దిల్జీత్‌తో వివాదంలో ఊహించని మలుపు.. బహిరంగంగా క్షమాపణలు చెప్పిన అభిజిత్‌ దీప్కే!

Abhijit Deepke: ప్రముఖ నటుడు, గాయకుడు దిల్జీత్ దోసాంజ్ మరియు 'కాక్రోచ్ జనతా పార్టీ' (CJP) వ్యవస్థాపకుడు అభిజీత్ దీప్కే మధ్య కొద్దిరోజులుగా నడుస్తున్న సంచలన వివాదం చివరకు ఊహించని మలుపు తిరిగింది. దిల్జీత్‌పై తాను చేసిన విమర్శలకు సంబంధించి అభిజీత్ దీప్కే తీవ్రంగా పశ్చాత్తాపం వ్యక్తం చేస్తూ పూర్తిగా వెనక్కి తగ్గారు. సోషల్ మీడియా వేదికగా ఒక సుదీర్ఘమైన సుదీర్ఘ పోస్టు పెట్టిన అభిజీత్, తన వ్యాఖ్యల వల్ల దిల్జీత్ మనస్సు బాధపడి ఉంటే హృదయపూర్వకంగా క్షమించాలని కోరారు.

దిల్జీత్‌పై తనకు ఎలాంటి వ్యక్తిగత ద్వేషం లేదని, అంతర్జాతీయ స్థాయిలో భారతీయ సంగీత పతాకాన్ని ఎగురవేసిన ఆయనంటే తనకు ఇప్పటికీ ఎంతో గౌరవం, అభిమానం ఉన్నాయని స్పష్టం చేశారు. ఈ వివాదానికి ప్రధాన కారణం గత జూన్ నెలలో ఢిల్లీలో చోటుచేసుకున్న పరిణామాలే. ఆ సమయంలో కాక్రోచ్ జనతా పార్టీ విద్యార్థుల సమస్యలపై నిర్వహించిన నిరసనలకు మద్దతు ఇస్తారా అని ఒక అభిమాని ప్రశ్నించగా, "నన్ను ఇటువంటి వివాదాలకు దూరంగా ఉంచండి.. నేను కేవలం ఒక ఆర్టిస్టును మాత్రమే, రాజకీయ నాయకుడిని కాను" అని దిల్జీత్ వ్యాఖ్యానించారు.

నాడు ఆ వ్యాఖ్యలపై తీవ్ర ఆగ్రహం వ్యక్తం చేసిన అభిజీత్ దీప్కే, సామాజిక అంశాలతో తెరకెక్కిన 'సత్లుజ్' సినిమాలో నటిస్తూ విద్యార్థుల ఉద్యమంపై ఎందుకు స్పందించడం లేదంటూ తీవ్రస్థాయిలో తప్పుబట్టారు.

అయితే, శుక్రవారం ఢిల్లీలో జరిగిన ఒక లైవ్ కచేరీలో దిల్జీత్ దోసాంజ్ ఈ వివాదంపై స్పందిస్తూ, "నేను ఒక కళాకారుడిని కాబట్టి మీ అందరినీ ప్రేమిస్తున్నాను, నేను మౌనంగా ఉంటే నన్ను అలాగే ఉండనివ్వండి.. ఎలా పోరాడాలో పంజాబీలకు ఎవరూ నేర్పించాల్సిన అవసరం లేదు" అని వేదికపైనే ఘాటుగా సమాధానమిచ్చారు.

దిల్జీత్ వ్యాఖ్యల అనంతరం అభిజీత్ దీప్కే ఇన్‌స్టాగ్రామ్‌లో పూర్తి వివరణ ఇస్తూ శాంతించారు. విద్యార్థుల నిరసనల వేళ దిల్జీత్ చేసిన వ్యాఖ్యలు తప్పుగా అనిపించి తానూ బాధపడ్డానని, ఎప్పుడూ సమాజ సమస్యలపై గొంతెత్తే వ్యక్తిగా ఆయనను చూశానని పేర్కొన్నారు. భారతీయ సంగీతాన్ని ప్రపంచ స్థాయికి తీసుకెళ్లిన దిల్జీత్ కృషిని కొనియాడిన అభిజీత్, "నన్ను మీ చిన్న తమ్ముడిగా భావించి ఈ విషయాన్ని ఇక్కడితో వదిలేయండి" అని విజ్ఞప్తి చేయడంతో ఈ వివాదానికి తెరపడినట్లయింది.