Cast Away Movie: అత్యంత అరుదైన సినిమా... ఎలా సర్వైవ్‌ కావాలంటే

Cast Away Movie: ఒక మనిషి చుట్టూ ఎవరూ లేకుండా నిర్జన ద్వీపంలో చిక్కుకుపోతే ఏం చేస్తాడు? తినడానికి ఆహారం లేదు.. తాగడానికి నీరు లేదు.. ప్రమాదం నుంచి రక్షించేవారు కనిపించరు. అలాంటి పరిస్థితుల్లో ప్రాణాలను కాపాడుకోవడమే కాదు.. ఒంటరితనాన్ని తట్టుకుని మళ్లీ జీవితంపై ఆశ పెంచుకోవడం ఎంత కష్టమో చూపించిన చిత్రమే ‘కాస్ట్ అవే’. హాలీవుడ్‌ నటుడు టామ్‌ హాంక్స్‌ ప్రధాన పాత్రలో నటించిన ఈ సినిమా కేవలం సర్వైవల్‌ డ్రామా మాత్రమే కాదు. మనిషి జీవితం, ప్రేమ, కాలం, విధి గురించి ఆలోచింపజేసే కథ.

విమాన ప్రమాదం.. నిర్జన ద్వీపంలో ఒంటరి ప్రయాణం

దర్శకుడు రాబర్ట్‌ జెమెకిస్‌ రూపొందించిన ‘కాస్ట్ అవే’ 2000లో ప్రేక్షకుల ముందుకొచ్చింది. విలియం బ్రాయిల్స్‌ జూనియర్‌ కథను అందించగా, డాన్‌ బర్గెస్‌ సినిమాటోగ్రఫీ, అలన్‌ సిల్వెస్ట్రీ సంగీతం ఈ చిత్రానికి ప్రత్యేక ఆకర్షణగా నిలిచాయి. ఇందులో చక్‌ నోలాండ్‌ (టామ్‌ హాంక్స్‌) ఫెడెక్స్‌ సంస్థలో పనిచేస్తుంటాడు. పని ఒత్తిడితో నిరంతరం ప్రయాణాలు చేసే అతడు, క్రిస్మస్‌ సమయంలోనూ విధి నిర్వహణ కోసం విమానం ఎక్కుతాడు. త్వరలోనే తన ప్రేయసి కెల్లీ (హెలెన్‌ హంట్‌) వద్దకు తిరిగి వస్తానని మాట ఇస్తాడు. కానీ పసిఫిక్‌ మహాసముద్రంలో విమానం ప్రమాదానికి గురవడంతో అతడి జీవితం ఒక్కసారిగా మారిపోతుంది. విమాన ప్రమాదం నుంచి ప్రాణాలతో బయటపడిన చక్‌ ఓ నిర్జన ద్వీపానికి చేరుకుంటాడు. అక్కడ మనుషుల జాడ ఉండదు. ఆహారం సంపాదించడం, మంట పెట్టడం, వర్షం నుంచి రక్షించుకోవడం వంటి కనీస అవసరాల కోసం అతడు పోరాడాల్సి వస్తుంది. రోజులు గడిచేకొద్దీ ఒంటరితనం అతడిని మానసికంగా కుంగదీస్తుంది. ఆ సమయంలో ఒక వాలీబాల్‌కు ముఖం గీసి 'విల్సన్‌' అని పేరు పెట్టుకుంటాడు. ఆ బంతినే తన స్నేహితుడిగా భావిస్తూ మాట్లాడుకుంటాడు. మాటలతో చెప్పలేని ఒంటరితనాన్ని ఈ చిన్న పాత్ర ప్రేక్షకులకు బలంగా చేరవేస్తుంది.

నాలుగేళ్ల పోరాటం.. తిరిగొచ్చాక మరో పరీక్ష

ద్వీపంలో సుమారు నాలుగేళ్లు గడిపిన తర్వాత చక్‌ అక్కడి నుంచి బయటపడేందుకు తెప్పను తయారు చేసుకుంటాడు. సముద్రంతో పోరాడి చివరకు రక్షించబడతాడు. అయితే అతడు తిరిగి వచ్చినప్పుడు ఎదురయ్యే పరిస్థితి మరో పెద్ద దెబ్బ. చక్‌ మరణించాడని భావించిన కెల్లీ, కాలక్రమంలో మరో వ్యక్తిని వివాహం చేసుకుని కుటుంబ జీవితాన్ని ప్రారంభిస్తుంది. ఇందులో ఆమెను తప్పుబట్టలేం. ఎందుకంటే చక్‌ తిరిగి వస్తాడనే నమ్మకంతో జీవితాంతం ఎదురుచూడటం ఆమెకు సాధ్యం కాదు. తన ప్రేయసిని మళ్లీ కలుసుకున్న చక్‌కు ప్రేమ ఉన్నప్పటికీ, గతంలో ఉన్న జీవితాన్ని తిరిగి పొందలేననే వాస్తవం అర్థమవుతుంది. ఇద్దరి మధ్య భావోద్వేగం ఉన్నా, కాలం తెచ్చిన మార్పులను అంగీకరించాల్సి వస్తుంది. ఈ సన్నివేశాలు సినిమా భావోద్వేగానికి కేంద్రంగా నిలుస్తాయి.

చివర్లో ఎదురయ్యే ప్రశ్న.. ఏ దారి ఎంచుకోవాలి?

చివరి సన్నివేశంలో చక్‌ ఓ కూడలి వద్ద నిలబడతాడు. నాలుగు దారుల మధ్య ఏ మార్గంలో ముందుకు వెళ్లాలనే ఆలోచనలో ఉంటాడు. అతడి ముందు ఉన్నది కేవలం రహదారుల ఎంపిక కాదు.. కొత్త జీవితాన్ని ప్రారంభించాల్సిన పరిస్థితి. గతాన్ని వెనక్కి వదిలి భవిష్యత్తును ఎదుర్కోవాల్సిన సమయం. ఈ సినిమా చెప్పే ప్రధాన విషయం ఒక్కటే. మనం జీవితాన్ని పూర్తిగా మన నియంత్రణలో ఉంచుకోలేం. ప్రేమించిన వ్యక్తులు దూరమవ్వొచ్చు. ఆర్థిక పరిస్థితులు మారొచ్చు. అనుకోని ప్రమాదాలు జీవితాన్ని తలకిందులు చేయొచ్చు. కానీ ఏం జరిగినా ముందుకు సాగడానికి ప్రయత్నించడమే మనిషి చేతిలో ఉన్న మార్గం.

టామ్‌ హాంక్స్‌ నటన, ముఖ్యంగా ద్వీపంలో ఒంటరిగా గడిపే సన్నివేశాలు ఈ సినిమాకు ప్రాణం పోశాయి. పెద్దగా సంభాషణలు లేకుండానే భావాలను పలికించిన ఆయన నటన ప్రేక్షకులను కథలోకి తీసుకెళ్తుంది. అందుకే ‘కాస్ట్ అవే’ సినిమా ముగిసిన తర్వాత కూడా మనసులో నిలిచిపోతుంది. కొన్నిసార్లు మనిషి కోల్పోయేది తన గతాన్ని మాత్రమే కాదు.. ఆ గతంతో ముడిపడిన భవిష్యత్తును కూడా. అయినప్పటికీ జీవితం అక్కడితో ముగియదని గుర్తుచేసే అరుదైన చిత్రమిది.