Konaseema: సఖినేటిపల్లి మండలం వి.వి.మెరకలో ఉచిత మెగా డెంటల్ క్యాంప్!

Konaseema: ప్రతి ఒక్కరికీ దంత సమస్యలను తొలగించి, మెరుగైన ఆరోగ్యాన్ని అందించడమే ఉచిత మెగా డెంటల్ క్యాంప్ ముఖ్య ఉద్దేశమని నిర్వాహకులు తెలిపారు.

డాక్టర్ బి.ఆర్. అంబేడ్కర్ కోనసీమ జిల్లా, రాజోలు నియోజకవర్గం, సఖినేటిపల్లి మండలం ఉయ్యూరు వారి మెరక గ్రామంలోని NCC కాలనీలో ఉచిత మెగా డెంటల్ క్యాంప్‌ను నిర్వహించారు. NCC చైర్మన్ ఏవీఎస్ రాజు గారి ఆదేశాల మేరకు ఏర్పాటు చేసిన ఈ వైద్య శిబిరంలో గ్రామస్థులకు ఉచితంగా దంత పరీక్షలు నిర్వహించారు. దంత సమస్యలతో బాధపడుతున్న వారికి వైద్యులు అవసరమైన సూచనలు, సలహాలు అందించారు. దంత ఆరోగ్యంపై ప్రజల్లో అవగాహన కల్పించడంతో పాటు, నోటి ఆరోగ్య పరిరక్షణకు తీసుకోవాల్సిన జాగ్రత్తలను వివరించారు.

42 గ్రామాల్లో ఉచిత వైద్య సేవలు

గ్లోబల్ ఫౌండేషన్, యూఎస్ఏ చైర్మన్ భూపతిరాజు పండిట్ గారి సహకారంతో సుమారు 42 గ్రామాల్లో కంటి, దంత, క్యాన్సర్ సంబంధిత పరీక్షలను ఉచితంగా నిర్వహిస్తున్నట్లు నిర్వాహకులు తెలిపారు. గ్రామీణ ప్రాంతాల్లోని ప్రజలకు నాణ్యమైన వైద్య సేవలను అందుబాటులోకి తీసుకురావడంతో పాటు, వ్యాధులను ముందస్తుగా గుర్తించి తగిన వైద్య సూచనలు అందించడమే లక్ష్యంగా ఈ కార్యక్రమాలను చేపడుతున్నట్లు పేర్కొన్నారు.

ఆరోగ్య సమస్యలను నిర్లక్ష్యం చేయకుండా ఎప్పటికప్పుడు వైద్య పరీక్షలు చేయించుకోవాలని, ముఖ్యంగా దంత సమస్యలు ప్రారంభ దశలోనే గుర్తించి చికిత్స పొందాలని సూచించారు. ఆర్థికంగా వెనుకబడిన కుటుంబాలకు ఉచిత వైద్య శిబిరాలు ఎంతగానో ఉపయోగపడుతున్నాయని తెలిపారు. ప్రజలు ఈ అవకాశాన్ని సద్వినియోగం చేసుకుని తమ ఆరోగ్యాన్ని కాపాడుకోవాలని నిర్వాహకులు కోరారు.

ఈ కార్యక్రమంలో వెంకట రామరాజు, జంపన బుజ్జిరాజు, అల్లూరి కృష్ణంరాజు, రంగరాజు, గాంధీరాజు, నరసింహరాజు తదితరులు, గ్రామస్తులు పాల్గొన్నారు.