Markapuram: మార్కాపురంలో వైఎస్సార్‌సీపీ ఇంటింటి ప్రచారం హోరెత్తింది!

Markapuram: మున్సిపల్ ఎన్నికల ప్రచారంలో భాగంగా మార్కాపురం మున్సిపాలిటీలోని 04, 06వ వార్డుల్లో వైఎస్సార్‌సీపీ నాయకులు ఇంటింటి ప్రచారం నిర్వహించారు. వైఎస్సార్‌సీపీ నియోజకవర్గ ఇన్‌చార్జి అన్నా రాంబాబు, మున్సిపల్ చైర్‌పర్సన్ అభ్యర్థి డాక్టర్ కనకదుర్గతో కలిసి ఆయా వార్డుల్లో పర్యటిస్తూ ఓటర్లను కలుసుకున్నారు.

ఈ సందర్భంగా అన్నా రాంబాబు మాట్లాడుతూ, *ఎన్నికలు రాబోయే ఐదేళ్ల భవిష్యత్తును నిర్ణయించే ప్రజాతీర్పు* అని పేర్కొన్నారు. ప్రజలకు మంచి చేసే నాయకులను ఎన్నుకోవాలని సూచించారు. వైఎస్సార్‌సీపీ అభ్యర్థులను గెలిపిస్తే గత ప్రభుత్వ హయాంలో అందించిన తరహాలో సుపరిపాలన అందించేందుకు కృషి చేస్తామని తెలిపారు.

ఎన్నికల సమయంలో ప్రజలకు ఇచ్చిన హామీలన్నింటినీ అమలు చేస్తామని ఆయన వెల్లడించారు. ప్రజల సమస్యల పరిష్కారం, అభివృద్ధి, సంక్షేమమే లక్ష్యంగా పనిచేస్తామని పేర్కొన్నారు.

ఈ ఎన్నికల్లో ఫ్యాన్ గుర్తుకు ఓటు వేసి చైర్‌పర్సన్ అభ్యర్థి డాక్టర్ కనకదుర్గతో పాటు 04, 06వ వార్డుల కౌన్సిలర్ అభ్యర్థులను గెలిపించాలని అన్నా రాంబాబు ప్రజలను కోరారు. ఇంటింటి ప్రచారంలో వైఎస్సార్‌సీపీ నాయకులు, కార్యకర్తలు పాల్గొన్నారు.