Nellore: అగ్రిగోల్డ్ బాధితులకు కూటమి భరోసా.. 11 లక్షల మందికి న్యాయం: టీడీపీ

నెల్లూరు: ఎన్నికల మేనిఫెస్టోలో ఇచ్చిన హామీకి అనుగుణంగా రాష్ట్రవ్యాప్తంగా దాదాపు 11 లక్షల మంది అగ్రిగోల్డ్ బాధితులకు న్యాయం చేసే దిశగా కూటమి ప్రభుత్వం చర్యలు చేపట్టిందని తెలుగుదేశం పార్టీ నెల్లూరు పార్లమెంట్ ప్రధాన కార్యదర్శి చేజర్ల వేంకటేశ్వర రెడ్డి తెలిపారు. అగ్రిగోల్డ్‌లో డబ్బులు పెట్టుబడి పెట్టి గత పదేళ్లుగా తమ సొమ్ము తిరిగి అందక ఇబ్బందులు పడుతున్న బాధితులకు న్యాయం చేసేందుకు ముఖ్యమంత్రి నారా చంద్రబాబు నాయుడు ప్రభుత్వం కార్యాచరణ ప్రారంభించిందని పేర్కొన్నారు.

నెల్లూరులోని జిల్లా తెలుగుదేశం పార్టీ కార్యాలయంలో నిర్వహించిన విలేకరుల సమావేశంలో ఆయన మాట్లాడుతూ.. ఎన్నికల సమయంలో అగ్రిగోల్డ్ బాధితులకు న్యాయం చేస్తామని ఇచ్చిన హామీని నెరవేర్చే దిశగా ప్రభుత్వం ముందుకు సాగుతోందన్నారు. బాధితులకు న్యాయం చేసే మార్గాలను అన్వేషించేందుకు ముఖ్యమంత్రి ఐదుగురు మంత్రులతో కమిటీ ఏర్పాటు చేశారని, ఆ కమిటీ పలు దఫాలుగా సమావేశమై వివిధ అంశాలను అధ్యయనం చేసి నివేదిక సమర్పించిందని వివరించారు.

వివాదరహిత భూముల విక్రయంతో బాధితులకు చెల్లింపులు

రాష్ట్రంలో అగ్రిగోల్డ్‌కు సంబంధించి ఎలాంటి వివాదాలు లేని సుమారు 6,330 ఎకరాల భూములు సీఐడీ ఆధీనంలో ఉన్నాయని చేజర్ల వేంకటేశ్వర రెడ్డి తెలిపారు. ఈ భూములను విక్రయించడం ద్వారా వచ్చే మొత్తాన్ని అగ్రిగోల్డ్ బాధితులకు చెల్లించాలని ప్రభుత్వం నిర్ణయించిందన్నారు. ఇందులో భాగంగా బాధితుల బాండ్లను పరిశీలించి, అర్హుల జాబితాను సిద్ధం చేయాలని సీఐడీ అధికారులను ఆదేశించినట్లు వెల్లడించారు.

ఉమేష్ చంద్ర కాన్ఫరెన్స్ హాలులో బాండ్ల పరిశీలన

ప్రభుత్వ ఆదేశాల మేరకు ఈ నెల 9వ తేదీ నుంచి రాష్ట్రంలోని అన్ని జిల్లా కేంద్రాల్లో సీఐడీ ఆధ్వర్యంలో అగ్రిగోల్డ్ బాధితుల బాండ్ల పరిశీలన కార్యక్రమం జరుగుతోందని తెలిపారు. నెల్లూరు పోలీస్ గ్రౌండ్‌లోని ఉమేష్ చంద్ర కాన్ఫరెన్స్ హాలులో ఉమ్మడి నెల్లూరు జిల్లా బాధితుల బాండ్ల పరిశీలన చేపడుతున్నట్లు వివరించారు.

ప్రస్తుతం సర్వేపల్లి నియోజకవర్గానికి చెందిన బాధితుల బాండ్ల పరిశీలన జరుగుతోందని, ఈ నెల 14వ తేదీ నుంచి కోవూరు నియోజకవర్గ బాధితులకు సంబంధించిన బాండ్లను పరిశీలించనున్నట్లు పేర్కొన్నారు.

మండలాల వారీగా బాండ్ల పరిశీలన షెడ్యూల్

కోవూరు నియోజకవర్గ పరిధిలోని బాధితుల కోసం అధికారులు కేటాయించిన తేదీల వివరాలను చేజర్ల వేంకటేశ్వర రెడ్డి వెల్లడించారు.

- అక్టోబర్ 14: కోవూరు మండలం

- అక్టోబర్ 15: బుచ్చిరెడ్డిపాలెం

- అక్టోబర్ 16: ఇందుకూరుపేట

- అక్టోబర్ 17: విడవలూరు, కొడవలూరు మండలాలు

బాండ్ల పరిశీలన కార్యక్రమం నవంబర్ 17వ తేదీ వరకు కొనసాగుతుందని, బాధితులు అధికారులు ప్రకటించిన షెడ్యూల్ ప్రకారం నిర్ణీత తేదీల్లో హాజరై తమ బాండ్లను పరిశీలన చేయించుకోవాలని సూచించారు.

బాధితులు తీసుకెళ్లాల్సిన పత్రాలు ఇవే!

బాండ్ల పరిశీలనకు వచ్చే బాధితులు తమ వద్ద ఉన్న ఒరిజినల్ బాండ్‌తో పాటు, స్వీయ ధ్రువీకరణ చేసిన ఒరిజినల్ బాండ్ కలర్ జిరాక్స్ కాపీ, గుర్తింపు కార్డు, బ్యాంకు ఖాతా వివరాలు, పాస్‌పోర్ట్ సైజు ఫొటో తీసుకురావాలని సూచించారు.

డిపాజిట్‌దారు మరణించి ఉంటే మరణ ధ్రువీకరణ పత్రంతో పాటు నామినీ లేదా చట్టబద్ధమైన వారసుల గుర్తింపు పత్రాలను సమర్పించాల్సి ఉంటుందని తెలిపారు. ఏజెంట్లు తమ ఏజెంట్ కోడ్, గుర్తింపు పత్రాలు, బ్యాంకు ఖాతా వివరాలను వెంట తీసుకురావాలని పేర్కొన్నారు.

బాధితులు అవకాశాన్ని సద్వినియోగం చేసుకోవాలి

అగ్రిగోల్డ్‌లో డబ్బులు పెట్టి పదేళ్లుగా ఇబ్బందులు ఎదుర్కొంటున్న బాధితులకు ప్రభుత్వం తీసుకున్న నిర్ణయం ఊరటనిస్తుందని చేజర్ల వేంకటేశ్వర రెడ్డి అన్నారు. బాధితులందరూ నిర్ణీత తేదీల్లో అవసరమైన పత్రాలతో హాజరై బాండ్ల పరిశీలన, నమోదు ప్రక్రియను పూర్తి చేసుకోవాలని కోరారు.

అగ్రిగోల్డ్ బాధితులకు న్యాయం చేసేందుకు చర్యలు చేపట్టిన ముఖ్యమంత్రి నారా చంద్రబాబు నాయుడుకు ఆయన ప్రత్యేక కృతజ్ఞతలు తెలిపారు.