Gajwel: గజ్వేల్ మహిళా కళాశాలలో ఘనంగా జాతీయ విద్యా దినోత్సవం!

గజ్వేల్: గజ్వేల్ ప్రభుత్వ మహిళా డిగ్రీ కళాశాలలో జాతీయ విద్యా దినోత్సవ వేడుకలను ఘనంగా నిర్వహించారు. ఈ సందర్భంగా విద్య ప్రాధాన్యత, మహిళా సాధికారతలో విద్య పాత్ర, దేశాభివృద్ధికి విద్యారంగం అందిస్తున్న సేవలపై అధ్యాపకులు విద్యార్థినులకు అవగాహన కల్పించారు.

కళాశాల ప్రిన్సిపాల్ ప్రొఫెసర్ అనిత అబ్రహం అధ్యక్షతన జరిగిన ఈ కార్యక్రమంలో ఆమె మాట్లాడుతూ మహిళల సాధికారతకు విద్య అత్యంత కీలకమైన సాధనమని పేర్కొన్నారు. విద్యార్థినులు క్రమశిక్షణతో, పట్టుదలతో చదువుకొని ఉన్నత లక్ష్యాలను చేరుకోవాలని, తమ ప్రతిభతో మంచి భవిష్యత్తును నిర్మించుకోవాలని సూచించారు. కళాశాల వైస్ ప్రిన్సిపాల్ కమల క్రిస్టియన్ మాట్లాడుతూ భారతదేశంలో ఆధునిక విద్యావ్యవస్థ అభివృద్ధికి మౌలానా అబుల్ కలాం ఆజాద్ విశేష కృషి చేశారని తెలిపారు. ఆయన జన్మదినమైన నవంబర్ 11ను జాతీయ విద్యా దినోత్సవంగా నిర్వహించుకుంటున్నామని వివరించారు.

ఎకనామిక్స్ విభాగం అధ్యాపకురాలు డాక్టర్ బి. కస్తూరిబాయ్ మాట్లాడుతూ విద్య దేశ ఆర్థిక, శాస్త్ర, సాంకేతిక రంగాల అభివృద్ధికి పునాదిగా నిలుస్తుందని పేర్కొన్నారు. రాజనీతి శాస్త్ర విభాగం అధ్యాపకురాలు డాక్టర్ డి. సుజాత మాట్లాడుతూ మహిళల ఆత్మవిశ్వాసం, స్వావలంబనకు విద్య ఎంతో దోహదపడుతుందని, విద్యార్థినులు చదువుకు అత్యంత ప్రాధాన్యత ఇవ్వాలని సూచించారు.

పాలన శాస్త్ర విభాగం అధ్యాపకుడు డాక్టర్ బి. మురళీధర్ మాట్లాడుతూ మౌలానా అబుల్ కలాం ఆజాద్ స్వాతంత్ర్య సమరయోధుడిగా దేశ స్వాతంత్ర్య ఉద్యమంలో కీలక పాత్ర పోషించారని గుర్తుచేశారు. స్వాతంత్ర్యం అనంతరం దేశ తొలి విద్యాశాఖ మంత్రిగా బాధ్యతలు చేపట్టి, విద్యారంగ అభివృద్ధికి విశేష సేవలందించారని వివరించారు. ఈ కార్యక్రమంలో అధ్యాపకులు డాక్టర్ డి. శ్రీలత, జేవీఆర్ అర్చన, సీహెచ్ ఉమారాణి, ఇతర అధ్యాపకులు, కళాశాల విద్యార్థినులు పెద్ద సంఖ్యలో పాల్గొన్నారు.