Allu Arjun: త్వరలో 'రాకా' నుంచి అప్‌డేట్.. ఫ్యాన్స్‌కు హామీ ఇచ్చిన అల్లు అర్జున్!

Allu Arjun: 'రాకా' నుంచి త్వరలో అప్‌డేట్ ఇస్తామని, సినిమా ఆలస్యమవుతున్నదని తనకు తెలుసని అల్లు అర్జున్ 'ఆకాశంలో ఒక తార' ప్రీరిలీజ్ ఈవెంట్‌లో అభిమానులకు చెప్పారు.

Ravi
By Ravi
Published on: 16 Nov 2026 8:26 AM IST
Allu Arjun
X

Allu Arjun: త్వరలో 'రాకా' నుంచి అప్‌డేట్.. ఫ్యాన్స్‌కు హామీ ఇచ్చిన అల్లు అర్జున్!

Allu Arjun: అట్లీ దర్శకత్వంలో తెరకెక్కుతున్న 'రాకా' మూవీ నుంచి త్వరలో అప్‌డేట్ ఇస్తామని హీరో అల్లు అర్జున్ చెప్పారు. మూవీ అప్‌డేట్ ఇవ్వాలని ఫ్యాన్స్ అడగగా ఇప్పటికే ఆలస్యమవుతోందని తనకు తెలుసని, బెస్ట్ ఔట్‌పుట్ ఇవ్వాలని చూస్తున్నామని 'ఆకాశంలో ఒక తార' ప్రీరిలీజ్ ఈవెంట్‌లో తెలిపారు. ఇక స్టార్ కిడ్ అయినప్పటికీ దుల్కర్ అందరితోనూ కలుపుకొని వెళ్తారన్నారు. ఆ క్వాలిటీనే ఆయనకు మరింత సక్సెస్ ఇస్తోందని చెప్పారు.

నవంబర్ 15న హైదరాబాద్‌లోని జేఆర్‌సీ కన్వెన్షన్‌లో సాయంత్రం 5 గంటల నుంచి ఈ వేడుక జరిగింది. దుల్కర్ సల్మాన్ హీరోగా నటించిన 'ఆకాశంలో ఒక తార' చిత్రానికి అల్లు అర్జున్ ముఖ్య అతిథిగా హాజరయ్యారు. ఇద్దరు స్టార్లు ఒకే వేదికపై కనిపించడంతో అభిమానుల్లో ఉత్సాహం నెలకొంది. ఈ సందర్భంగా అల్లు అర్జున్ సినిమా బృందానికి శుభాకాంక్షలు తెలిపారు.

ఈవెంట్‌లో అభిమానులు 'రాకా' అప్‌డేట్ గురించి అడిగారు. దీనికి స్పందించిన అల్లు అర్జున్, సినిమా అనుకున్న దానికంటే ఎక్కువ సమయం తీసుకుంటోందని తనకు తెలుసని అంగీకరించారు. సినిమా విడుదలయ్యాక దాని గురించి ఎలాంటి చర్చ లేకుండా ఉండేలా ఉత్తమ ఫలితాన్ని ఇవ్వాలన్నదే తమ లక్ష్యమన్నారు. టీమ్ కష్టపడి పనిచేస్తోందని, అభిమానులు కొంచెం ఓపిక పట్టాలని కోరారు. మంచి కంటెంట్ ఇస్తామని హామీ ఇచ్చారు.

'పుష్ప 2' విజయం తర్వాత అల్లు అర్జున్, అట్లీ కాంబినేషన్‌లో వస్తున్న 'రాకా'పై భారీ అంచనాలు ఉన్నాయి. సన్ పిక్చర్స్ నిర్మిస్తున్న ఈ సినిమాలో దీపికా పదుకొణె కథానాయికగా నటిస్తున్నట్లు రిపోర్టులు చెబుతున్నాయి. సైన్స్ ఫిక్షన్ నేపథ్యంతో రూపొందుతున్న ఈ చిత్రంలో బన్నీ బహుళ పాత్రల్లో కనిపిస్తారన్న ప్రచారం ఉంది. అయితే చిత్రబృందం ఇప్పటివరకు ఎలాంటి భారీ అప్‌డేట్ ఇవ్వకపోవడంతో అభిమానులు ఎదురుచూస్తున్నారు.

ఇక 'ఆకాశంలో ఒక తార' విషయానికొస్తే, పవన్ సాదినేని దర్శకత్వంలో ఇది ఎమోషనల్ డ్రామాగా రూపొందింది. ఒక గ్రామీణ యువతి వ్యోమగామి కావాలని కలలు కనే ప్రయాణం ఇందులో చూపించారు. కొత్త నటి సాత్విక వీరవల్లి ఈ సినిమాతో కథానాయికగా పరిచయమవుతున్నారు. శ్రుతి హాసన్, రుహానీ శర్మ కీలక పాత్రల్లో నటించారు. జీవీ ప్రకాశ్ కుమార్ సంగీతం అందించగా, గీతా ఆర్ట్స్, స్వప్న సినిమా, లైట్‌బాక్స్ మీడియా సంస్థలపై సందీప్ గుణ్ణం, రమ్య గుణ్ణం నిర్మించారు.

ఈ చిత్రం నవంబర్ 20న తెలుగు, తమిళం, హిందీ, మలయాళ భాషల్లో ఒకేసారి థియేటర్లలోకి రానుంది. ఇప్పటికే విడుదలైన టీజర్, రెండు పాటలకు మంచి స్పందన వచ్చింది. అల్లు అర్జున్ హాజరు ఈ సినిమాపై ఆసక్తిని మరింత పెంచింది. ఇక 'రాకా' అప్‌డేట్ ఎప్పుడు వస్తుందా అని అభిమానులు ఆసక్తిగా చూస్తున్నారు.

Ravi

Ravi

2017లో వెబ్ జర్నలిస్ట్‌గా నా కెరీర్ ప్రారంభించాను. పలు వెబ్‌సైట్స్‌లో కంటెంట్ రైటర్‌గా పని చేశాను. డిజిటల్ మీడియాలో 7 ఏళ్ళకుపైగా అనుభవం ఉంది. ట్రెండింగ్, బిజినెస్, ఆంధ్రప్రదేశ్ & తెలంగాణకు సంబంధించి బ్రేకింగ్ కంటెంట్ రాస్తుంటాను.