Razole: ‘నో యూపీఐ డే’ నిరసన ఉపసంహరణ: ఐమ్రా ప్రకటన

రాజోలు: అఖిల భారత మొబైల్ రిటైలర్స్ అసోసియేషన్ (AIMRA) అక్టోబర్ 2న చేపట్టాలని నిర్ణయించిన దేశవ్యాప్త ‘నో యూపీఐ డే’ నిరసన కార్యక్రమాన్ని ఉపసంహరించుకుంది. దీంతో రేపు రిటైల్ దుకాణాల్లో యూపీఐ చెల్లింపులపై ఎలాంటి నిరసన ఉండదని, వినియోగదారులు యథావిధిగా డిజిటల్ పేమెంట్స్ చేసుకోవచ్చని సంఘం ప్రతినిధులు తెలిపారు.

కేంద్ర ప్రభుత్వం రూ.2,000 కంటే ఎక్కువ విలువైన వ్యాపార లావాదేవీలపై 0.4 శాతం మర్చంట్ డిస్కౌంట్ రేట్ (MDR) చార్జీలు విధించాలని ప్రతిపాదించిన నేపథ్యంలో చిన్న, మధ్య తరహా వ్యాపారాలపై ఆర్థిక భారం పెరుగుతుందని వ్యాపార సంఘాలు ఆందోళన వ్యక్తం చేశాయి. దీనికి నిరసనగా అక్టోబర్ 2న క్యూఆర్ కోడ్‌లపై నల్లటి వస్త్రాలు కప్పి, కేవలం నగదు చెల్లింపులను మాత్రమే స్వీకరించాలని AIMRA, AICPDF పిలుపునిచ్చాయి.

ఈ నేపథ్యంలో సెప్టెంబర్ 30న వ్యాపార ప్రతినిధుల బృందం న్యూఢిల్లీలో కేంద్ర ఆర్థిక మంత్రి నిర్మలా సీతారామన్‌ను కలిసి తమ సమస్యలను వివరించింది. వ్యాపారుల ఆందోళనలను సానుకూలంగా పరిశీలిస్తామని కేంద్ర మంత్రి హామీ ఇచ్చినట్లు ప్రతినిధులు తెలిపారు.

ఈ పరిణామాల నేపథ్యంలో అక్టోబర్ 2న నిర్వహించాల్సిన ‘నో యూపీఐ డే’ నిరసనను పూర్తిగా ఉపసంహరించుకున్నట్లు AIMRA ప్రకటించింది. దీంతో రిటైల్ దుకాణాల్లో యూపీఐ, ఇతర డిజిటల్ చెల్లింపుల సేవలు సాధారణంగానే కొనసాగనున్నాయి.