Pawan Kalyan: రోడ్డు ధ్వంసం.. నాన్ బెయిలబుల్ కేసుకు పవన్ ఆదేశం

Pawan Kalyan: ప్రజాధనంతో నిర్మించిన రహదారిని ధ్వంసం చేసిన ఘటనపై ఏపీ ఉప ముఖ్యమంత్రి, పంచాయతీరాజ్, గ్రామీణాభివృద్ధి శాఖ మంత్రి పవన్ కల్యాణ్ తీవ్రంగా స్పందించారు. తిరుపతి జిల్లా పుల్లంపేట మండలంలోని అనంతసముద్రం, పాపక్కగారిపల్లె గ్రామాల మధ్య నిర్మించిన రోడ్డును ధ్వంసం చేసినట్లు ఆరోపణలు ఎదుర్కొంటున్న వైఎస్సార్‌సీపీ నాయకుడు సుబ్బారెడ్డితో పాటు బాధ్యులపై నాన్ బెయిలబుల్ కేసు నమోదు చేయాలని అధికారులను ఆదేశించారు. ప్రభుత్వ ఆస్తులకు నష్టం కలిగించిన వారి నుంచి మరమ్మతుల ఖర్చును కూడా రికవరీ చేయాలని స్పష్టం చేశారు.

రూ.4.75 కోట్లతో నిర్మించిన రోడ్డు ధ్వంసం

ప్రభుత్వం ప్రతిష్ఠాత్మకంగా చేపట్టిన ‘పల్లె పండుగ 3.0’ కార్యక్రమంలో భాగంగా ఈ రహదారిని నిర్మించారు. సుమారు రూ.4.75 కోట్ల వ్యయంతో నిర్మించిన రోడ్డు పనులు వారం రోజుల క్రితమే పూర్తయినట్లు అధికారులు తెలిపారు. అయితే, సుమారు 100 మీటర్ల మేర రోడ్డును ట్రాక్టర్‌తో దున్ని ధ్వంసం చేసినట్లు గ్రామస్థులు ఫిర్యాదు చేశారు. సుబ్బారెడ్డి మరో వ్యక్తి వెంకటసుబ్బారెడ్డి సహాయంతో ఈ చర్యకు పాల్పడినట్లు ఫిర్యాదులో పేర్కొన్నారని అధికారులు వెల్లడించారు.

బాధ్యులపై కఠిన చర్యలకు ఆదేశం

ఈ ఘటనపై పంచాయతీరాజ్, గ్రామీణాభివృద్ధి శాఖకు చెందిన ఉన్నతస్థాయి ఇంజినీరింగ్ అధికారులతో పవన్ కల్యాణ్ సమీక్ష నిర్వహించారు. ప్రజల సౌకర్యం కోసం ప్రభుత్వ నిధులతో నిర్మించిన మౌలిక వసతులను ధ్వంసం చేయడం తీవ్రమైన నేరమని పేర్కొన్నారు. ఘటనకు బాధ్యులైన వారితో పాటు వారికి సహకరించిన వ్యక్తులపైనా చట్టప్రకారం చర్యలు తీసుకోవాలని ఆదేశించారు. ప్రభుత్వ ఆస్తులకు నష్టం కలిగించిన వారి వివరాలను ప్రజలకు తెలియజేయాలని సూచించారు.

నష్టపరిహారం వసూలు చేయాలని సూచన

రోడ్డును ధ్వంసం చేసిన వారిపై నాన్ బెయిలబుల్ అభియోగాలు నమోదు చేయడంతో పాటు, నష్టపరిహారాన్ని రెవెన్యూ రికవరీ చట్టం కింద వసూలు చేసే చర్యలు చేపట్టాలని పవన్ కల్యాణ్ అధికారులకు స్పష్టం చేశారు. గ్రామస్థులు ఇచ్చిన సమాచారం ఆధారంగా ఇప్పటికే ఎఫ్‌ఐఆర్ నమోదు చేసినట్లు అధికారులు తెలిపారు. నిందితులను అరెస్టు చేసి మేజిస్ట్రేట్ ఎదుట హాజరుపరిచేందుకు చర్యలు తీసుకుంటున్నట్లు వెల్లడించారు.

గ్రామీణ ప్రాంతాల్లో రహదారులు, ఇతర మౌలిక వసతుల అభివృద్ధి కోసం ప్రభుత్వం ప్రజాధనాన్ని ఖర్చు చేస్తున్న నేపథ్యంలో వాటిని పరిరక్షించడం ప్రతి ఒక్కరి బాధ్యతని ఈ సందర్భంగా అధికారులు పేర్కొన్నారు. ఈ ఘటనపై దర్యాప్తు, తదుపరి చట్టపరమైన చర్యలు ఎలా సాగుతాయన్నది ఆసక్తికరంగా మారింది.