Thungathurthi: డిసెంబర్ 31లోగా 100 పడకల ఆసుపత్రి పూర్తి: ఎమ్మెల్యే

సూర్యాపేట జిల్లా: తుంగతుర్తి నియోజకవర్గం లో ప్రజలకు నాణ్యమైన విద్య, వైద్యం అందించడమే ప్రభుత్వ ప్రధాన లక్ష్యంగా ఉండాలని తుంగతుర్తి ఎమ్మెల్యే మందుల సామేలు అన్నారు. విద్య, వైద్యం ప్రతి ఒక్కరికీ అందాల్సిన మౌలిక హక్కులని, పేద, మధ్యతరగతి ప్రజలకు ఉచితంగా నాణ్యమైన సేవలు అందించేందుకు ప్రభుత్వం ప్రత్యేక ప్రాధాన్యత ఇవ్వాలని పేర్కొన్నారు.

తుంగతుర్తి నియోజకవర్గంలో నిర్మిస్తున్న 100 పడకల ఆసుపత్రి పనులను డిసెంబర్ 31వ తేదీలోగా పూర్తి చేసి ప్రజలకు అందుబాటులోకి తీసుకురావాలని కాంట్రాక్టర్లను ఆదేశించారు. ఆసుపత్రి నిర్మాణంలో నాణ్యతా ప్రమాణాలు తప్పనిసరిగా పాటించాలని, పనుల్లో ఎలాంటి నిర్లక్ష్యం వహించినా బాధ్యత వహించాల్సి ఉంటుందని హెచ్చరించారు.

ఈ సందర్భంగా ఎమ్మెల్యే మాట్లాడుతూ.. ప్రజల ఆశీర్వాదంతో ఎమ్మెల్యేగా ఎన్నికైన తర్వాత నియోజకవర్గ ప్రజలకు చిరకాలం గుర్తుండిపోయే విధంగా ఒక మంచి వైద్య సంస్థను ఏర్పాటు చేయాలనే సంకల్పంతో 100 పడకల ఆసుపత్రి నిర్మాణానికి భూమిపూజ చేసినట్లు తెలిపారు. నిర్మాణ పనులు ఎలాంటి ఆటంకాలు లేకుండా కొనసాగేందుకు సంబంధిత మంత్రి సహకారంతో ప్రత్యేకంగా కృషి చేస్తున్నట్లు వెల్లడించారు.

ముఖ్యమంత్రి రేవంత్ రెడ్డి నాయకత్వంలో రాష్ట్ర ప్రభుత్వం వైద్య రంగానికి పెద్దపీట వేస్తోందని, హైదరాబాద్‌లోని ఉస్మానియా ఆసుపత్రి స్థానంలో హెరిటేజ్‌ను కాపాడుతూ సుమారు రూ.2 వేల కోట్ల వ్యయంతో 2 వేల పడకల సామర్థ్యంతో నూతన ఆసుపత్రి నిర్మాణం చేపడుతున్నట్లు వివరించారు. వైద్య ఆరోగ్య శాఖ మంత్రి రాజనర్సింహ సహకారంతో ఇప్పటివరకు వివిధ హోదాల్లో సుమారు 9 వేల ఉద్యోగ నియామకాలు చేపట్టారని, మరోసారి 2 వేలకుపైగా నర్సింగ్ పోస్టుల భర్తీకి నోటిఫికేషన్ విడుదల చేయనున్నట్లు తెలిపారు.

విద్యారంగ అభివృద్ధికి ప్రత్యేక చర్యలు

తుంగతుర్తి నియోజకవర్గంలో విద్యారంగ అభివృద్ధికి కూడా ప్రత్యేక చర్యలు చేపడుతున్నట్లు ఎమ్మెల్యే వివరించారు. తుంగతుర్తిలో 2024 ఆగస్టు 15న ప్రారంభించిన జూనియర్ కళాశాలలో తొలుత 20 మంది విద్యార్థులు ఉండగా, ప్రస్తుతం 270 మంది పేద విద్యార్థులు ఉచితంగా విద్యనభ్యసిస్తున్నారని తెలిపారు.

అలాగే అడ్డగూడూరు మండలంలోని ఇండస్ట్రియల్ పార్క్ సమీపంలో 185 ఎకరాల విస్తీర్ణంలో అడ్వాన్స్‌డ్ టెక్నాలజీ సెంటర్ (ఏటీసీ) ఏర్పాటు చేసినట్లు చెప్పారు. నూతనకల్ మండల కేంద్రంలోనూ జూనియర్ కళాశాల ఏర్పాటు చేసేందుకు ప్రణాళికలు రూపొందిస్తున్నట్లు వెల్లడించారు.

పేదలకు ఉచిత విద్య, వైద్యం అందాలి

తుంగతుర్తి నియోజకవర్గంలో ఎక్కువగా మధ్యతరగతి కుటుంబాలు, చిన్న, సన్నకారు రైతులు, కష్టపడి జీవించే సామాన్య ప్రజలు ఉన్నారని, వారికి మెరుగైన వైద్య సేవలు అందుబాటులోకి తీసుకురావడం ఎంతో అవసరమని ఎమ్మెల్యే పేర్కొన్నారు. 100 పడకల ఆసుపత్రి అందుబాటులోకి వస్తే పేద, మధ్యతరగతి కుటుంబాలకు ఎంతో మేలు జరుగుతుందని ఆశాభావం వ్యక్తం చేశారు.

విద్య, వైద్యం కోసం పేదలు ఆర్థిక ఇబ్బందులు ఎదుర్కోకుండా ప్రభుత్వం ఉచితంగా నాణ్యమైన సేవలు అందించాలని, అప్పుడే సమాజంలో అభివృద్ధి, నాగరికత మరింత పెరుగుతాయని అన్నారు. రాష్ట్ర ప్రభుత్వం విద్య, వైద్య రంగాలకు మరింత ప్రాధాన్యత ఇచ్చి ప్రజల సంక్షేమానికి కృషి చేయాలని ఎమ్మెల్యే కోరారు.