Bharathanatyam Review: ఒకేలా ఉన్న ఇద్దరు.. ఇంట్లో ఇంత గందరగోళమా.?

Bharathanatyam Review: విభిన్నమైన కథలను, వైవిధ్యమైన పాత్రలను ఎంచుకుంటూ మలయాళ చిత్రసీమలో తనకంటూ ప్రత్యేక గుర్తింపు తెచ్చుకున్న నటుడు సైజు కురుప్. ఆయన కథానాయకుడిగా నటించిన తాజా ఫ్యామిలీ కామెడీ డ్రామా 'భరత్ నాట్యం'. 2024 ఆగస్టు 30న థియేటర్లలో విడుదలై ప్రేక్షకుల ఆదరణ పొందిన ఈ చిత్రం, ప్రస్తుతం ప్రముఖ ఓటీటీ ప్లాట్‌ఫామ్ 'ఆహా'లో అందుబాటులోకి వచ్చింది.

కుటుంబ నేపథ్యం.. ఊహించని మలుపు.

రిటైర్డ్ ఉద్యోగి భరత్ నాయుడు (సాయికుమార్) తన భార్య సరస్వతి, పెద్ద కొడుకు శశిధర్ (సైజు కురుప్), చిన్న కొడుకు అరుణ్, పెద్ద కుమార్తె దంపతులతో కలిసి ఒకే ఉమ్మడి కుటుంబంలో జీవిస్తుంటాడు. ఆర్థిక సమస్యల వల్ల చిన్న కుమార్తె కుటుంబం కూడా అదే ఇంటికి చేరుతుంది. పొలాలు, తోటల వ్యవహారాలను పెద్ద కొడుకు శశిధరే పర్యవేక్షిస్తుంటాడు.

అన్నీ సజావుగా సాగుతున్న సమయంలో భరత్ నాయుడికి అకస్మాత్తుగా గుండెపోటు వస్తుంది. ఆసుపత్రిలో మరణంతో పోరాడుతున్న సమయంలో ఆయన శశిధర్‌ను పిలిచి, తనకు రుక్మిణి అనే రెండో భార్య, అజయ్ అనే కుమారుడు ఉన్నారని వెల్లడిస్తాడు. జీవిత చరమాంకంలో వారిని ఒక్కసారి చూడాలని ఉందంటూ చివరి కోరిక కోరతాడు. తండ్రి కోరికను నెరవేర్చడానికి శశిధర్ తన తల్లిని ఒప్పించి, శ్రీకంఠపురం నుంచి రుక్మిణి, అజయ్‌లను ఇంటికి తీసుకొస్తాడు.

ట్విస్టులు.. ఆస్తుల చుట్టూ తిరిగే హైడ్రామా

విషయం ఇక్కడే ఊహించని మలుపు తిరుగుతుంది. శశిధర్ రెండో కుటుంబాన్ని తీసుకొచ్చిన తర్వాత భరత్ నాయుడు అనూహ్యంగా కోలుకుంటాడు. దీంతో ఆ రెండో కుటుంబాన్ని రహస్యంగా ఇంట్లోని పై గదిలోనే దాచిపెట్టి, ఊరి జనులకు తెలియకుండా మేనేజ్ చేయడానికి శశిధర్ నానా తంటాలు పడతాడు. ఈ క్రమంలోనే మొదటి భార్య సరస్వతితో తండ్రి పెళ్లికి ఎలాంటి లీగల్ ఆధారాలు లేవని, రెండో భార్య రుక్మిణితోనే పక్కా రిజిస్ట్రేషన్ పత్రాలు ఉన్నాయని శశిధర్‌కు తెలుస్తుంది. ఆస్తి మొత్తం రెండో కుటుంబం పాలు అవుతుందేమోనన్న భయంతో శశిధర్ ఏం చేశాడు, చివరికి ఆ ఆస్తి ఎవరికి దక్కింది అనేదే మిగతా కథ.

కామెడీ టైమింగ్, మెప్పించే కథనం

ఉమ్మడి కుటుంబంలోని బాధ్యతలు, తండ్రి సీరియస్ కావడం, సెకండ్ ఫ్యామిలీ ఎంట్రీ వంటి సన్నివేశాలతో ప్రథమార్థం సాగగా.. రెండో భార్య కుటుంబాన్ని దాచడానికి శశిధర్ పడే పాట్లు, ఆస్తిపై అభద్రతా భావంతో సాగే కామెడీ సన్నివేశాలతో ద్వితీయార్థం నవ్వులు పూయిస్తుంది. ముఖ్యంగా మొదటి భార్య చిన్న కొడుకు అరుణ్, రెండో భార్య కొడుకు అజయ్‌లు ఒకేలా (ట్విన్స్) ఉండటం ఈ సినిమాకు అతిపెద్ద ప్లస్ పాయింట్. వీరిద్దరూ ఊరిలో ఎక్కడైనా ఎదురైతే కన్ఫ్యూజ్ అయ్యే డ్రామా ప్రేక్షకులను విపరీతంగా అలరిస్తుంది.

సందేశం, సాంకేతిక బలం

ఆశలు, ఆస్తుల కోసం మనుషుల ప్రవర్తన ఎలా మారుతుంది అనే అంశాన్ని దర్శకుడు చాలా సహజంగా తెరకెక్కించాడు. ఆస్తుల కంటే బంధాలు, అనుబంధాలే గొప్పవని, ఎదుటివారి బలహీనతలను స్వీకరించడమే నిజమైన ప్రేమ అని ఈ చిత్రం చక్కటి సందేశాన్ని ఇస్తుంది. బబ్లూ ఛాయాగ్రహణం, శామ్యూల్ సంగీతం, షఫీక్ కూర్పు కథకు తగినట్లుగా కుదిరాయి. నటీనటులందరూ తమ పాత్రల్లో ఒదిగిపోయారు. కుటుంబ సమేతంగా హాయిగా నవ్వుకుంటూ చూడదగ్గ చక్కటి వినోదాత్మక చిత్రం 'భరత్ నాట్యం'.