని నియంత్రించాలని విజ్ఞప్తి చేస్తున్నారు. అవసరమైన చర్యలు చేపట్టి కోతులను సురక్షితంగా పట్టుకుని నిబంధనల ప్రకారం అటవీ ప్రాంతాలకు తరలించాలని కోరుతున్నారు. ప్రజలకు, ముఖ్యంగా చిన్నారులు, వృద్ధులకు ఎలాంటి ప్రమాదం జరగకముందే అధికారులు స్పందించాలని పట్టణవాసులు డిమాండ్ చేస్తున్నారు.

ఇప్పటికైనా మున్సిపల్ పాలకవర్గం, సంబంధిత అధికారులు ఈ సమస్యను తీవ్రంగా పరిగణించి క్షేత్రస్థాయిలో పరిశీలన చేపట్టాలని, కోతుల బెడద నుంచి పట్టణ ప్రజలకు శాశ్వత ఉపశమనం కల్పించాలని స్థానికులు కోరుతున్నారు.

Osman Pathan, GAJEWL

Osman Pathan, GAJEWL