Bengaluru: స్విమ్మింగ్ పూల్‌లో కరెంట్ షాక్.. ఇద్దరు విదేశీయులు అక్కడికక్కడే బలి!

Bengaluru: కర్ణాటక రాజధాని బెంగళూరు నగరంలోని ఒక ప్రముఖ ఫైవ్‌స్టార్‌ హోటల్‌లో తీవ్ర కలకలం రేపిన దిగ్భ్రాంతికర ఘటన చోటుచేసుకుంది. హోటల్‌లోని స్విమ్మింగ్ పూల్‌లో ఈత కొడుతుండగా ఒక్కసారిగా విద్యుత్‌ ప్రవహించి విద్యుదాఘాతానికి గురై ఇద్దరు విదేశీ పౌరులు అక్కడికక్కడే ప్రాణాలు కోల్పోయారు. మృతులను జర్మనీ మరియు స్లొవేకియా దేశాలకు చెందిన ప్రముఖులుగా పోలీసులు నిర్ధారించారు.

శుక్రవారం సాయంత్రం వేళ సదరు స్టార్ హోటల్‌లోని మూడో అంతస్తులో ఉన్న స్విమ్మింగ్ పూల్‌లోకి వీరు సరదాగా ఈత కొట్టేందుకు వెళ్లారు. ఆ సమయంలో ఊహించని విధంగా పూల్ నీటిలో తీవ్రమైన కరెంట్ ప్రవహించడంతో ఇద్దరూ విలవిలలాడుతూ మృతి చెందారు. కాగా, ప్రమాదంలో ఉన్న వీరిని కాపాడేందుకు ప్రాణాలకు తెగించి ప్రయత్నించిన హోటల్‌లో బస చేస్తున్న ఒక అమెరికన్ పౌరుడితో పాటు, స్విమ్మింగ్ పూల్ అటెండెంట్‌కు కూడా తీవ్ర గాయాలయ్యాయి. గమనించిన హోటల్‌ యాజమాన్యం తక్షణమే గాయపడిన వారిని స్థానిక ఆస్పత్రికి తరలించి అత్యవసర చికిత్స అందిస్తోంది.

ఘటనపై కేసు నమోదు చేసుకున్న బెంగళూరు పోలీసులు మృతుల వివరాలను వెల్లడించారు. మృతుల్లో ఒకరిని జర్మనీకి చెందిన లుఫ్తాన్సా ఎయిర్‌లైన్స్‌ సిబ్బంది అలెగ్జాండర్ మాక్సిమిలియన్ థీస్‌గా గురించగా, మరొకరు స్లోవేకియాకు చెందిన ప్రముఖ ఐటీ దిగ్గజ సంస్థ ఐబీఎం ప్రాజెక్ట్ మేనేజర్ జురాజ్ హోర్వాట్‌గా గుర్తించారు. లగ్జరీ ఫైవ్‌స్టార్ హోటల్‌లో ఇటువంటి దారుణమైన భద్రతా లోపం చోటుచేసుకోవడం మరియు ఇద్దరు విదేశీ ప్రముఖులు మృతి చెందడంతో సంబంధిత అధికారుల నిర్లక్ష్యంపై పోలీసులు కేసు ముమ్మరం చేసి దర్యాప్తు జరుపుతున్నారు.