Pedda Dornala: ప్రభుత్వ ఆసుపత్రిలో విద్యుత్ సమస్య.. ఇబ్బందుల్లో రోగులు!

Pedda Dornala: మార్కాపురం జిల్లా పెద్ద దోర్నాల ప్రభుత్వ వైద్యశాలలో గత రెండు రోజులుగా విద్యుత్ సరఫరా లేకపోవడంతో వైద్యం కోసం వచ్చిన రోగులు తీవ్ర ఇబ్బందులు ఎదుర్కొంటున్నారు. ముఖ్యంగా బాలింతలు, చంటి పిల్లలతో వచ్చిన మహిళలు విద్యుత్ సౌకర్యం లేక అవస్థలు పడుతున్నట్లు రోగుల బంధువులు ఆవేదన వ్యక్తం చేస్తున్నారు.

వైద్యశాలలో విద్యుత్ సరఫరా నిలిచిపోయిన సమయంలో ప్రత్యామ్నాయంగా వినియోగించేందుకు జనరేటర్ సౌకర్యం లేకపోవడంతో రోగులకు ఇబ్బందులు మరింత పెరుగుతున్నాయని వారు చెబుతున్నారు. వేసవి ఉక్కపోతతో పాటు విద్యుత్ లేకపోవడంతో వార్డుల్లో ఉన్న రోగులు, వారి సహాయకులు అసౌకర్యానికి గురవుతున్నారు.

ప్రభుత్వ వైద్యశాలలో విద్యుత్‌తో పాటు అవసరమైన మౌలిక సదుపాయాలు కల్పించాలని ప్రజలు కోరుతున్నారు. ఈ సమస్యలపై ప్రభుత్వ వైద్యశాల సూపరింటెండెంట్ నాగమహేశ్వరికి పలుమార్లు తెలియజేసినప్పటికీ, సమస్యలు ఉన్నతాధికారుల దృష్టికి తీసుకెళ్లి శాశ్వత పరిష్కారం చూపాల్సిన అవసరం ఉందని స్థానికులు పేర్కొంటున్నారు.

గ్రామీణ ప్రాంతాల నుంచి వైద్యం కోసం ప్రతిరోజూ పలువురు రోగులు పెద్ద దోర్నాల ప్రభుత్వ వైద్యశాలకు వస్తుంటారు. ఇటువంటి పరిస్థితుల్లో విద్యుత్ సరఫరా నిలిచిపోవడంతో వైద్య సేవలకు అంతరాయం కలగకుండా ప్రత్యామ్నాయ విద్యుత్ సౌకర్యం ఏర్పాటు చేయాల్సిన అవసరం ఉందని ప్రజలు అంటున్నారు.

ఉన్నతాధికారులు వెంటనే స్పందించి పెద్ద దోర్నాల ప్రభుత్వ వైద్యశాలలో విద్యుత్ సమస్యను పరిష్కరించడంతో పాటు జనరేటర్, ఇతర అవసరమైన మౌలిక సదుపాయాలు ఏర్పాటు చేయాలని ప్రజలు కోరుతున్నారు.