Suryapet: గమ్యం ఆగమాగం.. విద్యార్థుల ప్రాణాలతో ఆర్టీసీ ప్రమాదకర ప్రయాణం!

Suryapet: సూర్యాపేట పట్టణంలో విద్యాసంస్థల వేళల్లో సరిపడా ఆర్టీసీ బస్సులు లేకపోవడంతో విద్యార్థులు ఫుట్‌బోర్డులపై వేలాడుతూ ప్రాణాలను అరచేతిలో పెట్టుకుని ప్రయాణిస్తున్నారు.

PULUSU NAGARAJU, SURYAPETA
Published on: 20 Nov 2026 7:09 AM IST
Suryapet
X

Suryapet: గమ్యం ఆగమాగం.. విద్యార్థుల ప్రాణాలతో ఆర్టీసీ ప్రమాదకర ప్రయాణం!

సూర్యాపేట: పట్టణంలోని ఆర్టీసీ బస్సుల్లో విద్యార్థుల ప్రయాణం అత్యంత ప్రమాదకరంగా మారింది. విద్యాసంస్థల వేళల్లో విద్యార్థుల రద్దీకి అనుగుణంగా సరిపడా బస్సులు లేకపోవడంతో, వారు తప్పనిసరి పరిస్థితుల్లో బస్సుల ఫుట్‌బోర్డులపై వేలాడుతూ ప్రాణాలను అరచేతిలో పెట్టుకుని ప్రయాణించాల్సి వస్తోంది.

ప్రధానంగా ఉదయం పాఠశాలలు, కళాశాలలకు వెళ్లే సమయాల్లో మరియు సాయంత్రం తిరిగి ఇళ్లకు చేరుకునే వేళల్లో ఈ పరిస్థితి తీవ్రంగా కనిపిస్తోంది. బస్సుల్లో లోపల కనీసం నిలబడేందుకు కూడా చోటు లేకపోవడంతో విద్యార్థులు ఫుట్‌బోర్డులపైనే ప్రమాదకర రీతిలో నిలబడి ప్రయాణిస్తున్నారు. ఈ క్రమంలో రోడ్డుపై గుంతలు ఎదురైనా, డ్రైవర్ అకస్మాత్తుగా బ్రేక్ వేసినా విద్యార్థులు కిందపడి తీవ్రంగా గాయపడే లేదా ప్రాణాలు కోల్పోయే ప్రమాదం పొంచి ఉంది. ఇంత జరుగుతున్నా రద్దీని నియంత్రించే నాథుడే కరువయ్యారనే విమర్శలు వ్యక్తమవుతున్నాయి.

తమ పిల్లలు కళాశాలలకు క్షేమంగా వెళ్లి తిరిగి వస్తారని ఎదురుచూసే తల్లిదండ్రులు నిత్యం తీవ్ర ఆందోళన చెందుతున్నారు. విద్యార్థుల రద్దీని దృష్టిలో ఉంచుకుని అదనపు బస్సులను ఏర్పాటు చేయడంలో ఆర్టీసీ అధికారులు నిర్లక్ష్యం వహిస్తున్నారని విద్యార్థి సంఘాలు, తల్లిదండ్రులు ఆవేదన వ్యక్తం చేస్తున్నారు.

ఏదైనా పెను ప్రమాదం జరిగాక హడావుడిగా స్పందించడం కంటే, అధికారులు ముందే మేల్కొని విద్యాసంస్థల వేళల్లో అదనపు బస్సులు నడపాలని, విద్యార్థుల ఫుట్‌బోర్డ్ ప్రయాణానికి అడ్డుకట్ట వేసి వారి ప్రాణాలకు భద్రత కల్పించాలని పట్టణ ప్రజలు కోరుతున్నారు.

PULUSU NAGARAJU, SURYAPETA

PULUSU NAGARAJU, SURYAPETA