Kadiam: డ్రగ్స్‌కు దూరంగా ఉండాలి దుళ్లలో 'డ్రగ్స్ వద్దు బ్రో' కార్యక్రమం!

కడియం: కడియం మండలం యువత మాదకద్రవ్యాలకు దూరంగా ఉండి, ఆరోగ్యకరమైన జీవితాన్ని అలవర్చుకోవాలని పోలీసులు సూచించారు. కడియం మండలం దుళ్ల గ్రామంలో ‘డ్రగ్స్ వద్దు బ్రో’ కార్యక్రమం నిర్వహించారు. ఈ సందర్భంగా యువతకు మాదకద్రవ్యాల వినియోగం వల్ల కలిగే అనర్థాలు, వాటి ప్రభావం వ్యక్తిగత జీవితం, కుటుంబం, సమాజంపై ఎలా ఉంటుందనే అంశాలపై అవగాహన కల్పించారు.

డ్రగ్స్‌కు అలవాటు పడటం వల్ల యువత భవిష్యత్తు దెబ్బతినే ప్రమాదం ఉందని, చెడు వ్యసనాలకు ఆకర్షితులు కాకుండా లక్ష్యంపై దృష్టి సారించాలని పోలీసులు సూచించారు. స్నేహితుల ఒత్తిడితోనో, సరదా కోసమో మాదకద్రవ్యాల జోలికి వెళ్లవద్దని తెలిపారు. డ్రగ్స్‌కు దూరంగా ఉంటూ చదువు, ఉద్యోగం, క్రీడలు, ఇతర సృజనాత్మక కార్యక్రమాలపై దృష్టి పెట్టాలని పిలుపునిచ్చారు.

డ్రగ్స్ రహిత సమాజ నిర్మాణంలో యువత కీలక పాత్ర పోషించాలని, మాదకద్రవ్యాల వినియోగానికి దూరంగా ఉండటంతో పాటు వాటి నివారణకు ప్రతి ఒక్కరూ బాధ్యతగా వ్యవహరించాలని పోలీసులు సూచించారు. ఈగల్ విభాగం ఆధ్వర్యంలో నిర్వహించిన అవగాహన కార్యక్రమంలో యువతకు మాదకద్రవ్యాల వల్ల కలిగే నష్టాలను వివరించారు.

ఈ కార్యక్రమంలో ఈగల్ సీఐ పి.వి. సూర్యమోహన్ రావు, సీఐ అల్లు వెంకటేశ్వరరావు, ఈగల్ ఎస్ఐ లోవరాజు, హెడ్ కానిస్టేబుళ్లు మధు, హెడ్ కానిస్టేబుల్ రమణ, కానిస్టేబుళ్లు నాయుడు, రాజుతో పాటు గ్రామ నాయకులు, యువత పాల్గొన్నారు.