Gudur: సమాన వేతనం డిమాండ్ చేస్తూ వైద్య సిబ్బంది కొవ్వొత్తుల నిరసన

గూడూరు: ప్రభుత్వ ఆసుపత్రుల్లో సేవలందిస్తున్న కాంట్రాక్ట్ వైద్య సిబ్బంది తమ న్యాయమైన డిమాండ్ల సాధన కోసం వినూత్నంగా నిరసనకు దిగారు. సమాన పనికి సమాన వేతనం చెల్లించాలని, 100 శాతం గ్రాస్ జీతం అమలు చేయాలని డిమాండ్ చేస్తూ కొవ్వొత్తుల నిరసన చేపట్టారు.

సమాన పనికి సమాన వేతనం.ఈ నిరసనలో మహిళా నర్సులు, ల్యాబ్ టెక్నీషియన్లు, ఇతర వైద్య సిబ్బంది పెద్ద సంఖ్యలో పాల్గొన్నారు. ఎవరూ విధులకు ఆటంకం కలిగించకుండా, విధులు ముగిసిన తర్వాత ఈ కొవ్వొత్తుల నిరసన చేపట్టడం గమనార్హం.

నిరసనలో పాల్గొన్న సిబ్బంది మాట్లాడుతూ... తాము రెగ్యులర్ ఉద్యోగులతో సమానంగా, కొన్నిసార్లు అంతకంటే ఎక్కువగా పని చేస్తున్నామని అన్నారు. కరోనా లాంటి విపత్కర సమయంలో కూడా ప్రాణాలకు తెగించి సేవలు అందించామని గుర్తు చేశారు.కానీ తమకు ఇస్తున్న వేతనం చాలా తక్కువగా ఉందని, కుటుంబ పోషణ కూడా కష్టంగా మారిందని ఆవేదన వ్యక్తం చేశారు.

అందుకే ప్రభుత్వం తమ న్యాయమైన డిమాండ్ అయిన సమాన పనికి సమాన వేతనం, 100% గ్రాస్ జీతాన్ని అమలు చేయాలని కోరుతున్నారు.తాము ప్రభుత్వానికి వ్యతిరేకం కాదని, తమ బాధను ప్రభుత్వం దృష్టికి తీసుకెళ్లడానికే ఈ శాంతియుత నిరసన చేపట్టామని వైద్య సిబ్బంది తెలిపారు.

తమ సమస్యను సానుభూతితో పరిశీలించి, త్వరితగతిన న్యాయం చేయాలని ముఖ్యమంత్రి గారికి, వైద్య ఆరోగ్య శాఖ మంత్రి గారికి విజ్ఞప్తి చేస్తున్నారు.తమ డిమాండ్లను పరిష్కరించకపోతే, రాష్ట్ర వ్యాప్తంగా ఉన్న అన్ని జిల్లాల్లో ఇదే తరహాలో నిరసనలు చేపడతామని తెలియజేశారు.