Ongole: కౌంటింగ్ కేంద్రంలో అప్రమత్తంగా ఉండాలి ఎమ్మెల్యే దామచర్ల

ఒంగోలు: ఒంగోలు నగరపాలక సంస్థ ఎన్నికల కౌంటింగ్ నేపథ్యంలో ఎన్డీఏ కూటమి కార్పొరేటర్ అభ్యర్థులు, వారి కౌంటింగ్ ఏజెంట్లు పూర్తి అప్రమత్తతతో వ్యవహరించాలని ఒంగోలు ఎమ్మెల్యే దామచర్ల జనార్దన్ సూచించారు. కౌంటింగ్ కేంద్రంలో ఎలాంటి అవాంఛనీయ సంఘటనలకు తావులేకుండా సహనంతో, సంయమనంతో వ్యవహరించాలని పిలుపునిచ్చారు.

ఒంగోలు నగరంలోని తెలుగుదేశం పార్టీ కార్యాలయంలో సోమవారం ఉదయం ఎన్డీఏ కూటమి కార్పొరేటర్ అభ్యర్థులతో ఎమ్మెల్యే దామచర్ల జనార్దన్ సమీక్షా సమావేశం నిర్వహించారు. ఈ సందర్భంగా కౌంటింగ్ ప్రక్రియలో అభ్యర్థులు, వారి ఏజెంట్లు తీసుకోవాల్సిన జాగ్రత్తలు, ఓట్ల లెక్కింపును పరిశీలించాల్సిన అంశాలు, ఎన్నికల నిబంధనలను పాటించాల్సిన విధానాలపై దిశానిర్దేశం చేశారు.

ప్రతి డివిజన్‌కు సంబంధించిన ఓట్ల లెక్కింపును అభ్యర్థులు, కౌంటింగ్ ఏజెంట్లు నిశితంగా పరిశీలించాలని ఎమ్మెల్యే సూచించారు. ఓట్ల లెక్కింపులో ఏవైనా సందేహాలు లేదా అభ్యంతరాలు ఉంటే వెంటనే ఎన్నికల అధికారుల దృష్టికి తీసుకెళ్లాలని తెలిపారు. ఎన్నికల అధికారుల సూచనలు, నిబంధనలకు అనుగుణంగా వ్యవహరించాలని స్పష్టం చేశారు.

ఎన్నికల ఫలితాల విషయంలో తొందరపాటు నిర్ణయాలకు తావివ్వకుండా, తుది ఫలితాలు వెలువడే వరకు అప్రమత్తంగా ఉండాలని కోరారు. కౌంటింగ్ కేంద్రంలో కూటమి అభ్యర్థులు, నాయకులు, కార్యకర్తలు సమన్వయంతో వ్యవహరించాలని, ప్రజాస్వామ్యబద్ధంగా జరిగే ఎన్నికల ప్రక్రియపై విశ్వాసం ఉంచాలని పేర్కొన్నారు.

ఈ సమావేశంలో జనసేన పార్టీ నాయకుడు కంది రవి శంకర్, ఎన్డీఏ కూటమి మేయర్ అభ్యర్థి నల్లమల్లి శ్రీశిల్ప, బీజేపీ జిల్లా అధ్యక్షుడు సెగ్గం శ్రీనివాసరావు, టీడీపీ క్లస్టర్ కన్వీనర్లు, ఎన్డీఏ కూటమి కార్పొరేటర్ అభ్యర్థులు తదితరులు పాల్గొన్నారు.