Royal Bengal Tiger: ఒడిశాలో మరోసారి పులి కలకలం.. దేబ్రిగఢ్ అభయారణ్యంలో రాయల్ బెంగాల్ టైగర్ దర్శనం!

Royal Bengal Tiger: ఒడిశాలో మరోసారి రాయల్ బెంగాల్ టైగర్ సంచారం కలకలం రేపుతోంది. బరగఢ్ జిల్లాలోని దేబ్రిగఢ్ వన్యప్రాణుల అభయారణ్యంలో ఓ రాయల్ బెంగాల్ టైగర్ కనిపించినట్లు అటవీ అధికారులు వెల్లడించారు. దేచువాన్-లఖన్‌పూర్ అటవీ ప్రాంతంలోకి ప్రవేశించిన ఈ పులి.. అభయారణ్యంలో సంచరిస్తున్న దృశ్యాలు కెమెరా ట్రాప్‌లో రికార్డయ్యాయని హిరాకుడ్ వైల్డ్‌లైఫ్ డివిజన్ డివిజనల్ ఫారెస్ట్ ఆఫీసర్ అన్షు ప్రజ్ఞాన్ దాస్ సోమవారం తెలిపారు.

ఈ పులి పొరుగున ఉన్న ఛత్తీస్‌గఢ్ రాష్ట్రం నుంచి దేబ్రిగఢ్ అభయారణ్యంలోకి ప్రవేశించి ఉండవచ్చని అధికారులు అనుమానిస్తున్నారు. అయితే, పులి మూలం, లింగం, ఇతర వివరాలను ఇప్పుడే నిర్ధారించలేమని తెలిపారు. నేషనల్ టైగర్ కన్జర్వేషన్ అథారిటీ (NTCA), వైల్డ్‌లైఫ్ ఇన్‌స్టిట్యూట్ ఆఫ్ ఇండియా నిపుణులు ఫొటోలను విశ్లేషించిన తర్వాత పూర్తి వివరాలు వెల్లడవుతాయని పేర్కొన్నారు.

పులి కదలికలపై ప్రత్యేక నిఘా

అభయారణ్యంలో పులి సంచారాన్ని గుర్తించేందుకు అటవీ శాఖ ప్రత్యేక నిఘా ఏర్పాటు చేసింది. అటవీ మార్గాల్లో మొత్తం 100 కెమెరా ట్రాప్‌లను ఏర్పాటు చేయడంతో పాటు రోజువారీ గస్తీ కోసం 27 బృందాలను రంగంలోకి దించారు. అంతేకాకుండా మూడు అంచెల భద్రతా బృందాలతో రాత్రి వేళల్లోనూ గస్తీ నిర్వహిస్తున్నట్లు అధికారులు వెల్లడించారు.

గతంలో 2022 నుంచి 2024 మధ్య సుమారు ఏడాదిన్నర పాటు ఓ రాయల్ బెంగాల్ టైగర్ దేబ్రిగఢ్ అభయారణ్యంలో నివసించిందని అటవీ అధికారులు గుర్తుచేశారు. అనంతరం ఛత్తీస్‌గఢ్‌లోని గోమర్దా అభయారణ్యంలో విద్యుదాఘాతానికి గురై ఆ పులి మరణించిందని తెలిపారు.

పులులకు అనుకూలమైన వాతావరణం

దేబ్రిగఢ్ అభయారణ్యంలో దట్టమైన అటవీ ప్రాంతం, సమృద్ధిగా ఆహార లభ్యత, హీరాకుడ్ జలాశయంలో పుష్కలంగా నీరు ఉండటం పులులను ఆకర్షించే అవకాశముందని అధికారులు అభిప్రాయపడుతున్నారు. మధ్య భారత ప్రాంతం నుంచి పులులను తీసుకొచ్చి దేబ్రిగఢ్ వన్యప్రాణుల అభయారణ్యంలో ప్రవేశపెట్టేందుకు ఒడిశా ప్రభుత్వం కూడా ప్రణాళికలు రూపొందిస్తోంది.

మరోవైపు, వన్యప్రాణులు జనావాసాల్లోకి ప్రవేశించకుండా అటవీ ప్రాంతాలకు సమీపంలోని గ్రామాలకు సౌరశక్తితో పనిచేసే కంచెలను ఏర్పాటు చేశారు. తద్వారా ప్రజలతో పాటు వన్యప్రాణుల భద్రతకు చర్యలు తీసుకుంటున్నారు.

కోరాపుట్‌లోనూ కనిపించిన రాయల్ బెంగాల్ టైగర్

ఇదిలా ఉండగా, కొద్ది రోజుల క్రితం కోరాపుట్ అటవీ విభాగంలోని సెమిలిగూడ అటవీ ప్రాంతంలోనూ ఓ రాయల్ బెంగాల్ టైగర్ కనిపించింది. ఈ విషయాన్ని కోరాపుట్ డివిజనల్ ఫారెస్ట్ ఆఫీసర్ సిద్ధార్థ్ జైన్ వెల్లడించారు. జిల్లాలో స్థానికంగా పులుల జనాభా లేదని, ప్రస్తుతం కనిపించిన పులి ఎక్కడి నుంచి వచ్చిందనే విషయంపై దర్యాప్తు చేస్తున్నామని తెలిపారు.

ఆ పులికి రేడియో కాలర్ అమర్చకపోవడంతో దాని కదలికలు, మూలాన్ని గుర్తించడం కష్టంగా మారిందని చెప్పారు. అయితే పులి కనిపించడంతో పాటు దాని అడుగుజాడలు కూడా గుర్తించినట్లు వివరించారు. ప్రజల భద్రతతో పాటు పులికి ఎలాంటి హాని జరగకుండా అన్ని ముందస్తు జాగ్రత్తలు తీసుకుంటున్నామని స్పష్టం చేశారు.