Kondapi: కొండేపి నియోజకవర్గంలో పంచాయతీ ఎన్నికల సందడి.. 54 స్థానాల్లో పోరు!

Kondapi: కొండేపి నియోజకవర్గంలోని ఆరు మండలాల్లో 55 పంచాయతీలు ఏకగ్రీవం కాగా, మిగిలిన 54 గ్రామ పంచాయతీల్లో ఎన్నికల సందడి నెలకొంది.

Ram Mohan, Singarayakonda
Published on: 22 Nov 2026 3:06 PM IST
Kondapi
X

Kondapi: కొండేపి నియోజకవర్గంలో పంచాయతీ ఎన్నికల సందడి.. 54 స్థానాల్లో పోరు!

కొండేపి: కొండేపి నియోజకవర్గంలో గ్రామ పంచాయతీ ఎన్నికలకు రంగం సిద్ధమవుతోంది. నియోజకవర్గ పరిధిలోని ఆరు మండలాల్లో పంచాయతీ ఎన్నికలపై రాజకీయ సందడి నెలకొంది. మొత్తం 54 గ్రామ పంచాయతీల్లో ఎన్నికలు జరగనుండగా, మిగిలిన పంచాయతీల్లో ఏకగ్రీవ ఎన్నికలు పూర్తయ్యాయి. దీంతో ఎన్నికలు జరగనున్న గ్రామాల్లో సర్పంచ్ అభ్యర్థులు, రాజకీయ నాయకులు ప్రచారానికి సిద్ధమవుతున్నారు.

నియోజకవర్గ పరిధిలోని కొండేపి, జరుగుమల్లి, టంగుటూరు, సింగరాయకొండ, పొన్నలూరు, మర్రిపూడి మండలాల్లో పంచాయతీల వారీగా ఎన్నికల పరిస్థితి భిన్నంగా ఉంది. కొన్ని మండలాల్లో అత్యధిక పంచాయతీలు ఏకగ్రీవం కాగా, మరికొన్ని మండలాల్లో ఎక్కువ పంచాయతీలకు ఎన్నికలు జరగనున్నాయి.

మండలాల వారీగా ఎన్నికల పరిస్థితి ఇలా ఉంది..

కొండేపి మండలం: మండల పరిధిలో మొత్తం 18 గ్రామ పంచాయతీలు ఉండగా, వాటిలో 9 పంచాయతీలు ఏకగ్రీవమయ్యాయి. మిగిలిన 9 పంచాయతీలకు ఎన్నికలు జరగనున్నాయి.

జరుగుమల్లి మండలం: మొత్తం 20 గ్రామ పంచాయతీలకు గాను 10 పంచాయతీలు ఏకగ్రీవమయ్యాయి. మరో 10 పంచాయతీల్లో ఎన్నికలు నిర్వహించనున్నారు.

టంగుటూరు మండలం: మొత్తం 18 గ్రామ పంచాయతీల్లో కేవలం 4 పంచాయతీలే ఏకగ్రీవమయ్యాయి. మిగిలిన 14 పంచాయతీలకు ఎన్నికలు జరగనున్నాయి. ఆరు మండలాల్లో అత్యధిక పంచాయతీలకు ఎన్నికలు జరిగేది ఈ మండలంలోనే కావడం గమనార్హం.

సింగరాయకొండ మండలం: మండల పరిధిలో మొత్తం 10 గ్రామ పంచాయతీలు ఉండగా, 3 పంచాయతీలు ఏకగ్రీవమయ్యాయి. మిగిలిన 7 పంచాయతీలకు ఎన్నికలు జరగనున్నాయి.

పొన్నలూరు మండలం: మొత్తం 22 గ్రామ పంచాయతీలకు గాను 12 పంచాయతీలు ఏకగ్రీవమయ్యాయి. మరో 10 పంచాయతీల్లో ఎన్నికలు జరగనున్నాయి.

మర్రిపూడి మండలం: మొత్తం 21 గ్రామ పంచాయతీల్లో 17 పంచాయతీలు ఏకగ్రీవమయ్యాయి. కేవలం 4 పంచాయతీలకు మాత్రమే ఎన్నికలు జరగనున్నాయి. ఆరు మండలాల్లో అత్యధిక పంచాయతీలు ఏకగ్రీవమైన మండలంగా మర్రిపూడి నిలిచింది.

ఎన్నికల బరిలో అభ్యర్థులు.. గ్రామాల్లో రాజకీయ సందడి!

మొత్తంగా కొండేపి నియోజకవర్గంలోని ఆరు మండలాల్లో 54 గ్రామ పంచాయతీలకు ఎన్నికలు జరగనున్న నేపథ్యంలో గ్రామాల్లో రాజకీయ వాతావరణం వేడెక్కుతోంది. సర్పంచ్ పదవులను దక్కించుకునేందుకు ఆశావహులు ప్రయత్నాలు ముమ్మరం చేస్తున్నారు. ఏకగ్రీవమైన పంచాయతీల్లో ఇప్పటికే అభ్యర్థుల ఎంపిక పూర్తికాగా, ఎన్నికలు జరిగే గ్రామాల్లో పోటీ ఆసక్తికరంగా మారనుంది. గ్రామాల్లో స్థానిక సమీకరణాలు, అభ్యర్థుల బలాబలాలు, రాజకీయ పార్టీల మద్దతు ఎన్నికల ఫలితాలపై ప్రభావం చూపనున్నాయి. దీంతో కొండేపి నియోజకవర్గంలో పంచాయతీ ఎన్నికలపై సర్వత్రా ఆసక్తి నెలకొంది.

Ram Mohan, Singarayakonda

Ram Mohan, Singarayakonda