Somasila: సోమశిల దక్షిణ కాలువలో రూ.10 కోట్ల పనులపై విజిలెన్స్ విచారణ జరపాలి

Somasila: సోమశిల ప్రాజెక్టు దక్షిణ కాలువ మరమ్మతుల కోసం కేటాయించిన రూ.10 కోట్ల నిధుల వినియోగంపై సమగ్ర విచారణ జరిపించాలని ఆంధ్రప్రదేశ్ వ్యవసాయ కార్మిక సంఘం జిల్లా అధ్యక్షుడు పి. లీలామోహన్ డిమాండ్ చేశారు. ఈ మేరకు జిల్లా జాయింట్ కలెక్టర్‌ను కలిసి వినతిపత్రం సమర్పించారు.

2025లో జరిగిన సాగునీటి సలహా సంఘం సమావేశంలో నాలుగో అంశంగా దక్షిణ కాలువకు4.7 టీఎంసీల నీటిని కేటాయించారని, తద్వారా సుమారు 48 వేల ఎకరాలకు సాగునీరు అందించారని లీలామోహన్ తెలిపారు. రైతులకు ఎలాంటి ఆటంకం లేకుండా కాలువలో నీరు ప్రవహిస్తూ, పంటలు సాగవుతున్న సమయంలో దక్షిణ కాలువ మరమ్మతుల పేరుతో రూ.10 కోట్ల విలువైన పనులు చేపట్టినట్లు చూపించడం పట్ల అనుమానాలు వ్యక్తమవుతున్నాయని పేర్కొన్నారు.

అసలు ఆ రూ.10 కోట్లతో ఎక్కడ పనులు చేపట్టారు? ఏయే పనులు చేశారు? ఎంత మేరకు పనులు పూర్తయ్యాయి? అనే అంశాలపై అధికారులు స్పష్టమైన వివరాలు వెల్లడించాలని ఆయన కోరారు. కాలువలో నీరు సక్రమంగా ప్రవహిస్తూ, వేలాది ఎకరాలకు సాగునీరు అందుతున్న పరిస్థితుల్లో మరమ్మతుల పేరుతో భారీగా నిధులు కేటాయించడంపై సమగ్రంగా పరిశీలించాల్సిన అవసరం ఉందన్నారు.

దక్షిణ కాలువ మరమ్మతుల కోసం కేటాయించిన నిధులపై విజిలెన్స్ విచారణ చేపట్టి, పనుల నాణ్యత, బిల్లులు, అంచనాలు, ఖర్చు చేసిన నిధులు తదితర అంశాలను పరిశీలించాలని లీలామోహన్ డిమాండ్ చేశారు. విచారణలో నిధుల దుర్వినియోగం లేదా అవకతవకలు జరిగినట్లు తేలితే బాధ్యులైన అధికారులు, సంబంధిత వ్యక్తులను గుర్తించి కఠిన చర్యలు తీసుకోవాలని కోరారు.

ప్రభుత్వ నిధులకు సంబంధించిన వ్యవహారం కావడంతో బాధ్యుల నుంచి నిధులను రికవరీ చేసి ప్రభుత్వ ఖజానాకు జమ చేయాలని, విచారణ పూర్తయ్యే వరకు సంబంధిత అధికారులపై శాఖాపరమైన చర్యలు తీసుకోవాలని ఆయన విజ్ఞప్తి చేశారు.

రైతుల ప్రయోజనాలకు సంబంధించిన సాగునీటి ప్రాజెక్టుల్లో ప్రభుత్వ నిధుల వినియోగం పారదర్శకంగా ఉండాలని, ప్రజాధనానికి జవాబుదారీతనం ఉండేలా ప్రభుత్వం చర్యలు తీసుకోవాలని లీలామోహన్ కోరారు.

ఈ కార్యక్రమంలో రైతు సంఘం జిల్లా అధ్యక్షుడు షేక్ షాన్వాజ్ తదితరులు పాల్గొన్నారు.