Suryapet: తుంగతుర్తిలో ఎక్కడా ఒక్క మడి కూడా ఎండిపోలేదు

సూర్యాపేట జిల్లా: తుంగతుర్తి నియోజకవర్గంలో రైతులకు ఎలాంటి ఇబ్బందులు కలగకుండా చర్యలు తీసుకుంటున్నామని, సాగునీరు, విద్యుత్‌ సరఫరాపై ప్రత్యేక దృష్టి సారించామని తుంగతుర్తి ఎమ్మెల్యే మందుల సామేలు తెలిపారు. తిరుమలగిరిలోని ఎమ్మెల్యే క్యాంపు కార్యాలయంలో నిర్వహించిన మీడియా సమావేశంలో ఆయన మాట్లాడారు.

నియోజకవర్గ పరిధిలో మొత్తం 1,22,498 ఎకరాల్లో పంటలు సాగు చేస్తున్నారని, ఎక్కడా ఒక్క మడి కూడా ఎండిపోలేదని ఎమ్మెల్యే పేర్కొన్నారు. బీఆర్‌ఎస్‌ నాయకులు పనీపాటా లేకుండా రోడ్లపైకి వచ్చి అనవసరంగా ఆందోళనలు చేస్తున్నారని విమర్శించారు.

తుంగతుర్తిలో విద్యుత్‌ కోతలు లేవని, సాగునీటి విషయంలోనూ ఎలాంటి కొరత లేదని తెలిపారు. అక్కడక్కడ విద్యుత్‌ కోతలు ఉన్న మాట వాస్తవమేనని అంగీకరిస్తూనే, వాటి వల్ల రైతులకు ఇబ్బందులు కలగకుండా చూస్తున్నామని చెప్పారు. రైతులను కంటికి రెప్పలా కాపాడుకుంటామని భరోసా ఇచ్చారు.

నియోజకవర్గంలో 184 మంది పేదలకు ఇళ్ల నిర్మాణం చేపట్టినట్లు వెల్లడించారు. గత బీఆర్‌ఎస్‌ ప్రభుత్వంపై విమర్శలు చేస్తూ, దళిత బంధు పథకం పేరుతో దళితులకు అన్యాయం చేశారని ఆరోపించారు. గత ప్రభుత్వం రూ.8 వేల కోట్ల అప్పు తీసుకొచ్చి ప్రస్తుత ముఖ్యమంత్రి రేవంత్‌రెడ్డి నెత్తిన పెట్టిందని విమర్శించారు.

వడ్లు పండించే రైతుల సంక్షేమమే లక్ష్యం

ఇసుక పండించే నాయకుడు కావాలా, వడ్లు పండించే నాయకుడు కావాలా అనే ప్రశ్న ఎదురైనప్పుడు తుంగతుర్తి ప్రజలు తనను ఎన్నుకున్నారని సామేలు వ్యాఖ్యానించారు. నియోజకవర్గంలోని ఆరు మండలాలు పెసర్లు, కందులు, మినుములు వంటి పంటల సాగుకు అనుకూలంగా ఉన్నాయని తెలిపారు.

బీఆర్‌ఎస్‌లో అంతర్గత విభేదాలు

బీఆర్‌ఎస్‌ పార్టీ నాయకత్వంపై ఎమ్మెల్యే విమర్శలు గుప్పించారు. కేటీఆర్‌, కేసీఆర్‌, కవిత ఒక్కొక్కరు ఒక్కో దిక్కుగా ఉన్నారని ఎద్దేవా చేశారు. సొంత కొంపకు తామే నిప్పు పెట్టుకున్నట్లుగా బీఆర్‌ఎస్‌ పరిస్థితి తయారైందని విమర్శించారు.

రైతుల సంక్షేమం, సాగునీరు, విద్యుత్‌ సరఫరా విషయంలో ప్రభుత్వం బాధ్యతాయుతంగా వ్యవహరిస్తోందని ఎమ్మెల్యే మందుల సామేలు స్పష్టం చేశారు.