OTT Releases October : అక్టోబర్‌లో ఓటీటీ ఫుల్ జాతర.. ఇవి మిస్ కావొద్దు

ఓటీటీ ప్రేక్షకులకు అక్టోబర్ నెల ఫుల్ ఎంటర్‌టైన్‌మెంట్ ఇవ్వబోతోంది. కొత్త సీజన్లు, చాలాకాలంగా విడుదల కోసం ఎదురుచూస్తున్న సినిమాలు, రీజినల్ మూవీస్‌తో పాటు ఇంటర్నేషనల్ సిరీస్‌లు కూడా ఈ నెలలో మన హోమ్ స్క్రీన్‌పై సందడి చేయనున్నాయి. కామెడీ, యాక్షన్, రొమాన్స్, థ్రిల్లర్, స్పోర్ట్స్ డ్రామా ఇలా విభిన్న జానర్లలో సినిమాలు, సిరీస్‌లు స్ట్రీమింగ్‌కు సిద్ధమయ్యాయి.

అక్టోబర్ 1న అదిరిపోయే లైనప్

అక్టోబర్ 1 నుంచే ఓటీటీల్లో సందడి మొదలుకానుంది. ప్రైమ్ వీడియోలో ‘దుపాహియా సీజన్ 2’ స్ట్రీమింగ్ కానుంది. ధడక్‌పూర్ నేపథ్యంగా సాగే ఈ లైట్‌హార్టెడ్ కామెడీకి రెండో సీజన్‌లో గజరాజ్ రావు, స్పర్శ్ శ్రీవాస్తవ, భువన్ అరోరా, శివానీ రఘువంశీ మరోసారి అలరించనున్నారు. సోనం నాయర్ దర్శకత్వంలో తెరకెక్కిన ఈ సీజన్‌లో గతంలో కంటే మరింత గందరగోళం, కామెడీ ఉండనున్నట్లు తెలుస్తోంది. అదే రోజున నెట్‌ఫ్లిక్స్‌లో ‘ఓహ్ మై డాగ్’ కూడా రానుంది. పంకజ్ త్రిపాఠి, పవన్ మల్హోత్రా ప్రధాన పాత్రల్లో నటించిన ఈ ఇన్వెస్టిగేటివ్ కామెడీ డ్రామా ఓ కుక్క, ఓ చిన్నారి మిస్సింగ్ చుట్టూ తిరుగుతుంది. ‘ఓహ్ మై గాడ్ 2’ దర్శకుడు అమిత్ రాయ్ ఈ సినిమాను తెరకెక్కించారు.

నెట్‌ఫ్లిక్స్‌లోనే ‘చుంబక్ సీజన్ 2’ కూడా అక్టోబర్ 1న స్ట్రీమింగ్‌కు రానుంది. చుంబక్ కాలనీకి చెందిన పాత్రలు మరోసారి తమ కామెడీతో ప్రేక్షకులను నవ్వించేందుకు సిద్ధమయ్యాయి. నీనా గుప్తా కీలక పాత్రలో నటించిన ఈ సిరీస్‌కు అతీష్ కపాడియా దర్శకత్వం వహించారు. దేవెన్ భోజాని, మానసి పరేఖ్, సుమీత్ వ్యాస్, సుమీత్ రాఘవన్ తదితరులు ఇందులో కనిపించనున్నారు. ఇక కార్తీ అభిమానులకు కూడా అదే రోజు ట్రీట్ ఉంది. ‘సర్దార్ 2’ ప్రైమ్ వీడియోలో స్ట్రీమింగ్ కానుంది. ‘సర్దార్’ ఫ్రాంచైజీలో భాగంగా వస్తున్న ఈ సీక్వెల్‌లో కార్తీ మరోసారి యాక్షన్, మిస్టరీతో కూడిన కథలో కనిపించనున్నారు.

