Podili: ఉప్పలపాడులో ఘనంగా పోషణ మాసోత్సవం!

Podili: పొదిలి ప్రాజెక్టు పరిధిలోని ఉప్పలపాడు అంగన్‌వాడీ కేంద్రంలో పోషణ మాసోత్సవం, అంగన్‌వాడీ ఉత్సవ కార్యక్రమాలను ఘనంగా నిర్వహించారు. సీడీపీఓ సుధా మారుతి ఆధ్వర్యంలో జరిగిన ఈ కార్యక్రమంలో చిన్నారుల పోషణ, ఆరోగ్యం, ప్రీ-స్కూల్ విద్యా కార్యకలాపాలపై తల్లులకు అవగాహన కల్పించారు.

ఈ సందర్భంగా సీడీపీఓ సుధా మారుతి మాట్లాడుతూ చిన్నారుల ఆరోగ్యకరమైన ఎదుగుదలకు పోషకాహారం ఎంతో కీలకమని తెలిపారు. స్థానికంగా సులభంగా లభించే ఆహార పదార్థాలతో తక్కువ ఖర్చుతోనే పౌష్టికాహారాన్ని తయారు చేసి పిల్లలకు అందించాలని తల్లులకు సూచించారు. చిన్నారులకు చిన్న వయస్సు నుంచే పోషకాహారం అందించడంతో పాటు ఆరోగ్యకరమైన ఆహారపు అలవాట్లను అలవరచాలని సూచించారు.

పిల్లల్లో పోషణపై అవగాహన పెంపొందించడం ద్వారా ఆరోగ్యకరమైన కుటుంబంతో పాటు ఆరోగ్యవంతమైన సమాజాన్ని నిర్మించేందుకు ప్రతి ఒక్కరూ కృషి చేయాలని ఆమె కోరారు. ప్రభుత్వం అమలు చేస్తున్న ప్రధానమంత్రి మాతృ వందన యోజన (PMMVY) పథకం ద్వారా అర్హులైన లబ్ధిదారులకు అందుతున్న ఆర్థిక సహాయం, పథకం ద్వారా పొందే ప్రయోజనాలను వివరించారు.

అంగన్‌వాడీ కేంద్రాల్లో నిర్వహిస్తున్న ప్రీ-స్కూల్ కార్యకలాపాల ప్రాధాన్యతను కూడా సీడీపీఓ వివరించారు. చిన్నారుల్లో విద్యపై ఆసక్తి, సృజనాత్మకత, సామాజిక నైపుణ్యాలను పెంపొందించేందుకు అంగన్‌వాడీ కేంద్రాలు కీలక పాత్ర పోషిస్తున్నాయని తెలిపారు.

అంగన్‌వాడీ ఉత్సవంలో భాగంగా చిన్నారుల సంరక్షణ, పోషణ, విద్య కోసం సేవలందిస్తున్న అంగన్‌వాడీ కార్యకర్తలు, హెల్పర్లను సీడీపీఓ సుధా మారుతి అభినందించి సత్కరించారు.

కార్యక్రమంలో సూపర్‌వైజర్ ప్రసన్న, అంగన్‌వాడీ కార్యకర్తలు పుష్ప, తిరుపతమ్మ, హెల్పర్లు, ఏఎన్‌ఎం, ఆశా కార్యకర్తలు, తల్లులు తదితరులు పాల్గొన్నారు.