Mancherial: కాసిపేట ఎంపీడీవో కార్యాలయంలో సిబ్బంది నిర్లక్ష్యం.. ఇబ్బందుల్లో ప్రజలు!
Mancherial: కాసిపేట ఎంపీడీవో కార్యాలయంలో సిబ్బంది సమయపాలన పాటించకపోవడం వల్ల పింఛన్లు, ధ్రువీకరణ పత్రాల కోసం వచ్చే ప్రజలు తీవ్ర ఇబ్బందులు పడుతున్నారు.
Mancherial: కాసిపేట ఎంపీడీవో కార్యాలయంలో సిబ్బంది నిర్లక్ష్యం.. ఇబ్బందుల్లో ప్రజలు!
Mancherial: మంచిర్యాల జిల్లా కాసిపేట మండల ప్రజా పరిషత్ కార్యాలయం ప్రజా సమస్యల పరిష్కార వేదిక కావాల్సి ఉంది, కానీ ఇక్కడ సిబ్బంది నిర్లక్ష్యం కారణంగా ప్రజలకు నిత్యం ఇబ్బందులు తప్పడం లేదు. కార్యాలయానికి వస్తే అధికారులు అందుబాటులో ఉండకపోవడం, ముఖ్యంగా సిబ్బంది అసలు సమయపాలన పాటించకపోవడంపై స్థానికులు తీవ్ర ఆందోళన వ్యక్తం చేస్తున్నారు.
మండల కేంద్రంలోని ఎంపీడీవో కార్యాలయానికి నిత్యం వివిధ గ్రామాల నుండి పింఛన్లు, ధ్రువీకరణ పత్రాలు, ఉపాధి హామీ పనులు మరియు ఇతర ప్రభుత్వ సంక్షేమ పథకాల కోసం వందలాది మంది ప్రజలు వస్తుంటారు. అయితే ఇక్కడ పనిచేసే సిబ్బందికి సమయపాలన అనేది లేకుండా పోయింది. ప్రభుత్వ నిబంధనల ప్రకారం వేళకు విధులకు హాజరు కావాల్సి ఉన్నప్పటికీ, ఏ ఒక్కరూ సమయానికి రావడం లేదు.
కార్యాలయ సమయం ప్రారంభమై గంటలు గడుస్తున్నా టేబుళ్లు ఖాళీగానే దర్శనమిస్తున్నాయి. ఎంపీడీవో ట్రైనింగ్ నిమిత్తం వెళ్లారని కింది స్థాయి సిబ్బంది చెబుతున్నప్పటికీ, మిగతా సిబ్బంది మాత్రం ఏ సమయానికి వస్తారో, ఎప్పుడు వెళ్తారో ఎవరికీ స్పష్టత లేదు.
ప్రజా సమస్యలు తీర్చాల్సిన కార్యాలయంలో సిబ్బంది సమయపాలన పాటించకపోవడం, ఇష్టారాజ్యంగా వ్యవహరించడం సామాన్యులకు శాపంగా మారుతోంది. ఇప్పటికైనా జిల్లా కలెక్టర్ మరియు ఇతర ఉన్నత అధికారులు తక్షణమే స్పందించి, కాసిపేట ఎంపీడీవో కార్యాలయంలో విధుల పట్ల నిర్లక్ష్యం వహిస్తూ సమయం పాటించని సిబ్బందిపై కఠిన చర్యలు తీసుకోవాలని, కార్యాలయంలో సేవలు సక్రమంగా అందేలా తగిన ఆదేశాలు జారీ చేయాలని ప్రజలు కోరుతున్నారు.
