Nalgonda: గ్రాడ్యుయేట్ ఎమ్మెల్సీ బరిలో అశోక్ సార్ - కాంగ్రెస్, BRSపై విమర్శలు

నల్లగొండ: ​వరంగల్-ఖమ్మం-నల్గొండ పట్టభద్రుల ఎమ్మెల్సీ ఎన్నికల్లో స్వతంత్ర అభ్యర్థిగా పోటీ చేస్తున్నట్లు పాలకూరి అశోక్ ప్రకటించారు.నల్గొండలోని SBR గార్డెన్స్‌లో నిర్వహించిన విలేకరుల సమావేశంలో ఆయన మాట్లాడారు.​

గత ఎన్నికల్లో తన వల్ల ప్రధాన పార్టీలకు చుక్కలు కనిపించాయని, 30 వేల మొదటి ప్రాధాన్యత, 90 వేల రెండో ప్రాధాన్యత ఓట్లతో BRS ఓటమికి కారణమయ్యానని గుర్తుచేశారు.

కాంగ్రెస్ పార్టీ బీసీలకు హామీలిచ్చి మోసం చేసిందని, 90% ఉన్న SC, ST, BCలను పక్కనపెట్టి రెండు సీట్లను ఒకే వర్గానికి కేటాయించి "రెడ్డి కాంగ్రెస్"గా మారిందని మండిపడ్డారు.​పదిహేనేళ్లుగా నిరుద్యోగుల కోసం పోరాడి 18 కేసులు ఎదుర్కొన్నానని తెలిపారు.

తెలంగాణలో విద్యా, ఉద్యోగ రంగాలు ఇంకా ఆంధ్రుల కబ్జాలోనే ఉన్నాయని, "నాన్ లోకల్ గో బ్యాక్" నినాదంతో ఉద్యమిస్తానన్నారు.నిరుద్యోగులు, బీసీలు తనకు అండగా నిలవాలని ఆయన పిలుపునిచ్చారు.