మహాదేవ్ యాప్ కేసులో బిగ్ ట్విస్ట్.. దుబాయ్‌లో రవి ఉప్పల్ అరెస్ట్

Mahadev Betting App: మహాదేవ్ ఆన్‌లైన్ బెట్టింగ్ యాప్ కేసుకు సంబంధించి కీలక పరిణామం చోటుచేసుకుంది. ఈ భారీ అక్రమ బెట్టింగ్ నెట్‌వర్క్ ప్రధాన ప్రమోటర్లలో ఒకరైన రవి ఉప్పల్‌ను యునైటెడ్ అరబ్ ఎమిరేట్స్ (UAE) అధికారులు అరెస్టు చేసినట్లు భారత దర్యాప్తు సంస్థల అధికారులు బుధవారం ధృవీకరించారు. విచారణ నిమిత్తం అతడిని భారతదేశానికి రప్పించడానికి ఎన్‌ఫోర్స్‌మెంట్ డైరెక్టరేట్ (ED), సెంట్రల్ బ్యూరో ఆఫ్ ఇన్వెస్టిగేషన్ (CBI) ఉమ్మడిగా ప్రయత్నాలు వేగవంతం చేశాయి.

సౌరభ్ చంద్రకర్ అప్పగింత తర్వాత మరొక బిగ్ వికెట్

ఈ కేసుకు సంబంధించి ఒమన్ నుంచి మరో కీలక సూత్రధారి సౌరభ్ చంద్రకర్‌ను భారత్‌కు తీసుకువచ్చిన కొద్ది రోజులకే రవి ఉప్పల్ అరెస్ట్ కావడం గమనార్హం. ఈడీ దర్యాప్తు చేస్తున్న తీవ్రమైన మనీలాండరింగ్ కేసుకు సంబంధించి చంద్రకర్‌ను భారత్‌కు అప్పగించేందుకు ఒమన్ న్యాయస్థానం ఆమోదం తెలిపింది. దీంతో సీబీఐ బృందం నవంబర్ 1న అతడిని ఒమన్ నుంచి భారతదేశానికి తీసుకువచ్చింది. ఆ వెంటనే, భారత ఏజెన్సీల అభ్యర్థన మేరకు ఇంటర్‌పోల్ జారీ చేసిన రెడ్ నోటీసు ఆధారంగా దుబాయ్ అధికారులు రవి ఉప్పల్‌ను కూడా అదుపులోకి తీసుకున్నారు.

గతంలోనూ దుబాయ్‌లో నిర్బంధం.. వనౌటు పాస్‌పోర్ట్‌తో లబ్ధి

యుఏఈ అధికారుల కంట ఉప్పల్ పడటం ఇది తొలిసారి కాదు. డిసెంబర్ 2023లోనే అతడిని దుబాయ్‌లో అదుపులోకి తీసుకున్నప్పటికీ, ఆ తర్వాత బయటకు వచ్చి ఆస్ట్రేలియాకు పారిపోయినట్లు దర్యాప్తు సంస్థలు గుర్తించాయి. చంద్రకర్‌ లాగానే ఉప్పల్ కూడా దక్షిణ పసిఫిక్ ప్రాంతంలోని ‘వనౌటు’ అనే ద్వీప దేశం నుంచి పాస్‌పోర్ట్ పొంది దర్యాప్తు నుంచి తప్పించుకునేందుకు యత్నించాడని దర్యాప్తు అధికారులు వెల్లడించారు.

రాజకీయ నాయకులకు కోట్లాది రూపాయల లంచాలు

అక్టోబర్ 2023లో దాఖలు చేసిన ఛార్జిషీట్‌లో ఉప్పల్ పాత్రను ఈడీ స్పష్టంగా పేర్కొంది. ఈ ఆన్‌లైన్ బెట్టింగ్ ద్వారా వేల కోట్ల రూపాయల నేరపూరిత ఆదాయాన్ని (ప్రోసీడ్స్ ఆఫ్ క్రైమ్) సంపాదించడమే కాకుండా, ఆ సొమ్మును వివిధ పొరలుగా మళ్లించడంలో (లాండరింగ్) ఉప్పల్ కీలక పాత్ర పోషించాడని ఆరోపించింది. ఛత్తీస్‌గఢ్‌కు చెందిన పోలీస్ అసిస్టెంట్ సబ్-ఇన్‌స్పెక్టర్ చంద్రభూషణ్ వర్మ , ఇతర మధ్యవర్తుల ద్వారా అక్కడి బ్యూరోక్రాట్లు, రాజకీయ నాయకులకు క్రమం తప్పకుండా లంచాల రూపంలో కోట్లాది రూపాయలు ముట్టజెప్పేలా ఈ సిండికేట్ వ్యవహరించిందని ఏజెన్సీ స్పష్టం చేసింది.

కాగా, ఈ కేసులో ప్రధాన నిందితులైన రవి ఉప్పల్, సౌరభ్ చంద్రకర్ ఇద్దరూ ఛత్తీస్‌గఢ్‌లోని దుర్గ్ జిల్లా భిలాయ్ ప్రాంతానికి చెందినవారే కావటం గమనార్హం. ఉప్పల్‌ను కూడా భారత్‌కు తీసుకువస్తే ఈ స్కామ్‌లోని మరిన్ని కీలక లావాదేవీలు వెలుగులోకి రానున్నాయి.