Rahul Gandhi: ఇజ్రాయెల్‌పై రాహుల్ వ్యాఖ్యలు.. సొంతవాళ్లే ఫైర్

Rahul Gandhi: ఇజ్రాయెల్‌తో భారత్ సంబంధాలు, గాజా యుద్ధంపై ఆయన చేసిన వ్యాఖ్యలు సొంత పార్టీ మద్దతుదారుల్లోనే అసంతృప్తికి దారితీశాయి.

G Krishna
Published on: 20 Nov 2026 7:27 PM IST
Rahul Gandhi
X

Rahul Gandhi: ఇజ్రాయెల్‌పై రాహుల్ వ్యాఖ్యలు.. సొంతవాళ్లే ఫైర్

Rahul Gandhi: కాంగ్రెస్ అగ్రనేత రాహుల్ గాంధీకి ఊహించని పరిస్థితి ఎదురైంది. ఇజ్రాయెల్‌తో భారత్ సంబంధాలు, గాజా యుద్ధంపై ఆయన చేసిన వ్యాఖ్యలు సొంత పార్టీ మద్దతుదారుల్లోనే అసంతృప్తికి దారితీశాయి. రాహుల్ వైఖరిని కాంగ్రెస్ సీనియర్ నేతలు సమర్థిస్తుండగా, కొందరు కాంగ్రెస్ అభిమానులు, ప్రగతిశీలవాదులు మాత్రం తీవ్రంగా తప్పుబడుతున్నారు.

చికాగోలో రాహుల్ ఏం మాట్లాడారు?

నవంబర్ 18న అమెరికాలోని చికాగో యూనివర్సిటీ విద్యార్థులతో రాహుల్ గాంధీ సమావేశమయ్యారు. ఈ సందర్భంగా ఇజ్రాయెల్‌తో భారత్ సంబంధాలపై అడిగిన ప్రశ్నకు స్పందించారు. ఇజ్రాయెల్‌తో మంచి సంబంధాలు కొనసాగించాలని, రక్షణ రంగంలో సహకారం అవసరమని చెప్పారు. అయితే ఇతర దేశాల ప్రయోజనాల కోసం కాకుండా భారత్ సొంత ప్రయోజనాల ఆధారంగానే విదేశాంగ విధానం ఉండాలని స్పష్టం చేశారు. అక్టోబర్ 7న ఇజ్రాయెల్‌పై జరిగిన ఉగ్రదాడులను ఖండించిన రాహుల్.. గాజాలో ఇజ్రాయెల్ చర్యలను కూడా తప్పుబట్టారు. ఒక తప్పును మరో తప్పుతో సమర్థించలేమని వ్యాఖ్యానించారు.

రాహుల్ మద్దతుదారులే ఎందుకు వ్యతిరేకిస్తున్నారు?

ఇజ్రాయెల్‌తో వ్యూహాత్మక సంబంధాలు కొనసాగించాలన్న రాహుల్ వ్యాఖ్యలపై కొందరు మద్దతుదారులు అసంతృప్తి వ్యక్తం చేశారు. గాజాలో జరుగుతున్న పరిణామాలపై మరింత కఠినంగా స్పందించాల్సిందని అభిప్రాయపడ్డారు. రాహుల్‌ను అభిమానించే అర్షియా అనే మహిళ.. రాజకీయ మద్దతు ఇచ్చినంత మాత్రాన తన సిద్ధాంతాలను వదులుకోలేనని పేర్కొన్నారు. రచయిత అపూర్వానంద్ కూడా రాహుల్ వ్యాఖ్యలు నిరాశ కలిగించాయని విమర్శించారు. జర్నలిస్ట్ ప్రణవ్ ప్రధి సైతం ఇదే అభిప్రాయం వ్యక్తం చేశారు. కొందరు కాంగ్రెస్ మద్దతుదారులు సోనియా గాంధీ, ప్రియాంక గాంధీ వైఖరితో రాహుల్ వ్యాఖ్యలను పోల్చుతూ ప్రశ్నించారు.

రాహుల్‌కు అండగా కాంగ్రెస్ నేతలు

మరోవైపు కాంగ్రెస్ నేతలు రాహుల్ వ్యాఖ్యలను సమర్థించారు. సుప్రియా శ్రీనతే స్పందిస్తూ.. దేశ ప్రయోజనాలకు ప్రాధాన్యం ఇచ్చే బాధ్యతాయుతమైన వైఖరిని రాహుల్ ప్రదర్శించారని అన్నారు. కాంగ్రెస్ అధికార ప్రతినిధి షమా మహ్మద్ కూడా ఆయనను ప్రశంసించారు. ఇజ్రాయెల్‌తో సంబంధాలు కొనసాగిస్తూనే గాజాలో జరుగుతున్న దాడులను వ్యతిరేకించాలన్న రాహుల్ వైఖరి కాంగ్రెస్‌లోనే భిన్నాభిప్రాయాలకు కారణమైంది.

G Krishna

G Krishna

అక్షరంతో మొదలైన ప్రయాణం.. అంకెల్లో చెప్పాలంటే పదేళ్ల అనుభవం..! 2015లో కెరీర్ స్టార్ట్ చేసి, ప్రింట్ మీడియా నుంచి డిజిటల్ విప్లవం వరకు అన్నిటినీ దగ్గరగా చూశాను. అంతర్జాతీయ పరిణామాల నుంచి దేశ రాజధాని రాజకీయాల వరకు, గల్లీ స్థాయి వార్తల నుంచి ఢిల్లీ స్థాయి విశ్లేషణల వరకు ప్రతి అంశాన్ని లోతుగా అధ్యయనం చేస్తూ కథనాలు అందించాను. టెక్నాలజీ స్పీడ్, బిజినెస్ లెక్కలైనా, ఆస్ట్రాలజీ విశ్లేషణ ఏదైనా.. నా నుంచి వచ్చే ప్రతి కథనం ప్రతి వార్త పాఠకుడికి ఇన్ఫర్మేషన్‌తో పాటు ఇంట్రెస్ట్‌ను కూడా అందిస్తుంది.