వర్షాలు తక్కువ.. ఎల్‌నినో ప్రభావం ఎక్కువ! రబీ సాగుపై రైతుల్లో ఆందోళన

భారతదేశంలో నాలుగు నెలల నైరుతి రుతుపవనాల కాలం ముగిసినప్పటికీ, దేశంలోని అనేక ప్రాంతాల్లో నీటి సమస్య మాత్రం తీవ్రంగా వేధిస్తూనే ఉంది. ఈ సీజన్ ముగిసే సమయానికి దేశవ్యాప్తంగా 13 శాతం వర్షపాత లోటు నమోదైంది. దీనివల్ల అనేక ప్రాంతాల్లో రిజర్వాయర్లు, నేలలో తేమ శాతం, భూగర్భ జలాలు తీవ్ర ఒత్తిడిని ఎదుర్కొంటున్నాయి. ప్రస్తుతం దేశం రబీ సాగు సీజన్‌లోకి అడుగుపెడుతున్న తరుణంలో, తదుపరి పంటల సాగుకు సరిపడా నీరు అందుతుందా అనే ప్రశ్న ఆందోళన కలిగిస్తోంది.

వర్షాభావ పరిస్థితులు, సుదీర్ఘకాలం పాటు వర్షాలు కురవకపోవడంతో మహారాష్ట్ర ప్రభుత్వం రాష్ట్రంలోని మొత్తం 358 తాలూకాలలో 265 తాలూకాల్లో కరవును ప్రకటించింది. ఇది రాష్ట్రంలో దాదాపు మూడొవంతుల ప్రాంతాన్ని ప్రభావితం చేసింది.

ఖరీఫ్ పంటల్లా కాకుండా, రబీ పంటలు (గోధుమ, శనగలు, ఆవాలు తదితర శీతాకాలపు పంటలు) ప్రధానంగా నేలలోని తేమ, రిజర్వాయర్లు మరియు భూగర్భ జలాలపై ఆధారపడి ఉంటాయి. వర్షాలు సరిగా కురవకపోతే ఈ పంటలు తీవ్ర నీటి ఎద్దడిని ఎదుర్కొనే ప్రమాముంది.

భారత వాతావరణ శాఖ (IMD) అంచనా ప్రకారం, అక్టోబర్ నెలలో దేశవ్యాప్తంగా సాధారణం కంటే తక్కువ వర్షపాతం (దీర్ఘకాలిక సరాసరిలో 85 శాతం కంటే తక్కువ) నమోదయ్యే అవకాశం ఉంది.

భూమధ్యరేఖా పసిఫిక్ మహాసముద్రంపై ప్రస్తుతం బలమైన ఎల్ నినో (El Niño) పరిస్థితులు కొనసాగుతుండగా, ఇవి ఈ ఏడాదిాంతం వరకు మరింత బలపడే అవకాశం ఉందని IMD తెలిపింది. దీనికి తోడు ఉష్ణోగ్రతలు పెరగడం వల్ల నీటి ఆవిరి వేగంగా జరిగి, పంటలకు నీటి అవసరం మరింత పెరుగుతుందని నిపుణులు ఆందోళన వ్యక్తం చేస్తున్నారు.