Sangareddy: ధాన్యం కొనుగోలు కేంద్రాలను ప్రారంభించిన ఎమ్మెల్యే చింత ప్రభాకర్!

సంగారెడ్డి: రైతులు ఆరుగాలం కష్టపడి పండించిన వరి ధాన్యాన్ని చివరి గింజ వరకు కొనుగోలు చేసి, వారికి న్యాయంగా దక్కాల్సిన మద్దతు ధర అందించాలని సంగారెడ్డి ఎమ్మెల్యే చింత ప్రభాకర్ అధికారులను కోరారు. ధాన్యం కొనుగోళ్లలో జాప్యం జరగకుండా, రైతులకు ఎలాంటి ఇబ్బందులు కలగకుండా అవసరమైన అన్ని చర్యలు తీసుకోవాలని సూచించారు.

సంగారెడ్డి జిల్లా కొండాపూర్ మండలంలోని మల్కాపూర్ పీఏసీఎస్ ఆధ్వర్యంలో ఏర్పాటు చేసిన వరి ధాన్యం కొనుగోలు కేంద్రాన్ని ఎమ్మెల్యే చింత ప్రభాకర్ ప్రారంభించారు. అనంతరం మారేపల్లి–తొగర్‌పల్లి పీఏసీఎస్ ఆధ్వర్యంలో ఏర్పాటు చేసిన వరి ధాన్యం కొనుగోలు కేంద్రాన్ని కూడా ప్రారంభించారు. తరువాత సంగారెడ్డి మండలం హనుమాన్ నగర్ లో ఐకేపీ ఆధ్వర్యంలో వరి ధాన్యం కొనుగోలు కేంద్రాన్ని ప్రారంభించారు. ఈ సందర్భంగా ఆయన మాట్లాడుతూ రైతుల సంక్షేమానికి ప్రాధాన్యత ఇవ్వాలని, ధాన్యం సేకరణ ప్రక్రియను పారదర్శకంగా నిర్వహించాలని అన్నారు.

రైతులు పండించిన ధాన్యాన్ని కొనుగోలు కేంద్రాల్లో విక్రయించేందుకు రోజుల తరబడి వేచి ఉండే పరిస్థితి రాకూడదని స్పష్టం చేశారు. కొనుగోలు కేంద్రాల్లో తూకం, తేమ శాతం నిర్ధారణ, గన్నీ సంచుల సరఫరా, ధాన్యం రవాణా, టార్పాలిన్ల వంటి అవసరమైన సౌకర్యాలను అందుబాటులో ఉంచాలని సూచించారు. రైతులకు ఎలాంటి ఇబ్బందులు తలెత్తకుండా సంబంధిత అధికారులు సమన్వయంతో పనిచేయాలని కోరారు.

సన్న వడ్లకు క్వింటాల్‌కు రూ.500 బోనస్ ఇస్తామని ప్రకటించిన మేరకు రైతులకు ఆ ప్రయోజనం అందించాలని చింత ప్రభాకర్ డిమాండ్ చేశారు. రైతులు పండించిన పంటకు గిట్టుబాటు ధర లభించడం వారి హక్కు అని, కొనుగోలు చేసిన ధాన్యానికి సంబంధించిన నగదును రైతుల ఖాతాల్లో సకాలంలో జమ చేసేలా చర్యలు తీసుకోవాలని అన్నారు.

రైతులు దళారుల బారిన పడకుండా ప్రభుత్వ కొనుగోలు కేంద్రాలను సద్వినియోగం చేసుకోవాలని సూచించారు. కొనుగోలు ప్రక్రియలో పారదర్శకత పాటిస్తూ, రైతులకు అన్యాయం జరగకుండా అధికారులు బాధ్యతాయుతంగా వ్యవహరించాలని పేర్కొన్నారు.

వ్యవసాయ రంగంపై ఆధారపడి జీవించే రైతు కుటుంబాలకు పంట విక్రయాల ద్వారా వచ్చే ఆదాయం ఎంతో కీలకమని, ధాన్యం కొనుగోళ్లలో జాప్యం జరిగితే వారు ఆర్థికంగా ఇబ్బందులు ఎదుర్కొనే అవకాశం ఉందని అన్నారు. ధాన్యం సేకరణ నుంచి చెల్లింపుల వరకు ప్రతి దశను సమర్థంగా నిర్వహించి, రైతులకు సకాలంలో న్యాయం జరిగేలా చూడాలని అధికారులకు సూచించారు.

కార్యక్రమంలో పాల్గొన్నవారు మాజీ డీసీఎంఎస్ వైస్ పట్నం మాణిక్యం , పీఏసీఎస్ చైర్మన్లు ఆకుల పవన్, మున్నూరు రాజు, యాదగిరి, వైస్ చైర్మన్లు, డైరెక్టర్లు, మండల పార్టీ అధ్యక్షుడు మ్యాకం విట్టల్, కార్యదర్శి గోవర్ధన్ రెడ్డి, సర్పంచులు రామాగౌడ్, మహేష్, అనిల్, డి.కృష్ణ, పాండురంగం, దేవేందర్, అమరేందర్ రెడ్డి, సాయన్న, మాజీ జెడ్పీటీసీ ప్రేమానందం, రామచంద్రయ్య, ఉక్ముద్దీన్, రవి, బుచ్చయ్య, నరేందర్ రెడ్డి, జగదీశ్వర్, మోహన్ గౌడ్, శేఖర్, కృష్ణారెడ్డి, ఆంజనేయులు గౌడ్, సంషోద్దీన్, ప్రభాకర్ గౌడ్, నరేందర్ తదితరులు పాల్గొన్నారు.