దీపావళికి అగ్నివీరులకు కేంద్రం గుడ్‌న్యూస్.. 75 శాతం మందికి మరో రెండేళ్లు!

Agniveer service: దీపావళి పండుగను పురస్కరించుకుని కేంద్ర ప్రభుత్వం అగ్నివీరులకు సంబంధించి ఒక అత్యంత కీలకమైన నిర్ణయం తీసుకుంది. కేంద్ర క్యాబినెట్ సిఫార్సుల మేరకు, 75 శాతం మంది అగ్నివీరులకు మరో రెండేళ్ల పాటు అదనంగా సర్వీస్ ఎక్స్‌టెన్షన్ కల్పించాలని నిర్ణయించింది.

ప్రభుత్వ నిర్ణయంతో అగ్నివీరులు సాయుధ బలగాల్లో మరో రెండు సంవత్సరాల పాటు అదనంగా విధులు నిర్వర్తించేందుకు అవకాశం లభించనుంది. దీనివల్ల వందలాది మంది అగ్నివీరులకు ప్రత్యక్షంగా ప్రయోజనం చేకూరనుంది.

దీపావళి ముందే దక్కిన పెద్ద విజయం

కేంద్ర ప్రభుత్వం అగ్నివీరుల సేవా కాలాన్ని పొడిగిస్తూ తీసుకున్న ఈ నిర్ణయం వారి పండుగ సంతోషాలను రెట్టింపు చేసింది. సాయుధ బలగాల నుంచి విధు ముగించుకుని బయటకు వెళ్లాల్సిన అగ్నివీరులకే ఈ రెండు సంవత్సరాల సేవా విస్తరణ పొడిగింపు వర్తిస్తుందని చీఫ్ ఆఫ్ డిఫెన్స్ స్టాఫ్ (CDS) స్పష్టం చేశారు. బాధ్యతల నుంచి తప్పుకోవాల్సిన సమయంలో ఈ నిర్ణయం రావడం వారి భవిష్యత్తుకు పెద్ద ఊరటగా నిలిచింది.

పనితీరు మూల్యాంకనం ఆధారంగా శాశ్వత ప్రాతిపదికన నియమాకాలు

ఈ రెండేళ్ల అదనపు సేవా విస్తరణ పొందిన అగ్నివీరులకు వారి పనితీరు మూల్యాంకనం ఆధారంగా ఆర్మీలో శాశ్వత ఉద్యోగాలు పొందే అవకాశం కూడా లభించనుందని సీడీఎస్ తెలిపారు.

అంతేకాకుండా, ఈ పొడిగింపు పొందిన అగ్నివీరులకు అదనంగా మెరుగైన వేతనాలు, భత్యాలు కూడా అందనున్నాయి. క్యాబినెట్ తీసుకున్న ఈ నిర్ణయంతో సాయుధ బలగాల్లో చేరి దేశసేవ చేయాలనుకునే యువతకు దారులు మరింత స్పష్టంగా తెరుచుకున్నాయి.

సైన్యానికి , అగ్నివీరులకు ఇరువైపులా ప్రయోజనం

కేంద్ర క్యాబినెట్ తీసుకున్న నిర్ణయం వల్ల ఇటు సైన్యానికి, అటు అగ్నివీరులకు ఇద్దరికీ గొప్ప మేలు జరుగుతుంది. ఒకవైపు దేశ సైన్యానికి అనుభవజ్ఞులైన సైనికులు అందుబాటులో ఉంటే, మరోవైపు అగ్నివీరులకు దీర్ఘకాలిక ఉపాధి అవకాశాలు లభిస్తాయి.

సుదీర్ఘకాలం విధులు నిర్వర్తించడం ద్వారా అగ్నివీరులకు మరింత మెరుగైన శిక్షణ, అనుభవం లభించడమే కాకుండా, ఆర్మీలో సుదీర్ఘకాలం కొనసాగే వెసులుబాటు దక్కుతుంది. మరోవైపు బలగాల సంఖ్య తగ్గకుండా సైన్యం శక్తివంతంగా ఉండటానికి ఇది దోహదపడుతుంది.

కార్యకాలం పూర్తవుతున్న 18,000 మంది అగ్నివీరులు

ప్రధానమంత్రి నరేంద్ర మోదీ అధ్యక్షతన జరిగిన కేంద్ర మంత్రివర్గ సమావేశంలో ఈ నిర్ణయం తీసుకున్నారు. దేశంలో దాదాపు 18,000 మంది అగ్నివీరుల నాలుగేళ్ల పదవీ కాలం త్వరలోనే ముగియనున్న నేపథ్యంలో కేంద్రం ఈ కీలక నిర్ణయాన్ని ప్రకటించింది.

వాస్తవానికి అగ్నిపథ్ పథకం కింద నాలుగేళ్ల సర్వీస్ పూర్తయిన తర్వాత కేవలం 25 శాతం మంది అగ్నివీరులను మాత్రమే రెగ్యులర్ సర్వీస్‌లోకి తీసుకునే నిబంధన ఉండేది. అయితే ప్రస్తుత నిర్ణయంతో మిగిలిన వారికి కూడా మరో రెండేళ్ల పాటు ఆర్మీలో కొనసాగే గొప్ప అవకాశం లభించింది.