Isnapur: ఇస్నాపూర్‌లో బయోమెడికల్ ప్లాంట్ ప్రజాభిప్రాయ సేకరణపై అభ్యంతరాలు!

Isnapur: ఇస్నాపూర్, పాశమైలారం పరిసర ప్రాంతాల్లో పారిశ్రామిక కాలుష్యం, భూగర్భజలాల్లో అధిక TDS స్థాయిలపై ప్రజల్లో ఆందోళనలు ఉన్న నేపథ్యంలో, M/s. Medicare Environmental Management Private Limited సంస్థ ప్రతిపాదించిన రోజుకు 25 టన్నుల సామర్థ్యం గల ఉమ్మడి బయోమెడికల్ వ్యర్థాల శుద్ధి కేంద్రం (CBMWTF)కు సంబంధించి ఈరోజు నిర్వహించిన పర్యావరణ ప్రజాభిప్రాయ సేకరణలో ఇస్నాపూర్ మున్సిపాలిటీ కో-ఆప్షన్ మెంబర్ మొహమ్మద్ నిజాముద్దీన్ బాబా పాల్గొని పలు కీలక అంశాలను ప్రస్తావించారు.

ప్రాంతంలో ఇప్పటికే పారిశ్రామిక కాలుష్యంపై ఆందోళనలు ఉన్నాయని, భూగర్భజలాల్లో అధిక TDS స్థాయిలు ఉన్నట్లు స్థానికులు చెబుతున్న నేపథ్యంలో, భూగర్భజలాల నాణ్యతపై సమగ్ర శాస్త్రీయ పరీక్షలు నిర్వహించి, కాలుష్యానికి గల కారణాలను గుర్తించాలని ఆయన కోరారు. ప్రతిపాదిత బయోమెడికల్ వ్యర్థాల శుద్ధి కేంద్రం వల్ల పర్యావరణం, భూగర్భజలాలు, గాలి నాణ్యత, ప్రజారోగ్యంపై ఎలాంటి ప్రభావాలు ఉంటాయో సమగ్రంగా అంచనా వేయాలని అధికారులను విజ్ఞప్తి చేశారు.

ప్రజాభిప్రాయ సేకరణ నిర్వహణపై అభ్యంతరాలు

ప్రజాభిప్రాయ సేకరణను ప్రతిపాదిత ప్రాజెక్టు ప్రాంతానికి సమీపంలో లేదా స్థానిక ప్రజలకు సులభంగా అందుబాటులో ఉండే తగిన బహిరంగ ప్రదేశంలో నిర్వహించాల్సి ఉండగా, ఫంక్షన్ హాల్‌లో నిర్వహించడంపై ఆయన అభ్యంతరం వ్యక్తం చేశారు. ప్రజలు స్వేచ్ఛగా వచ్చి తమ అభిప్రాయాలు తెలియజేయడానికి అనువైన వేదిక ఉండాలని పేర్కొన్నారు.

అలాగే, సమావేశానికి ప్రాజెక్టు యాజమాన్యం తరఫున వ్యక్తులను తీసుకువచ్చినట్లు కనిపించిందని, స్థానిక ప్రజల భాగస్వామ్యం తగినంతగా కనిపించకపోవడంపై ఆందోళన వ్యక్తం చేశారు. ఇటువంటి ప్రజాభిప్రాయ సేకరణలో ప్రభావిత గ్రామాల ప్రజలకు పూర్తి సమాచారం అందించి, వారు స్వేచ్ఛగా పాల్గొని తమ అభ్యంతరాలు, సూచనలు తెలియజేసే అవకాశం కల్పించాలని కోరారు.

ప్రధాన డిమాండ్లు:

ఇస్నాపూర్, పాశమైలారం మరియు పరిసర గ్రామాల్లో భూగర్భజలాలపై సమగ్ర నాణ్యత పరీక్షలు నిర్వహించాలి.

అధిక TDS స్థాయిలు, పారిశ్రామిక కాలుష్యానికి గల కారణాలను శాస్త్రీయంగా పరిశీలించాలి.

ప్రతిపాదిత ప్రాజెక్టు పర్యావరణ ప్రభావాలు, కాలుష్య నియంత్రణ చర్యల వివరాలను ప్రజలకు అందుబాటులో ఉంచాలి.

ప్రజాభిప్రాయ సేకరణలో స్థానిక ప్రజల భాగస్వామ్యం, పారదర్శకతకు ప్రాధాన్యత ఇవ్వాలి.

ప్రజల అభ్యంతరాలు, సూచనలను అధికారిక రికార్డులో నమోదు చేసి, వాటిని పరిగణనలోకి తీసుకున్న తర్వాతే తగిన నిర్ణయాలు తీసుకోవాలి.

“ప్రజల ఆరోగ్యం, స్వచ్ఛమైన తాగునీరు, పర్యావరణ పరిరక్షణ విషయంలో ఎలాంటి నిర్లక్ష్యాన్ని సహించకూడదు. ప్రజాభిప్రాయ సేకరణ అనేది కేవలం ఒక కార్యక్రమంగా కాకుండా, స్థానిక ప్రజల నిజమైన అభిప్రాయాలు వినిపించే వేదికగా ఉండాలి” అని మొహమ్మద్ నిజాముద్దీన్ బాబా పేర్కొన్నారు.