Patancheru: రుద్రారంలో అంబరాన్నంటిన బతుకమ్మ సంబరాలు

పటాన్‌చెరు: తెలంగాణ సాంస్కృతిక సాంప్రదాయ ప్రతీకకు ప్రతిరూపమైన బతుకమ్మ పండుగను పటాన్‌చెరు నియోజకవర్గం, ఇస్నాపూర్ మున్సిపాలిటీ పరిధిలోని రుద్రారం వార్డులో వైభవంగా, ఉత్సాహభరిత వాతావరణంలో నిర్వహించారు. స్థానిక కౌన్సిలర్లు పాండు, సందీప్ గౌడ్, లత వెంకటేష్, రాజు, లక్ష్మీ నరసింహారెడ్డి సంయుక్త ఆధ్వర్యంలో ఈ వేడుకలను కన్నుల పండువగా జరిపారు.

ఈ వేడుకల్లో రుద్రారం వార్డు పరిధిలోని మహిళలు, యువతులు అత్యంత ఉత్సాహంగా, సంప్రదాయ వస్త్రధారణతో పాల్గొన్నారు. వివిధ రకాల రంగురంగుల పూలతో పేర్చిన అందమైన బతుకమ్మలను మధ్యలో ఉంచి, చుట్టూ తిరుగుతూ మహిళలు భక్తిశ్రద్ధలతో గౌరమ్మను కొలిచారు. బతుకమ్మ పాటలు, కోలాటాలు, చప్పట్లతో ప్రాంగణమంతా మార్మోగింది. తెలంగాణ ఆడపడుచుల ఐక్యతకు, ఆనందానికి ఈ వేడుకలు ప్రతీకగా నిలిచాయి.

సృష్టికి, ప్రకృతికి ప్రతీక బతుకమ్మ

ఈ సందర్భంగా కౌన్సిలర్లు మాట్లాడుతూ... తెలంగాణ సంస్కృతి, సంప్రదాయాలకు ప్రతీక అయిన బతుకమ్మ పండుగ ప్రకృతిని, నీటిని, పువ్వులను పూజించే అద్భుతమైన పండుగని కొనియాడారు.

పూలను దైవంగా భావించి పూజించే ఏకైక సంస్కృతి మన తెలంగాణది. ప్రకృతిని ప్రేమించడం, సమస్త కోటి జీవరాశులను గౌరవించడం బతుకమ్మ మనకు నేర్పుతుంది. చెరువులు నిండి, పంటలు పండి, ఇళ్లలో సుఖసంతోషాలు వెల్లివిరియాలని కోరుకుంటూ ప్రతి ఏటా జరుపుకునే ఈ పండుగ మన రాష్ట్ర విశిష్టతను ప్రపంచానికి చాటుతోంది. కులమతాలకు, పార్టీలకు అతీతంగా ఆడపడుచులంతా ఒక్కచోట చేరి ఆనందంగా జరుపుకునే ఈ పండుగ మన ఐక్యతకు ప్రతీక అని వారు పేర్కొన్నారు.

సాంస్కృతిక శోభతో ముగిసిన వేడుకలు

మహిళలందరూ బతుకమ్మలను సమీపంలోని జలవనరుల్లో భక్తిశ్రద్ధలతో నిమజ్జనం చేశారు.

ఈ కార్యక్రమంలో స్థానిక మాజీ సర్పంచ్ సుదీర్ రెడ్డి,మాజీ ఎంపీటీలు హరిప్రసాద్ రెడ్డి,మన్నే రాజు, మాజీ వార్డ్ సభ్యులు,పాపిరెడ్డి, సత్తిరెడ్డి,లక్ష్మారెడ్డి, పుర్ర ప్రముఖులు, నాయకులు, గ్రామ పెద్దలు ప్రజలు పెద్ద సంఖ్యలో మహిళలు పాల్గొని పండుగ శుభాకాంక్షలు తెలుపుకున్నారు. వేడుకల అనంతరం మహిళలకు వాయినాలు పంపిణీ చేసి, మిఠాయిలు పంచుకున్నారు.

ఈ వేడుకలతో రుద్రారం వార్డు పండుగ వాతావరణం సంతరించుకుంది.