Delhi Fire Tragedy : దేశ రాజధానిలో పెను విషాదం.. 9 మంది సజీవ దహనం.. 12 మంది పరిస్థితి విషమం

Delhi Fire Tragedy : దేశ రాజధాని ఢిల్లీలో ఆదివారం తెల్లవారుజామున పెను విషాదం చోటుచేసుకుంది. అందరూ గాఢ నిద్రలో ఉన్న సమయంలో వివేక్ విహార్ ప్రాంతంలోని ఒక నాలుగు అంతస్తుల భవనంలో భారీ అగ్నిప్రమాదం సంభవించింది. ఈ ప్రమాదంలో ఇప్పటివరకు తొమ్మిది మంది సజీవ దహనమయ్యారు. మృతుల్లో ఆరుగురు పురుషులు, ఇద్దరు మహిళలతో పాటు ఒక చిన్నారి కూడా ఉండటం అందరినీ కలచివేస్తోంది. మరో 12 మంది తీవ్రంగా గాయపడి ఆస్పత్రిలో మృత్యువుతో పోరాడుతున్నారు. ఆదివారం తెల్లవారుజామున సుమారు 3:15 గంటల సమయంలో వివేక్ విహార్‌లోని ఒక అపార్ట్‌మెంట్‌లో మంటలు చెలరేగాయి. భవనంలోని రెండో అంతస్తులో ఉన్న ఒక ఏసీ యూనిట్ ఒక్కసారిగా పేలడంతో మంటలు మొదలయ్యాయని ప్రాథమికంగా భావిస్తున్నారు. క్షణాల వ్యవధిలోనే మంటలు భవనం మొత్తం విస్తరించాయి. గాఢ నిద్రలో ఉన్న బాధితులు ఏం జరుగుతుందో తెలుసుకునే లోపే భవనం దట్టమైన పొగతో నిండిపోయింది. ఊపిరి ఆడక, బయటకు వచ్చే దారి తెలియక చాలా మంది లోపలే చిక్కుకుపోయారు.

ఈ ప్రమాదంలో మృతుల సంఖ్య పెరగడానికి భవనంలోని ఆధునిక సదుపాయాలే కారణమని తెలుస్తోంది. భవనంలో మొత్తం ఎనిమిది ఫ్లాట్లు ఉండగా, వెనుక వైపు ఉన్న ఫ్లాట్లలో ఉండేవారు ఎక్కువగా ప్రభావితమయ్యారు. అక్కడ నుంచి బయటకు వచ్చే మార్గం చాలా ఇరుకుగా ఉండటం, దానికి తోడు తలుపులకు ఉన్న ఎలక్ట్రానిక్ లాకింగ్ సిస్టమ్ ప్రమాదం సమయంలో పనిచేయకపోవడంతో బాధితులు బందీలయ్యారు. పొగ కారణంగా ఊపిరి ఆడక స్పృహ కోల్పోయి, ఆపై మంటల్లో కాలిపోయారు.

సమాచారం అందిన వెంటనే ఉదయం 3:35 గంటలకు అగ్నిమాపక యంత్రాలు ఘటనా స్థలానికి చేరుకున్నాయి. సుమారు 12 మందిని అగ్నిమాపక సిబ్బంది సాహసోపేతంగా రక్షించి ఆస్పత్రికి తరలించారు. ప్రస్తుతం భవనంలో సెర్చ్ ఆపరేషన్ కొనసాగుతోందని షాదరా డీసీపీ రాజేంద్ర ప్రసాద్ మీనా తెలిపారు. భవనం అంతా పొగతో నిండి ఉండటంతో సహాయక చర్యలకు ఆటంకం కలిగింది. స్థానికులు కూడా తమ వంతు సాయం చేసినా, మంటల తీవ్రత ఎక్కువగా ఉండటంతో ఫలితం లేకపోయింది.

ప్రస్తుతం ఫోరెన్సిక్ బృందాలు ఘటనా స్థలంలో ఆధారాలు సేకరిస్తున్నాయి. అసలు ప్రమాదానికి కారణం ఏసీ పేలుడేనా లేక షార్ట్ సర్క్యూటా అన్నది తేలాల్సి ఉంది. అలాగే భవనంలో కనీస అగ్నిమాపక భద్రతా ప్రమాణాలు పాటించారా లేదా అన్న కోణంలోనూ పోలీసులు దర్యాప్తు చేస్తున్నారు. ఏది ఏమైనా, టెక్నాలజీ యుగంలో మనం వాడుతున్న ఏసీలు, ఎలక్ట్రానిక్ లాక్స్ విషయంలో ఎంత జాగ్రత్తగా ఉండాలో ఈ ఘటన మరోసారి హెచ్చరించింది.