Gudur: లెక్కలు లేని బంగారం 100 కిలోల వెండి వెలుగులోకి గూడూరులో సోదాలు!

Gudur: నెల్లూరు జిల్లా గూడూరు పట్టణంలో బంగారు నగల దుకాణాల్లో విజిలెన్స్, వాణిజ్య పన్నుల శాఖ అధికారులు బుధవారం రాత్రి ఆకస్మిక సోదాలు నిర్వహించినట్లు సమాచారం. పట్టణంలోని రాజావీధిలో ఉన్న పలు ప్రముఖ నగల దుకాణాల్లో ఉదయం 11 గంటల నుంచి అధికారులు తనిఖీలు చేపట్టినట్లు తెలుస్తోంది.

నిబంధనల ప్రకారం ప్రభుత్వానికి చెల్లించాల్సిన పన్నులు, బంగారం కొనుగోలు–అమ్మకాలకు సంబంధించిన లావాదేవీల్లో అవకతవకలు జరిగాయన్న సమాచారంతో అధికారులు ఈ తనిఖీలు చేపట్టినట్లు సమాచారం. దుకాణాల్లోని కొనుగోలు, అమ్మకాల రికార్డులు, పన్ను చెల్లింపులకు సంబంధించిన పత్రాలు, బంగారం నిల్వలను అధికారులు పరిశీలించినట్లు తెలుస్తోంది.

నిఖితా జ్యువలరీ, మనసా జ్యువలరీ, శ్రావణ జ్యువలరీ తదితర దుకాణాల్లో అధికారులు సోదాలు నిర్వహించినట్లు సమాచారం. విజిలెన్స్ సీఐ నరసింహారావుతో పాటు వాణిజ్య పన్నుల శాఖ అధికారులు, ఇతర సిబ్బంది తనిఖీల్లో పాల్గొన్నట్లు తెలుస్తోంది.

అధికారుల తనిఖీల విషయం తెలుసుకున్న మరికొంతమంది బంగారు వ్యాపారులు ముందుజాగ్రత్తగా తమ దుకాణాలను మూసివేసినట్లు స్థానికంగా ప్రచారం జరుగుతోంది. దీంతో గూడూరు పట్టణంలోని బంగారు వ్యాపారాల్లో పన్నుల చెల్లింపులు, లావాదేవీల నిర్వహణపై చర్చ మొదలైంది.

అయితే సోదాల్లో అధికారులు ఏయే అంశాలను గుర్తించారు? పన్ను ఎగవేత లేదా ఇతర అవకతవకలు ఏమైనా నిర్ధారణ అయ్యాయా? అన్న విషయాలపై అధికారిక ప్రకటన వెలువడాల్సి ఉంది. సోదాలు పూర్తయిన అనంతరం అధికారులు వెల్లడించే వివరాలపై ఆసక్తి నెలకొంది