Suryapet: డ్రగ్స్ నిర్మూలనే లక్ష్యంగా ఈగల్ టీం ర్యాలీ.. సూర్యాపేటలో స్వాగతం

సూర్యాపేట: జాతీయ ఐక్యతను చాటుతూ, మాదక ద్రవ్యాల నిర్మూలనపై అవగాహన కల్పించేందుకు ఆంధ్రప్రదేశ్ నుండి గుజరాత్ వరకు చేపట్టిన ఈగల్ టీం ర్యాలీ సూర్యాపేట జిల్లాకు చేరుకుంది.

ఈ బృందానికి సూర్యాపేట డీఎస్పీ ప్రసన్న కుమార్, పట్టణ ఇన్‌స్పెక్టర్ వెంకటయ్య ఘనంగా స్వాగతం పలికారు.

ఈ సందర్భంగా పోలీసు అధికారులు మాట్లాడుతూ మాదక ద్రవ్యాలు, గంజాయి వంటి మత్తు పదార్థాల నిర్మూలన, జాతీయ ఐక్యత, సమగ్రతను చాటడమే ఈ ర్యాలీ ప్రధాన ఉద్దేశమని తెలిపారు. మత్తు పదార్థాల వినియోగం యువత భవిష్యత్తును నాశనం చేస్తుందని, డ్రగ్స్ మహమ్మారిని అరికట్టేందుకు ప్రతి ఒక్కరూ బాధ్యతగా ముందుకు రావాలని పిలుపునిచ్చారు.

ఈ బృందం గుజరాత్ రాష్ట్రంలోని సబర్మతి నది తీరంలో ఈ నెల 31న నిర్వహించనున్న జాతీయ ఐక్యతా దినోత్సవ కార్యక్రమాల్లో పాల్గొననుంది.

దేశ ఐక్యత, సమగ్రతను కాపాడటంతో పాటు డ్రగ్స్, గంజాయిని పూర్తిగా నిర్మూలించేందుకు ప్రభుత్వ శాఖలు, పోలీసు యంత్రాంగం, యువత, ప్రజలు సమష్టిగా కృషి చేయాలని అధికారులు పిలుపునిచ్చారు.