అక్టోబర్ 2న రొమాన్స్, డ్రామా

అక్టోబర్ 2న కూడా ఓటీటీల్లో ఆసక్తికరమైన సినిమాలు రానున్నాయి. జీ5లో ‘పూజా మేరీ జాన్’ స్ట్రీమింగ్ కానుంది. మృణాల్ ఠాకూర్, హుమా ఖురేషీ ప్రధాన పాత్రల్లో నటించిన ఈ కోర్ట్‌రూమ్ డ్రామా ఓ మహిళ జీవితాన్ని అనూహ్యంగా మార్చేసే పరిణామాల చుట్టూ సాగుతుంది. నవజ్యోత్ గులాటి దర్శకత్వం వహించిన ఈ సినిమా చాలాకాలంగా విడుదల కోసం ఎదురుచూస్తోంది. అదే రోజు జియోహాట్‌స్టార్‌లో మలయాళ చిత్రం ‘బెత్లెహెమ్ కుడుంబ యూనిట్’ ప్రేక్షకుల ముందుకు రానుంది. నివిన్ పౌలీ, మమితా బైజు నటించిన ఈ సినిమాలో భిన్న వయసుల మధ్య ప్రేమకథను ఆసక్తికరంగా చూపించనున్నారు. ఇక నెట్‌ఫ్లిక్స్‌లో ‘#లవ్’ స్ట్రీమింగ్ కానుంది. ఐశ్వర్య లక్ష్మి, అర్జున్ దాస్ ప్రధాన పాత్రల్లో నటించిన ఈ తమిళ రొమాంటిక్ డ్రామాలో ఇద్దరు ప్రత్యర్థి డేటింగ్ యాప్ ఫౌండర్లు ప్రేమపై తమ సిద్ధాంతాలను పరీక్షించుకునేందుకు 60 రోజుల ఛాలెంజ్‌లోకి దిగుతారు. బాలాజీ మోహన్ ఈ సినిమాకు దర్శకత్వం వహించారు.

థ్రిల్లర్‌లకు అక్టోబర్ 9

అక్టోబర్ 9న నెట్‌ఫ్లిక్స్‌లో ‘రిపోర్టింగ్ లైవ్’ రానుంది. పరిణీతి చోప్రా ప్రధాన పాత్రలో నటించిన ఈ ఇన్వెస్టిగేటివ్ థ్రిల్లర్ అక్రమ ఇసుక తవ్వకాల నేపథ్యంలో సాగుతుంది. ధ్రువ్ త్రిపాఠి దర్శకత్వం వహించిన ఈ సినిమాలో అమోల్ పాలేకర్, అదిల్ హుస్సేన్, దేవెన్ భోజాని, శేఖర్ సుమన్ తదితరులు కీలక పాత్రల్లో నటించారు. అదే రోజు నెట్‌ఫ్లిక్స్‌లో తమిళ స్పోర్ట్స్ డ్రామా ‘మందాడి’ కూడా స్ట్రీమింగ్‌కు రానుంది. సూరి ప్రధాన పాత్రలో నటించిన ఈ సినిమా సాంప్రదాయ పడవ పందేలు, తీర ప్రాంత ప్రజల జీవన విధానం చుట్టూ సాగుతుంది. మతిమారన్ పుగళేంధి దర్శకత్వంలో తెరకెక్కిన ఈ మూవీలో స్పోర్ట్స్ థ్రిల్‌తో పాటు ఎమోషనల్ అంశాలు కూడా ఉండనున్నాయి.

లుపిన్ పార్ట్ 4తో మరోసారి థ్రిల్

అక్టోబర్ 23న నెట్‌ఫ్లిక్స్‌లో ‘లుపిన్ పార్ట్ 4’ స్ట్రీమింగ్ కానుంది. ఒమర్ సై మరోసారి అసానే డియోప్ పాత్రలో కనిపించనున్నారు. అసానే జైలులో ఉన్న సమయంలో అతడి పేరుతో వరుసగా మ్యూజియం దొంగతనాలు జరగడంతో కథ మరింత ఆసక్తికరంగా మారుతుంది. తనపై వచ్చిన ఆరోపణలను తొలగించుకోవడంతో పాటు జైలు నుంచి బయటపడేందుకు అసానే చేసే ప్రయత్నాలు ఈ కొత్త పార్ట్‌లో కీలకంగా ఉండనున్నాయి.

ఓటీటీ లవర్స్‌కు ఫుల్ ప్యాకేజీ

మొత్తంగా చూస్తే అక్టోబర్ నెలలో ఓటీటీ ప్లాట్‌ఫామ్‌లు విభిన్న జానర్ల కంటెంట్‌తో ప్రేక్షకులను అలరించేందుకు సిద్ధమయ్యాయి. కామెడీ నుంచి రొమాన్స్ వరకు, యాక్షన్ నుంచి ఇన్వెస్టిగేటివ్ థ్రిల్లర్ వరకు ప్రతి రకమైన ప్రేక్షకుడికి నచ్చే కంటెంట్ ఈ నెలలో అందుబాటులోకి రానుంది. ముఖ్యంగా అక్టోబర్ మొదటి వారంలోనే వరుస రిలీజ్‌లు ఉండటంతో ఓటీటీ లవర్స్‌కు ఈ నెల మరింత స్పెషల్‌గా మారనుంది.