Narsapur: మెదక్ జిల్లా పోలీస్ క్రికెట్ టోర్నీ విజేతగా 'యంగ్ స్టార్'

నర్సాపూర్: యువతలో క్రీడాస్ఫూర్తిని పెంపొందించడంతో పాటు, వారిని చెడు వ్యసనాలకు దూరంగా ఉంచాలనే లక్ష్యంతో నర్సాపూర్ పోలీసుల ఆధ్వర్యంలో నిర్వహించిన మెదక్ జిల్లా పోలీస్ క్రికెట్ టోర్నమెంట్ ముగిసింది. ఈ టోర్నమెంట్‌లో భాగంగా ఈరోజు నిర్వహించిన హోరాహోరీ ఫైనల్ మ్యాచ్‌లో యంగ్ స్టార్ జట్టు విజయం సాధించి విజేతగా నిలిచింది.

ఫైనల్ పోరులో సహారా ఇండియన్ జట్టు, యంగ్ స్టార్ జట్టు తలపడగా, ఉత్కంఠభరితంగా సాగిన మ్యాచ్‌లో యంగ్ స్టార్ జట్టు ప్రత్యర్థిపై విజయం సాధించింది. దీంతో టోర్నమెంట్ విజేతగా యంగ్ స్టార్ జట్టు, రన్నరప్‌గా సహారా ఇండియన్ జట్టు నిలిచాయి.

అనంతరం నిర్వహించిన బహుమతుల ప్రదానోత్సవ కార్యక్రమంలో మెదక్ జిల్లా అదనపు ఎస్పీ విక్రాంత్ సింగ్, డీఎస్పీ నరేందర్ గౌడ్, సీఐ రంగ కృష్ణ, ఎస్ఐ రంజిత్ రెడ్డి పాల్గొని విజేత, రన్నరప్ జట్లకు బహుమతులు అందజేశారు.

ఈ సందర్భంగా అదనపు ఎస్పీ విక్రాంత్ సింగ్ మాట్లాడుతూ.. యువత మత్తు పదార్థాలకు, మాదకద్రవ్యాలకు అలవాటు పడకుండా క్రీడలపై ఆసక్తి పెంచుకోవాలని సూచించారు. ఉన్నత ఆశయాలను నిర్దేశించుకుని వాటి సాధన కోసం కష్టపడాలని, జీవితంలో మంచి లక్ష్యాలతో ముందుకు సాగుతూ రాబోయే తరాలకు ఆదర్శంగా నిలవాలని క్రీడాకారులకు, యువతకు పిలుపునిచ్చారు.

క్రీడలు యువతలో క్రమశిక్షణ, ఐక్యత, పట్టుదల, నాయకత్వ లక్షణాలను పెంపొందిస్తాయని పేర్కొన్నారు.

ఈ కార్యక్రమంలో ఇరు జట్ల క్రీడాకారులు, నర్సాపూర్ పోలీస్ సిబ్బంది, తదితరులు పాల్గొన్నారు.

యువతను క్రీడల వైపు ప్రోత్సహిస్తూ.. మాదకద్రవ్యాల రహిత సమాజ నిర్మాణమే లక్ష్యంగా పోలీసుల ఆధ్వర్యంలో ఈ టోర్నమెంట్ నిర్వహించారు.