Emergency Landing: దుబాయ్-హైదరాబాద్ విమానం అత్యవసర ల్యాండింగ్.. గాలిలో ప్రయాణికుడికి గుండెపోటు!

Emergency Landing: దుబాయ్ నుంచి హైదరాబాద్ బయలుదేరిన ఎమిరేట్స్ విమానంలో అత్యవసర పరిస్థితి ఏర్పడింది. విమానంలో ప్రయాణిస్తున్న ఒక వ్యక్తికి గుండెపోటు రావడంతో, పైలట్లు సమయానుకూలంగా స్పందించి విమానాన్ని ముంబయిలోని ఛత్రపతి శివాజీ మహారాజ్ అంతర్జాతీయ విమానాశ్రయంలో అత్యవసరంగా ల్యాండ్ చేశారు.

దుబాయ్ నుంచి హైదరాబాద్ వస్తుండగా ప్రయాణ మధ్యలో ఓ ప్రయాణికుడికి ఒక్కసారిగా తీవ్ర గుండెపోటు వచ్చింది. విషయాన్ని గమనించిన విమాన సిబ్బంది వెంటనే పైలట్లకు సమాచారం అందించారు.

ప్రయాణికుడి ప్రాణాలను కాపాడేందుకు ఎయిర్ ట్రాఫిక్ కంట్రోల్ (ATC) అనుమతితో విమానాన్ని అత్యవసరంగా ముంబయి విమానాశ్రయానికి మళ్లించి ల్యాండ్ చేశారు.

విమానం ముంబయిలో ల్యాండ్ అయిన వెంటనే సిద్ధంగా ఉన్న ఎయిర్‌పోర్ట్ మెడికల్ టీమ్ ప్రయాణికుడిని అత్యవసర చికిత్స నిమిత్తం సమీపంలోని మల్టీ స్పెషాలిటీ ఆసుపత్రికి తరలించారు.

గుండెపోటుకు గురైన ప్రయాణికుడు హైదరాబాద్‌కు చెందిన వ్యక్తిగా అధికారులు భావిస్తున్నారు. ప్రస్తుతం ఆయనకు వైద్యులు చికిత్స అందిస్తున్నారు.