Razole: రాజోలులో రెండవ రోజు కొనసాగిన వీఆర్ఏల నిరవధిక సమ్మె!

Razole: డాక్టర్ బి.ఆర్. అంబేడ్కర్ కోనసీమ జిల్లా, రాజోలు తహశీల్దార్‌ కార్యాలయం ఎదుట వీఆర్ఏల నిరవధిక సమ్మె రెండో రోజూ కొనసాగింది. ఏపీ వీఆర్ఏ జేఏసీ పిలుపు మేరకు టెంట్‌ ఏర్పాటు చేసి వీఆర్ఏలు ఆందోళన చేపట్టారు.

ప్రస్తుతం అందుతున్న సుమారు రూ.10 వేలతో కుటుంబాలను పోషించడం కష్టంగా ఉందని వారు ఆవేదన వ్యక్తం చేశారు. తమకు పేస్కేల్‌ అమలు చేయాలని, నామినీగా విధులు నిర్వహిస్తున్న వీఆర్వోలను రెగ్యులర్‌ చేయాలని డిమాండ్‌ చేశారు. ప్రమోషన్‌ కోటాను 30 శాతం నుంచి 70 శాతానికి పెంచడంతో పాటు, కారుణ్య నియామకాలను వెంటనే చేపట్టాలని కోరారు.

తమ సమస్యలపై ప్రభుత్వం మానవతా దృక్పథంతో స్పందించి తక్షణమే పరిష్కారం చూపాలని ముఖ్యమంత్రి, ఉప ముఖ్యమంత్రికి వీఆర్ఏలు విజ్ఞప్తి చేశారు. కాగా, గురువారం కూడా రాజోలు తహశీల్దార్‌ కార్యాలయ సిబ్బంది వీఆర్ఏల ఆందోళనకు సంఘీభావం తెలిపారు.