Konakanamitla: ప్రశాంత ఎన్నికల నిర్వహణే లక్ష్యంగా పోలీసుల కవాతు!

కొనకనమిట్ల: రానున్న ఎంపీటీసీ, జడ్పీటీసీ ఎన్నికల నేపథ్యంలో ఎలాంటి అవాంఛనీయ సంఘటనలకు తావులేకుండా ప్రశాంత వాతావరణంలో ఎన్నికలు నిర్వహించేందుకు పోలీసులు చర్యలు చేపట్టారు. ఇందులో భాగంగా మార్కాపురం జిల్లా పరిధిలోని కొనకనమిట్ల మండలంలోని సమస్యాత్మక గ్రామంగా గుర్తించిన కొనకనమిట్ల గ్రామంలో పోలీస్ బలగాలతో కవాతు నిర్వహించారు.

కనిగిరి డీఎస్పీ ఎం. శ్రీనివాసరావు, పొదిలి సీఐ రాజేష్ సమక్షంలో పోలీసు సిబ్బంది గ్రామంలోని ప్రధాన వీధుల్లో కవాతు నిర్వహించారు. ఎన్నికల సమయంలో శాంతిభద్రతలకు విఘాతం కలిగించే చర్యలకు పాల్పడితే కఠిన చర్యలు తీసుకుంటామని పోలీసులు హెచ్చరించారు.

ఎన్నికల ప్రక్రియ ప్రశాంతంగా, పారదర్శకంగా జరిగేలా ప్రజలు, రాజకీయ పార్టీలు, అభ్యర్థులు పోలీసులకు సహకరించాలని అధికారులు సూచించారు. ఓటర్లు ఎలాంటి భయాందోళనలకు గురికావాల్సిన అవసరం లేదని, స్వేచ్ఛగా తమ ఓటు హక్కును వినియోగించుకోవచ్చని తెలిపారు.

ఈ కవాతులో పోలీసు అధికారులు, సిబ్బంది పెద్ద సంఖ్యలో పాల్గొన్నారు. సమస్యాత్మక గ్రామాల్లో పోలీసుల కవాతు ద్వారా ప్రజల్లో భద్రతా భావాన్ని కల్పించడంతో పాటు ఎన్నికల సమయంలో ఎలాంటి అవాంఛనీయ ఘటనలు చోటుచేసుకోకుండా ముందస్తు చర్యలు చేపడుతున్నట్లు అధికారులు తెలిపారు.