Pit Bull: సోనిపట్‌లో దారుణం.. ఆరు నెలల పసిపాపపై పిట్‌బుల్ కుక్క భీకర దాడి!

Pit Bull: హరియాణాలోని సోనిపట్‌లో దారుణ ఘటన చోటుచేసుకుంది. ఆరు నెలల పసిపాపపై ఓ పిట్‌బుల్ కుక్క అత్యంత క్రూరంగా దాడి చేసింది. ఈ ఘటనలో చిన్నారి తీవ్రంగా గాయపడగా, ప్రస్తుతం ఆస్పత్రిలో ప్రాణాలతో పోరాడుతోంది.

పోలీసులు మరియు స్థానికుల వివరాల ప్రకారం.. సోనిపట్‌లో ఓ మహిళ తన ఆరు నెలల పసిపాపను ఎత్తుకుని ఇంటి బయట నిల్చోగా, అకస్మాత్తుగా ఓ పిట్‌బుల్ కుక్క వారిపైకి దూసుకొచ్చింది. ఈ అనూహ్య పరిణామానికి కంగారుపడిన తల్లి కింద పడిపోయింది.

అదే సమయంలో చిన్నారిని నోట కరుచుకున్న కుక్క, వదిలేందుకు నిరాకరించి ఈడ్చుకెళ్లేందుకు యత్నించింది. తల్లితో పాటు చుట్టుపక్కల వారు ఎంత ప్రయత్నించినా కుక్క పట్టు విడలేదు. చివరికి స్థానికులు కర్రలతో గట్టిగా కొట్టడంతో కుక్క పట్టు సడలించింది. వెంటనే చిన్నారిని హుటాహుటిన సమీపంలోని ఆస్పత్రికి తరలించారు.

కుక్క దాడిలో చిన్నారి తల, శరీర భాగాలపై తీవ్ర గాయాలయ్యాయి. ప్రస్తుతం వైద్యులు చిన్నారికి అత్యవసర వైద్యం అందిస్తున్నారు. అయితే పాప పరిస్థితి అత్యంత విషమంగా ఉన్నట్లు తెలుస్తోంది. ప్రస్తుతం ఈ భయానక దృశ్యాలకు సంబంధించిన సీసీటీవీ (CCTV) దృశ్యాలు సోషల్ మీడియాలో వైరల్‌గా మారాయి. పెంపుడు కుక్కల యజమానుల నిర్లక్ష్యంపై సోషల్ మీడియాలో తీవ్ర విమర్శలు వ్యక్తమవుతున్నాయి.