Kothapeta: కొత్తపేట మండలంలో జోరుగా కూటమి అభ్యర్థుల ఎన్నికల ప్రచారం!

Kothapeta: కూటమి అభ్యర్థులే లక్ష్యంగా కొత్తపేట ఎమ్మెల్యే బండారు సత్యానందరావు, జనసేన ఇంచార్జ్ బండారు శ్రీనివాస్ బీజేపీ నాయకులు స్థానిక ఎన్నికల ప్రచారం నిర్వహించారు. కొత్తపేట మండలంలోని వాడపాలెం, వానపల్లి, బిళ్లకుర్రు, మోడెకుర్రు, గంటి, పలివెల, ఖండ్రిగ, కొత్తపేట, మందపల్లి గ్రామాల్లో ఎన్నికల ప్రచారం జోరుగా సాగింది. స్థానిక సంస్థల ఎన్నికల్లో కూటమి అభివృద్ధిని గెలుపు రాష్ట్ర అభివృద్ధికి మేలిమలుపుగా మారనుందని కొత్తపేట ఎమ్మెల్యే బండారు సత్యానందరావు వ్యాఖ్యానించారు.

ఈ సందర్భంగా ఎమ్మెల్యే మాట్లాడుతూ కొత్తపేట మండలంలోని జడ్పిటిసి స్థానం,22 ఎంపీటీసీ స్థానాలకు జరుగుతున్న ఎన్నికల్లో బీజేపీ,తెలుగుదేశం,జనసేన అభ్యర్థులను అత్యధిక మెజారిటీతో గెలిపించి రాష్ట్ర అభివృద్ధికి ప్రజలు చేయూతనందించాలన్నారు. గత రెండున్నర ఏళ్లలో కొత్తపేట మండలంలో జరిగిన అభివృద్ధి సంక్షేమ కార్యక్రమాలను ఆయన ప్రజలకు వివరించారు.

గ్రామ గ్రామాన అభివృద్ధి కార్యక్రమాలు పరుగులు పెడుతున్నాయన్నారు. గ్రామీణ అభివృద్ధికి ఉప ముఖ్యమంత్రి పవన్ కళ్యాణ్ ఎంతగానో కృషి చేస్తున్నారని ప్రశంసించారు. ఇక విపత్తుల నిర్వహణ అంశంలో దేశంలోనే ఉత్తమ నాయకుడిగా చంద్రబాబు నిలుస్తారని కొనియాడారు.

గతంలో విశాఖను కుదిపేసిన హుదూద్ తుపాను మొదలుకుని, మొన్నటి విజయవాడ వరదల వరకు ఆయన ప్రదర్శించిన విపత్తు నిర్వహణ తీరు దేశానికే ఆదర్శం అన్నారు. తాజాగా రాష్ట్రాన్ని వణికించిన అర్నబ్ తుపాను వేళ కూడా చంద్రబాబు యావత్ అధికార యంత్రాంగాన్ని యుద్ధప్రాతిపదికన నడిపించి తుపాను తీరం తాకకముందే వేలాది మందికి సహాయక పునరావాస కేంద్రాలను సిద్ధం చేసి, లోతట్టు, తీరప్రాంత ప్రజలను సురక్షిత ప్రాంతాలకు తరలించడం ద్వారా అతి తక్కువ ప్రాణ, ఆస్తి నష్టాలతో విపత్తును ఎదుర్కొన్నారన్నారు.

తుపాను విరుచుకుపడిన రాత్రంతా నిద్రలేకుండా కలెక్టర్లు అధికారులతో సమన్వయం చేసుకుంటూ తుఫాను వల్ల ఎక్కువగా ప్రాణ నష్టం లేకుండా ప్రజల్ని కాపాడగలిగారన్నారు. వైసీపీ హయాంలో విపత్తులు సంభవించినప్పుడు కనీసం పట్టించుకునే నాధుడే ఉండేవాడు కాదన్నారు. సెట్టింగులు వేసి బాధితులను పరామర్శించిన సందర్భాలు కూడా ఉన్నాయని ఆనాటి రోజులను గుర్తు చేశారు. సంక్షోభాలు ఎదురైనప్పుడే నాయకుడి ప్రతిభ బయటపడుతుందన్నారు. జగన్ పాలనలో అరాచకాలు, ఆర్థిక విధ్వంసాలతో రాష్ట్రం 20 ఏళ్లు వెనక్కి పోయిందన్నారు. అసలు జగన్ పాలనే రాష్ట్రానికి పెద్ద విపత్తుగా సంభవించిందన్నారు.

ఆ విపత్తు నుంచి కోలుకోవడానికి రెండున్నర ఏళ్ల కాలం పట్టిందన్నారు. ఎన్నికల ముందు ఇచ్చిన ప్రతి హామీని కూటమి ప్రభుత్వం ఒక్కొక్కటిగా అమలు చేస్తూ వస్తుందన్నారు. సంక్షేమం, అభివృద్ధి జోడెడ్లుగా పాలన సాగుతుందన్నారు. స్థానిక సంస్థల ఎన్నికల్లో కూటమి అభ్యర్థులు విజయం సాధించడం ద్వారా రాష్ట్రంలో ట్రిపుల్ ఇంజన్ సర్కార్ నడవాలన్నారు. కొత్తపేట జడ్పిటిసి అభ్యర్థి యెలిశెట్టి రామకృష్ణతో పాటు … ఎంపీటీసీ స్థానాల్లో అత్యధిక మెజారిటీతో కూటమి అభ్యర్థులను గెలిపించాలని ప్రజలకు విజ్ఞప్తి చేశారు.