Narsapur: అప్పుల బాధతో రైతు ఆత్మహత్య: ఆవంచలో విషాదం!

నర్సాపూర్, మెదక్ జిల్లా: వ్యవసాయ అవసరాలు, ట్రాక్టర్ ఖర్చుల కోసం చేసిన అప్పులు భారంగా మారడంతో ఓ రైతు ఆత్మహత్య చేసుకున్న విషాద ఘటన మెదక్ జిల్లా నర్సాపూర్ మండలం ఆవంచ గ్రామంలో చోటుచేసుకుంది. కుటుంబాన్ని పోషిస్తూ వ్యవసాయం చేసుకుంటున్న వ్యక్తి మృతి చెందడంతో గ్రామంలో విషాదఛాయలు అలుముకున్నాయి.

పోలీసులు తెలిపిన వివరాల ప్రకారం. ఆవంచ గ్రామానికి చెందిన తలారి ఆంజనేయులు (36) వ్యవసాయం చేస్తూ కుటుంబాన్ని పోషిస్తున్నాడు. వ్యవసాయ అవసరాలతో పాటు ట్రాక్టర్‌కు సంబంధించిన ఖర్చుల కోసం కొంతకాలంగా అప్పులు చేశాడు. అయితే, ఆ అప్పుల కారణంగా ఆర్థిక ఇబ్బందులు ఎదురవడంతో ఆంజనేయులు తీవ్ర ఆందోళనకు గురయ్యేవాడు. తన బాధలను భార్య లావణ్యతో పంచుకుంటూ అప్పుల విషయమై తరచూ ఆవేదన వ్యక్తం చేసేవాడు.

భర్త ఆందోళన చెందవద్దని, అప్పులను క్రమంగా తీర్చుకుందామని భార్య లావణ్య ధైర్యం చెప్పేది. ఈ క్రమంలో సోమవారం రాత్రి కూడా ఆర్థిక ఇబ్బందుల గురించి ఆంజనేయులు బాధపడగా, భార్య అతనికి సర్దిచెప్పినట్లు పోలీసులు తెలిపారు.

అనంతరం రాత్రి 9 గంటల సమయంలో కుటుంబ సభ్యులంతా భోజనం చేసి నిద్రపోయారు. అయితే, ఆంజనేయులు రాత్రి సమయంలో ఇంటి ఎదురుగా ఉన్న మిషన్ భగీరథ వాటర్ ట్యాంకు వద్దకు వెళ్లి ఆత్మహత్య చేసుకున్నట్లు పోలీసులు వెల్లడించారు.

మంగళవారం తెల్లవారుజామున సుమారు 3 గంటల సమయంలో నిద్రలేచిన భార్య లావణ్యకు భర్త కనిపించకపోవడంతో బయటకు వెళ్లి వెతికింది. ఈ క్రమంలో వాటర్ ట్యాంకు వద్ద భర్త మృతదేహాన్ని గుర్తించి తీవ్ర ఆవేదనకు గురైంది. ఆమె కేకలు వేయడంతో స్థానికులు అక్కడికి చేరుకున్నారు.

సమాచారం అందుకున్న పోలీసులు ఘటనకు సంబంధించిన వివరాలు సేకరించారు. మృతదేహాన్ని పోస్టుమార్టం నిమిత్తం నర్సాపూర్ ప్రభుత్వ ఆసుపత్రి మార్చురీకి తరలించారు. తన భర్త మృతిపై ఎవరి పట్లా ఎలాంటి అనుమానాలు లేవని భార్య లావణ్య ఫిర్యాదులో పేర్కొన్నట్లు పోలీసులు తెలిపారు.

భార్య, ఇద్దరు పిల్లలకు తీరని లోటు

ఆంజనేయులుకు భార్య లావణ్యతో పాటు కుమారుడు మనీ వర్ధన్ (13), కుమార్తె మధు చందన (11) ఉన్నారు. కుటుంబానికి ఆధారంగా ఉన్న వ్యక్తి మృతి చెందడంతో భార్య, పిల్లలు దిక్కుతోచని స్థితిలోకి వెళ్లారు. అప్పుల భారం ఒక కుటుంబంలో తీవ్ర విషాదాన్ని నింపిన ఈ ఘటన స్థానికంగా కలచివేసింది. ఘటనపై నర్సాపూర్ ఎస్సై రంజిత్ కుమార్ రెడ్డి వివరాలు వెల్లడించారు.