Abhijeet Dipke: కాంగ్రెస్‌తో పొత్తుపై స్పందించిన అభిజీత్ దీప్కే

Abhijeet Dipke: దేశ రాజకీయాల్లో సంచలనం సృష్టిస్తున్న కాకర్ రోచ్ జనతా పార్టీ(CJP) అధినాయకుడు అభిజీత్ దీప్కే తన రాజకీయ భవిష్యత్తు, ఇతర పార్టీలతో సంబంధాల గురించి స్పష్టతనిచ్చారు. ఇటీవల ఒక మీడియా సమావేశంలో ఆయన మాట్లాడుతూ తమ పార్టీ కేవలం ఒక రాజకీయ పార్టీలా కాకుండా స్వతంత్ర ప్రెజర్ గ్రూప్‌గా పనిచేస్తోందని స్పష్టం చేశారు. దేశంలోని యువత ఆశయాలకు అనుగుణంగా తమ అడుగులు ఉంటాయని, నిర్దిష్టమైన లక్ష్యాలు కలిస్తే ఏ పార్టీనైనా సమర్థిస్తామని ఆయన తేల్చిచెప్పారు. అయితే ఏ ఒక్క రాజకీయ పార్టీతోనూ తాము శాశ్వతంగా కలిసి ప్రయాణించే ప్రసక్తే లేదని ఆయన స్పష్టం చేశారు.

కాంగ్రెస్‌తో సంబంధాలపై దీప్కే క్లారిటీ

కాంగ్రెస్ పార్టీతో సంబంధాల గురించి వస్తున్న ఊహాగానాలపై అభిజీత్ దీప్కే తీవ్రంగా స్పందించారు. తాము కాంగ్రెస్‌తో పోరాడటం లేదని, అలాగని ఆ పార్టీకి తాము వ్యతిరేకం కాదని చెప్పారు. ప్రస్తుత వ్యవస్థలో తాము అనుసరిస్తున్న విధానం వేరని తెలిపారు. రాహుల్ గాంధీని పోలీసులు అదుపులోకి తీసుకున్న సమయంలో తాము దానిని తీవ్రంగా ఖండించామని గుర్తుచేశారు. ఒక మంచి ఉద్దేశం కోసం ఎవరైనా ముందుకు వస్తే వారికి మద్దతు ఇస్తామని, అంతమాత్రాన ఆ పార్టీతో కలిసిపోయినట్లు కాదని దీప్కే స్పష్టం చేశారు.

యువత నమ్మకమే మాకు అత్యంత ముఖ్యం

తమ వెనుక 25 మిలియన్ల మంది యువత బలముందని, వారంతా తమను ఒక స్వతంత్ర వేదికగా చూస్తున్నారని అభిజీత్ దీప్కే పేర్కొన్నారు. ఒకవేళ తమ పార్టీ ఏదైనా రాజకీయ పార్టీతో బహిరంగంగా చేతులు కలిపితే, ఆ యువత తమపై నమ్మకం కోల్పోయే ప్రమాదం ఉందని ఆయన అభిప్రాయపడ్డారు. రేపు భవిష్యత్తులో వేరే పార్టీ అధికారంలోకి వస్తే ప్రజలు తమను ప్రశ్నలు అడుగుతారని, అలాంటి ఇబ్బందికర పరిస్థితులను ఎదుర్కోవడానికి తాము సిద్ధంగా లేమని చెప్పారు. అందుకే తాము ఏ పార్టీ గుటిలోనూ చేరకుండా స్వతంత్రంగా ఉంటూ ప్రజల గొంతుకగా మారామని స్పష్టం చేశారు.

కుట్ర రాజకీయాలపై తీవ్ర విమర్శలు

ఈ సందర్భంగా కొందరు కావాలనే తమపై తప్పుడు ప్రచారం చేస్తున్నారని దీప్కే ఆరోపించారు. బలమైన ఉద్యమాలు వస్తున్నప్పుడు వాటిని నీరుగార్చేందుకు ప్రత్యర్థులు ఇలాంటి కుట్రలు పన్నుతుంటారని మండిపడ్డారు. అప్పట్లో బ్రిటిష్ పాలకులు అనుసరించిన విభజించి పాలించు అనే సిద్ధాంతాన్ని కొందరు ఇప్పుడు తమపై ప్రయోగిస్తున్నారని విమర్శించారు. ఉద్యమం చేస్తున్న వేర్వేరు బృందాల మధ్య చిచ్చుపెట్టి అసలు సమస్య నుంచి దృష్టి మళ్లించాలని చూస్తున్నారని ఆయన ఆగ్రహం వ్యక్తం చేశారు. రాబోయే రోజుల్లో అనుసరించాల్సిన వ్యూహంపై పార్టీ నాయకులతో చర్చించి త్వరలోనే తదుపరి నిర్ణయం ప్రకటిస్తామని ఆయన వెల్లడించారు.