Suryapet: 60 ఫీట్ల రోడ్డుపై టిప్పర్ల ఇష్టారాజ్యం.. విద్యార్థుల ఆందోళన!

Suryapet: సూర్యాపేట 60 ఫీట్ల రోడ్డు విద్యాసంస్థల జోన్‌లో టిప్పర్ల రాకపోకలతో విద్యార్థులు భయాందోళన చెందుతున్నారు.

PULUSU NAGARAJU, SURYAPETA
Published on: 21 Nov 2026 11:40 AM IST
Suryapet
X

Suryapet: 60 ఫీట్ల రోడ్డుపై టిప్పర్ల ఇష్టారాజ్యం.. విద్యార్థుల ఆందోళన!

Suryapet: పట్టణంలోని 60 ఫీట్ల రోడ్డుపై భారీ వాహనాలు, ముఖ్యంగా టిప్పర్ల రాకపోకలు ఇష్టారాజ్యంగా సాగుతున్నాయి. ఈ మార్గంలో పలు ప్రముఖ పాఠశాలలు, కళాశాలలు ఉండటంతో ఇది పూర్తిగా విద్యాసంస్థల జోన్‌గా ఉంది. అయినప్పటికీ, ఎలాంటి నియంత్రణ లేకుండా భారీ వాహనాలు అతివేగంతో దూసుకెళ్తుండటంతో స్థానికులు, విద్యార్థుల తల్లిదండ్రులు తీవ్ర భయాందోళనలకు గురవుతున్నారు.

విద్యార్థుల భద్రతకు పొంచి ఉన్న ముప్పు

ఉదయం, సాయంత్రం వేళల్లో పాఠశాలలు, కళాశాలలకు వెళ్లే విద్యార్థులు, వారిని దింపడానికి వచ్చే తల్లిదండ్రులు, ఉపాధ్యాయులతో ఈ రహదారి అత్యంత రద్దీగా ఉంటుంది. ముఖ్యంగా సైకిళ్లపై స్కూళ్లకు వెళ్లే చిన్నారులు ఈ భారీ టిప్పర్ల మధ్య బిక్కుబిక్కుమంటూ ప్రయాణించాల్సిన దుస్థితి నెలకొంది. ఇరుకైన రద్దీ సమయంలో భారీ వాహనాలు రావడంతో ట్రాఫిక్ జామ్ ఏర్పడటమే కాకుండా, ఏ క్షణాన ఏ ప్రమాదం జరుగుతుందోనని అందరూ ఆందోళన చెందుతున్నారు.

బీబీగూడెం ఘటనతో పెరిగిన ఆగ్రహం

నిన్న బీబీగూడెం వద్ద స్కూటీపై వెళ్తున్న ఇద్దరు ఉపాధ్యాయులను టిప్పర్ ఢీకొట్టడంతో వారు అక్కడికక్కడే దుర్మరణం పాలైన ఘటన పట్టణంలో విషాదాన్ని నింపింది. ఈ దుర్ఘటన నేపథ్యంలో 60 ఫీట్ల రోడ్డుపై తిరుగుతున్న టిప్పర్ల విషయంలో ప్రజల నుంచి తీవ్ర వ్యతిరేకత వ్యక్తమవుతోంది.

అధికారులు తక్షణమే స్పందించాలి

ఇప్పటికైనా పోలీసు, రవాణా శాఖ అధికారులు తక్షణమే స్పందించి చర్యలు తీసుకోవాలని స్థానికులు, విద్యార్థి సంఘాలు, తల్లిదండ్రులు కోరుతున్నారు. ముఖ్యంగా ఉదయం 8 గంటల నుండి సాయంత్రం 6 గంటల వరకు విద్యాసంస్థల జోన్‌లో భారీ వాహనాలు, టిప్పర్ల రాకపోకలపై పూర్తిస్థాయి నిషేధం విధించాలని, నిబంధనలు ఉల్లంఘించిన వారిపై కఠిన చర్యలు తీసుకోవాలని ప్రజలు విజ్ఞప్తి చేస్తున్నారు.

PULUSU NAGARAJU, SURYAPETA

PULUSU NAGARAJU, SURYAPETA