Tamil Nadu Politics: ఓటర్ల జాబితాపై రగడ.. సీఈసీ రాజీనామాకు పార్టీల డిమాండ్!

Tamil Nadu Politics: తమిళనాడులో ఎన్నికల సంఘం (ఈసీ) నిర్వహించిన అఖిలపక్ష సమావేశం తీవ్ర రాజకీయ దుమారానికి దారితీసింది. రాష్ట్రంలో ఓటర్ల జాబితా ప్రత్యేక సవరణ (SSR) అంశంపై చర్చించేందుకు ప్రధాన ఎన్నికల అధికారి అర్చన పట్నాయక్ సచివాలయంలో ఈ సమావేశాన్ని ఏర్పాటు చేశారు. అయితే, గతంలో నిర్వహించిన ప్రత్యేక సమగ్ర సవరణ (SIR) ప్రక్రియలో భారీ ఎత్తున అక్రమాలు జరిగాయని ఆరోపిస్తూ అధికార డిఎంకే, మిత్రపక్షాలైన కాంగ్రెస్, విసికె, లెఫ్ట్ పార్టీలతో పాటు జోసెఫ్ విజయ్ నేతృత్వంలోని టివికె తదితర పార్టీలు ఈ భేటీని బహిష్కరించాయి. సమావేశానికి హాజరైన ఆయా పార్టీల ప్రతినిధులు వాకౌట్ చేసి, ప్రస్తుత చీఫ్ ఎలక్షన్ కమిషనర్ (సీఈసీ) జ్ఞానేశ్ కుమార్ తక్షణమే తన పదవికి రాజీనామా చేయాలని డిమాండ్ చేశారు.

గతంలో జరిగిన ఓటర్ల జాబితా సవరణలో పారదర్శకత లోపించిందని, నిబంధనలకు విరుద్ధంగా ఏకంగా 74 లక్షలకు పైగా ఓట్లను జాబితా నుంచి తొలగించారని డిఎంకే లీగల్ వింగ్ జాయింట్ సెక్రటరీ ఐ. పరాంతమెన్ తీవ్రంగా ఆరోపించారు. తొలగించిన ఓటర్ల వివరాలపై ఈసీ ఎలాంటి సమాధానం చెప్పలేదని, ప్రస్తుత సీఈసీ ఆధ్వర్యంలో జరిగే ఏ ఎన్నికల ప్రక్రియ విశ్వసనీయత కోల్పోతుందని ఆయన స్పష్టం చేశారు. ఈ వైఫల్యానికి నైతిక బాధ్యత వహిస్తూ సీఈసీ స్వచ్ఛందంగా తప్పుకోవాలని, లేదంటే రాజ్యాంగబద్ధంగా తొలగించాలని డిమాండ్ చేశారు. ఈ డిమాండ్‌కే కట్టుబడి ఉంటామని, కాంగ్రెస్ సహా ఇతర పార్టీలు కూడా ప్రస్తుత ఈసీ నేతృత్వంలోని సమావేశాలకు హాజరుకాబోమని తేల్చిచెప్పాయి. యువత, మహిళల ఓట్లను అకారణంగా తొలగించారని రాష్ట్ర ఇంధన, న్యాయశాఖ మంత్రి ఆర్. నిర్మల్ కుమార్ మండిపడ్డారు.

మరోవైపు, అఖిలపక్ష సమావేశాన్ని బహిష్కరించిన ఇతర పార్టీలకు భిన్నంగా ప్రధాన ప్రతిపక్షం అన్నాడీఎంకే ఈ భేటీకి హాజరైంది. తమ పార్టీ అభిప్రాయాలను, అభ్యంతరాలను ఎన్నికల సంఘం ముందు గట్టిగా వినిపించేందుకే సమావేశంలో పాల్గొన్నట్లు ఆ పార్టీ సీనియర్ నేత, మాజీ మంత్రి డి. జయకుమార్ తెలిపారు. గత ఎస్ఐఆర్ ప్రక్రియలో సుమారు 97 లక్షల ఓటర్ల ఎంట్రీలు ప్రభావితమయ్యాయని, ఇందులో మృతి చెందినవారు, వలస వెళ్లినవారు, డూప్లికేట్ ఓట్లు ఎంతమందో స్పష్టమైన వివరణ ఇవ్వాలని అన్నాడీఎంకే డిమాండ్ చేసింది. అలాగే రాష్ట్రంలో వర్షాకాలం దృష్ట్యా నవంబర్‌లో నిర్వహించ తలపెట్టిన ప్రత్యేక క్యాంపుల తేదీలను వాయిదా వేయాలని కోరింది. ఓటర్ల జాబితాలో పారదర్శకతను పాటించి, తప్పులను సరిదిద్దిన తర్వాతే తదుపరి సవరణ చేపట్టాలని అన్ని పార్టీలు స్పష్టం చేశాయి.